«Biełarusy — heta niemcy Uschodu». Polski raźviedčyk, jaki zajmaŭsia Biełaruśsiu, upieršyniu daŭ intervju
Padpałkoŭnik Maciej Karavaj, jaki śpiecyjalizavaŭsia na biełaruskim i rasijskim kirunkach, niekalki miesiacaŭ tamu vyjšaŭ na piensiju i daŭ vialikaje intervju jutub-kanału Didaskalia.
Polski raźviedčyk vysoka acaniŭ arhanizacyju biełaruskaj armii. Na jaho dumku, jana ŭ niečym lepšaja za rasijskuju.
«Ja bolš caniu biełaruskuju armiju, čym rasijskuju. Biełarusy lepšyja ŭ arhanizacyi niekatorych pytańniaŭ, majuć cikavyja rašeńni asobnych ź ich. Navat možna skazać, unikalnyja. Jany jak by znachodziacca ŭ cieni rasijskaj, ale treba adznačyć, što biełarusy — heta «niemcy Uschodu».
U biełarusaŭ paradak. Rasijski bardak dla biełarusaŭ niecharakterny. Kali bačyš biełaruskija harady, miascovaści, dzie žyvuć biełarusy, to padajecca, što ty jak by znachodzišsia ŭ Polščy. I z vajskovaha punktu hledžańnia, jany taksama akuratnyja pa arhanizacyi i vielmi sistematyčnyja», — kaža adstaŭny polski raźviedčyk.
Były raźviedčyk zhadvaje, što jaho cikaviła, jak biełarusy ŭ siabie realizoŭvali toje, što im pieradavali rasijanie:
«Ja bačyŭ, jak heta sapraŭdy dobra moža być realizavana, u toj čas jak u rasijan viečna niešta nie atrymlivałasia (nie mahu ŭdavacca ŭ padrabiaznaści). Heta taksama śviedčyć ab peŭnaj štabnoj kultury, vajskovaj kultury».
Na dumku polskaha vajskovaha analityka, biełaruskaje vojska taksama mienš karumpavanaje ŭ paraŭnańni z rasijskim.
Čamu biełaruskaja armija nie ŭviazałasia ŭ vajnu va Ukrainie
Padpałkoŭnik u adstaŭcy Maciej Karavaj źviartaje ŭvahu na toj fakt, što biełaruskaja armija nie takaja vialikaja, kab jaje ŭstupleńnie ŭ vajnu dało rasijanam vyrašalnuju pieravahu. «Mahčyma, niejkija siły ŭkraincaŭ jana b adciahnuła, ale vialikich strat ukrainskaj armii jana nanieści nie zdolnaja», — kaža adstaŭny polski raźviedčyk.
«Treba pamiatać, što Łukašenka svaju ŭładu ŭ Biełarusi zamacavaŭ na niekalkich tezisach. Adzin ź ich — pakul jon va ŭładzie, u Biełarusi nie budzie vajny. I hety tezis jon vielmi časta paŭtaraje. A adnosna manifiestacyj [2020-ha] Łukašenka śćviardžaje, što kab nie jon, to było b tak, jak va Ukrainie.
U Łukašenki ź biełaruskimi siłavikami zaklučana svajho rodu pahadnieńnie. Ułada Łukašenki nie absalutnaja. Jon sastupiŭ častku paŭnamoctvaŭ Radzie biaśpieki i trymaje dystancyju i ź siłavikami, i z Rasijaj.
A ŭsie ž siłavyja struktury razumiejuć, što ŭ vypadku poŭnaha pahłynańnia jany buduć tolki častkaj vialikaj Rasii. A tak jany ŭ siabie ŭ Biełarusi niešta značać».
Kali b Alaksandr Łukašenka daŭ zahad napaści na Ukrainu, to, na dumku Karavaja, biełaruskija vajskoŭcy b jaho vykanali, ale Łukašenku daviałosia b znajści vielmi mocnyja matyvatary dla ich, bo taki krok mocna supiarečyŭ by niefarmalnamu «sacyjalnamu kantraktu» Łukašenki ź siłavikami.
«Na moj pohlad, taki zahad ź jaho boku małaimavierny. Udzieł Biełarusi ŭ vajnie nie ŭvachodzić u płany Łukašenki. Terytoryja, palihony, transpart, łahistyka, navučańnie, lačeńnie [— usio heta jon rasijanam daŭ], ale nie niepasredny ŭdzieł», — adznačaje analityk.
Čytajcie jašče:
Vaskrasienski: Treba, kab Sikorski pryvioz padarunak Łukašenku. A Bialacki i 20 zavadataraŭ vyjduć apošnimi39
Kamientary
Nahadaju, što ŭ niešmatlikaj finskaj armii uzoru 30ch hadoŭ XX st., jakaja dosyć doŭha efiektyŭna strymlivała savieckuju navału pad čas saviecka-finskaj vajny 1939-1940 hadoŭ, mienavita vonkavy bok vajskovaj słužby atrymlivaŭ vielmi nievialikuju uvahu. To bok kamandny skład asoba nie turbavała, ci moža žaŭnier/aficer pryhoža maršyravać na paradzie, ale vielmi cikaviła, nakolki jon zdolny efiektyŭna vajavać u sučasnaj vajnie.