«Schadziŭ muž pa pradukty na 20 jeŭra, to-bok ja jamu vinnaja 10 jeŭra». Biełaruska raskazała, jak moža być uładkavany siamiejny biudžet 

Usie vydatki i dachody dzielim napałovu

Ja skončyła profilnuju VNU dva hady tamu. Z treciaha kursa pryjemna pravodžu pracoŭny čas na cikavym prajekcie, ale sa ścipłymi, pa mierkach rynku, rejtami.

Moj muž na paru hadoŭ za mianie starejšy. Skončyŭ raźmierkavańnie paśla techničnaha ŭniviersiteta ŭ prajektnym instytucie i padaŭsia ŭ ajcišku ŭ 2020 hodzie jak QA Engineer.

Praktyčna ŭvieś pieryjad našych adnosin my zarablajem plus-minus adnolkava. Kali ja vučyłasia, zarpłata ŭ mianie była krychu bolšaja, ale ja nie pracavała pa 8 hadzin; ciapier jon uładkavaŭsia na dobruju pazicyju i atrymlivaje bolš pracentaŭ na 20%.

Pierajechali my na ahulnyja adkładzienyja hrošy z adnolkavymi rejtynhami. Biudžet amal idealna piłujecca napałovu. U nas jość tablička ŭ Excel, kudy my zanosim vydatki, u jakich aboje zacikaŭlenyja. Naprykład, schadziŭ muž pa pradukty na 20 jeŭra, značyć ja jamu vinnaja 10 jeŭra.

Ahulnyja vydatki adbyvajucca pa pryncypie: ci majem patrebu my ŭ hetym aboje ŭ roŭnaj stupieni? Ličym vydatki na pradukty, bytavuju chimiju, arendu žylla, padpiski na stryminhi, sumiesnyja vychady (kino, kaviarni, restarany), padarožža, padarunki dla blizkich «ad nas dvaich», chatni noŭtbuk.

Prykładna raz u miesiac my padličvajem roźnicu sumy daŭhoŭ kožnaha. Naprykład, ja za miesiac vinavataja mužu 400 jeŭra, a jon mnie 450. Roźnicu jon pieravodzić mnie na bankaŭski rachunak abo addaje najaŭnymi.

Časam chtości moža pačastavać inšaha. Takija kiejsy my nie zapisvajem u ahulny biudžet. Pa adčuvańniach jany adbyvajucca z abodvuch bakoŭ z roŭnaj častatoj. Astatnija vydatki i aščadžańni — asabisty kłopat kožnaha.

Bytavyja pytańni — poŭnaje supracoŭnictva

Pašancavała: ja nie lublu stajać la plity, ale z zadavalnieńniem pamachaju anučaj i švabraj pa kvatery. Mužu ž padabajecca hatavać.

Posud myjem pa čarzie: paniadziełak, sierada, niadziela — maje dni, aŭtorak, čaćvier, subota — jahonyja, a piatnica — dzień adpačynku i chaosu. Zahruzić pralnuju mašynku i raźviesić vopratku — razam viesialej.

Ale heta ŭ ideale. Na praktycy davodzicca damaŭlacca: kali ja kiepska siabie adčuvaju, muž moža navieści paradak. Kali ŭ jaho niama nastroju hatavać viačeru, ja mahu katlet napiačy. Heta mohuć być i razavyja vypadki, i bolš praciahłyja.

Zdarajucca siesii i zavały na pracy. Na takija pieryjady taksama damaŭlajemsia: ciapier, naprykład, u nas čaściej dastaŭki ježy i abiedy ŭ stałoŭkach.

My nie płacim adno adnamu za pracu pa domu. A kali b płacili, to vychodzili b u nul: my abodva tracim prykładna adnolkavuju kolkaść siłaŭ i času na chatnija spravy.

Ale davajcie pryznajem: situacyja, kali abodva partniory naroŭni ŭkładajucca ŭ chatnija spravy i nichto nie adčuvaje siabie pakryŭdžanym abo niedaacenienym, sustrakajecca nie va ŭsich.

Nieapłatnaja praca: mała havorać, ale jana jość

Pracu pa domu vykonvajuć u asnoŭnym žančyny. Asnoŭnyja tendencyi vidavočnyja: čym bolš ekanamična raźvitaja kraina, tym mienš času ludzi traciać na chatniuju pracu i tym mienš pradstaŭleny hiendarny razryŭ pa časie ŭdziełu.

Tamu, pračytaŭšy post Mišy Łarčanki, ja ździviłasia i ŭzradavałasia. Aŭtar nie tolki pryznaŭ fakt nieapłatnaj pracy, jakuju jaho žonka vykonvaje pa domu, ale paličyŭ patrebnym abmierkavać heta z žonkaj, sumiesna prydumać rašeńnie i jaho ažyćciavić. A potym jašče i padzialiŭsia i napisaŭ pra heta.

Nichto nikomu ničoha nie pavinien: ni muž žoncy, ni žonka mužu. Pamiž dvuma darosłymi ludźmi naohuł usio pavinna adbyvacca pa ŭśviadomlenaj i ŭhołas pramoŭlenaj zhodzie.

Praca pa domu — heta taksama praca, na jakuju tracicca niamała času. I toje, što hety ŭniosak u zabieśpiačeńnie siamji nie pryniata apłačvać, nie aznačaje, što jon biaspłatny.

• 18
• 3
• 5
• 1
• 8