U Aŭstralii žančyna doŭhi čas skardziłasia na depresiju i prablemy z pamiaćciu. U jaje mozhu znajšli žyvoha čarviaka
Aŭstralijskija navukoŭcy znajšli ŭ mozhu žančyny žyvoha čarviaka daŭžynioj 8 sm. Jaho vydalili z łobnaj doli mozhu padčas apieracyi ŭ Kanbiery letaś, piša Bi-bi-si.
Žančyna źviarnułasia da daktaroŭ u kancy studzienia 2021 hoda, skardziačysia na boli ŭ žyvacie i dyjareju, pastajanny suchi kašal, vysokuju tempieraturu i patlivaść.
Naleta žančyna pačała skardzicca na prablemy z pamiaćciu i depresiju. Jaje nakiravali ŭ balnicu Kanbiery dla MRT hałaŭnoha mozha, jakaja vyjaviła «atypovaje paškodžańnie pravaj łobnaj doli hałaŭnoha mozha», što patrabavała chirurhičnaha ŭmiašańnia.
Padčas apieracyi niejrachirurh Chary Pryja Bandzi dastała z mozha pacyjentki 8-santymietrovaha čyrvonaha čarviaka.
«Ale niejrachirurh, viadoma, nie dumaŭ, što znojdzie čarviaka, — skazaŭ doktar-infiekcyjanist balnicy ŭ Kanbiery i dacent miedycyny ŭ aŭstralijskim nacyjanalnym univiersitecie Sandžaj Sienanajakie. — Niejrachirurhi rehularna majuć spravu ź infiekcyjami ŭ mozhu, ale hetaja znachodka była adzinaj u svaim rodzie. Nichto nie čakaŭ znajści takoje».
Vyjaviŭšy niečakanuju znachodku, hrupa śpiecyjalistaŭ balnicy sabrałasia na kansilium, kab zrazumieć, što heta za čarviak, adkul jon uziaŭsia i hałoŭnaje — jak lačyć pacyjentku.
«My prosta źviarnulisia da padručnikaŭ, vyvučajučy roznyja vidy kruhłych čarviakoŭ, jakija mohuć vyklikać nieŭrałahičnyja invazii i zachvorvańni», — kaža Sienanajakie. Ich pošuki nie dali vynikaŭ, i jany źviarnulisia pa dapamohu da inšych śpiecyjalistaŭ.
«Kanbiera — nievialiki horad, tamu my adpravili čarviaka, jaki byŭ jašče žyvy, prosta ŭ łabaratoryju CSIRO, jakaja maje vialiki dośvied pracy z parazitami», — skazaŭ Sienanajakie. Taja nieadkładna vyznačyła niaprošanaha hościa jak Ophidascaris robertsi — kruhłaha čarviaka, jaki časta sustrakajecca ŭ dyvanovych pitonaŭ, nieatrutnych źmiej, jakija žyvuć na bolšaj častcy terytoryi Aŭstralii.
Heta pieršy vypadak vyjaŭleńnia hetaha parazita ŭ čałavieka.
Jak akazałasia, pacyjentka žyvie pablizu voziera, dzie žyvuć dyvanovyja pitony.
Pavodle słoŭ Sienanajakie, niahledziačy na adsutnaść pramoha kantaktu sa źmiejami, jana časta źbirała miascovyja travy ŭ vakolicach voziera, kab vykarystoŭvać ich u hatavańni ježy.
Daktary i navukoŭcy, jakija zajmalisia hetym vypadkam, miarkujuć, što parazit moh trapić u travu ź fiekalijami pitona. Na ich dumku, ličynki patrapili na ježu abo kuchniu z-za niamytych ruk, a mahčyma, i ź zielaninaj.
Pavodle słoŭ Sienanajakie, hety vypadak padkreślivaje niebiaśpieku pieradačy chvarob i infiekcyj ad žyvioł da čałavieka, asabliva pa miery taho, jak ludzi i žyvioły pačynajuć žyć usio bližej adno da adnaho, a ich miescy pražyvańnia ŭsio bolš pierasiakajucca.
«Za apošnija 30 hadoŭ u śviecie było zarehistravana kala 30 novych vypadkaŭ zaražeńnia, — kaža jon. — Z usich novych infiekcyj, jakija ŭźnikajuć u śviecie, kala 75% źjaŭlajucca zaanoznymi, heta značyć pieradajucca ad žyvioł da čałavieka. Da ich adnosiacca karanavirusy».
«Ophidascaris nie pieradajecca ad čałavieka da čałavieka, tamu hety vypadak nie vykliča pandemii, nakštałt kavidu abo Eboły, — praciahvaje jon. — Adnak hety piton i hety parazit sustrakajucca ŭ inšych častkach śvietu, tamu całkam imavierna, što ŭ najbližejšyja hady buduć vyjaŭleny inšyja vypadki zachvorvańnia ŭ inšych krainach».
Doktar-infiekcyjanist, prafiesar Piter Kalińjon, jaki nie braŭ udziełu ŭ lačeńni pacyjenta, skazaŭ, što niekatoryja vypadki zaanoznych zachvorvańniaŭ moža naohuł nie ŭdacca dyjahnastavać, bo jany sustrakajucca redka, i daktary nie viedajuć, što šukać.
«Časam ludzi pamirajuć, tak i nie znajšoŭšy pryčyny zachvorvańnia, — skazaŭ jon. — Varta prajaŭlać aściarožnaść pry sustrečy z žyviołami i navakolnym asiarodździem, staranna myć pradukty i pravilna hatavać ježu, a taksama nasić srodki abarony, naprykład, doŭhija rukavy, kab paźbiehnuć ukusaŭ».
Sama ž pacyjentka, pa słovach daktaroŭ, dobra papraŭlajecca, choć za joj pa-raniejšamu staranna nazirajuć.
Daktary sprabujuć zrazumieć, ci nie mahło papiaredniaje zachvorvańnie, jakoje vyklikała źnižeńnie imunitetu, pryvieści da taho, što ličynkam udałosia zamacavacca ŭ arhaniźmie.
Kamientary