Паехаць у Грузію ці ажаніцца анлайн. Расказваем, як беларусам пабрацца шлюбам за мяжой (і нават без даведкі з краіны)

Не маеце даведкі з Радзімы? Тады шлях да шлюбу ўскладніцца

І ў Польшчы, і ў Літве першапачатковы набор дакументаў для шлюбу падобны. Пра тое, якія паперы для гэтага рыхтаваць у Літве, «Нашай Ніве» расказала Іяланта Кузьмене, загадчыца Віленскага ЗАГСа: «Каб зарэгістраваць у нас шлюб, трэба прыйсці да нас з арыгіналамі пашпартоў і прынесці даведку, што няма перашкодаў для заключэння шлюбу.

Выдадзеная ў Беларусі даведка павінна быць з апастылем і перакладам на літоўскую мову. Калі для чалавека гэта будзе не першы шлюб, павінны быць дакумент аб разводзе з апастылем і перакладам на літоўскую. Калі ж людзі не могуць падаць даведку аб тым, што няма перашкодаў для заключэння шлюбу, ён не можа быць зарэгістраваны».

Што да Польшчы, у тамтэйшых ЗАГСах ад вас, акрамя пашпарта, папросяць паказаць пасведчанне аб нараджэнні з апастылем і перакладам на польскую мову. Калі гэта першы шлюб, больш дакументаў і не трэба. Калі ж вы ў разводзе, рыхтуйце адпаведны дакумент — і так, усё гэта трэба перакласці на мову краіны пражывання і апастыляваць.

Але ёсць важны нюанс.

У абедзвюх краінах беларусам, каб пабрацца шлюбам, патрэбная даведка пра адсутнасць перашкодаў для шлюбу за мяжой — прасцей кажучы, пра тое, што вы не жанатыя ў Беларусі.

Раней яе можна было атрымаць у любым консульстве, але пасля ўказа №278 за такой даведкай прыйдзецца ехаць дахаты — або перадаваць камусьці даверанасць, зробленую ў Беларусі, каб гэты чалавек узяў для вас адпаведную даведку.

Не можаце вяртацца ў Беларусь? Калі вы ў Літве і атрымалі статус уцекача, можна ажаніцца і без даведкі з Беларусі. Менавіта так пабраліся шлюбам былы палітвязень Зміцер Фурманаў і яго дзяўчына Вольга Каракіна.

Зміцер апісаў для нас гэтую працэдуру: «Спачатку мы падаліся на ўцякацтва. Калі атрымалі сталы дазвол на жыхарства з карткамі, пайшлі ў віленскі ЗАГС. Тамака напісалі заяву, аплацілі 20 еўра і пачалі чакаць назначаны дзень. На вяселлі з намі былі сведкі з беларускімі пашпартамі».

Пра тое, як абысціся без запаветнай даведкі ў Польшчы, нам расказала Вольга Дабравольская, кіраўніца аддзела прававой дапамогі Цэнтра беларускай салідарнасці. Паводле яе, у стандартнай сітуацыі, калі беларусы могуць паехаць на Радзіму, трэба ўзяць у ЗАГСе даведку пра тое, што ты не знаходзішся ў шлюбе ў Беларусі, або даць зробленую ў Беларусі даверанасць іншаму чалавеку, каб ён узяў гэтую даведку за вас. Потым з гэтай даведкай трэба звярнуцца ў амбасаду Беларусі, каб там выдалі пасведчанне пра тое, што ў вас на падставе беларускага заканадаўства няма перашкодаў для заключэння шлюбу.

Калі чалавек не можа атрымаць такую даведку ў ЗАГСе, ён не атрымае і адпаведнае пасведчанне ў амбасадзе, тлумачыць Вольга: «Беларусы, якія апынуліся ў такой сітуацыі, могуць звярнуцца ў раённы суд па месцы жыхарства ў Польшчы і папрасіць, каб суд звольніў іх ад прадастаўлення гэтай даведкі. Трэба будзе абгрунтаваць, чаму вы не можаце пайсці ў амбасаду ці паехаць у Беларусь — напрыклад, таму што вы баіцеся рэпрэсій ці пераследу.

Беларусы, якія звяртаюцца з запытам аб наданні міжнароднай аховы (дадатковай аховы ці статусу ўцекача), могуць аргументаваць гэтым у судзе немагчымасць атрымання даведкі. Пакуль што проста гуманітарная віза ці часовы дазвол на жыхарства на яе падставе не даюць аргументаванай падставы на тое, каб ажаніцца без даведкі — і па візе, і па ДНЖ можна выязджаць у Беларусь. Таму трэба будзе дадаткова патлумачыць, чаму вы не можаце звярнуцца ў амбасаду ці паехаць у Беларусь, каб атрымаць неабходныя дакументы».

Такая заява ў суд, расказвае юрыстка, мае быць напісаная па-польску, да яе трэба прыкласці дакументы, якія пацвярджаюць гэтую заяву: напрыклад, рашэнне аб наданні статусу ўцекача ці дадатковай аховы, таксама трэба дадаць пасведчанне аб нараджэнні. Калі ў вас няма пасведчання аб нараджэнні і вы не можаце яго прывезці, можна звярнуцца ў суд, каб вас вызвалілі ад неабходнасці прадастаўляць абодва дакументы для заключэння шлюбу.

Юрыстка папярэджвае, што судовая працэдура можа зацягнуцца. Напрыклад, у Варшаве можна чакаць рашэння па вашай справе да шасці месяцаў.

Але ёсць і іншыя варыянты.

Вяселле ў Грузіі — рамантычна і проста

Выглядае, што ў гэтай сітуацыі лайфхакам для беларусаў можа стаць цырымонія ў Грузіі. «Нашай Ніве» напісалі дзясяткі чытачоў, якія менавіта так пабраліся шлюбам. Плюсоў шмат: адносна простая арганізацыя, магчымасць зладзіць вяселле ў рамантычным высакагорным рэгіёне, параўнальна невысокія цэны.

Вось вытрымкі з гісторый нашых чытачоў:

«…Усё, што спатрэбілася — гэта зрабіць натарыяльны пераклад нашых пашпартоў і знайсці двух сведкаў. Потым мы ўдваіх пайшлі ў Дом юстыцыі [ў Тбілісі] з пашпартамі ўсіх 4 чалавек (мы і сведкі) і перакладамі нашых пашпартоў. Чарга на прыём заняла ў нас каля 10 хвілін. Далей у акенцы нас унеслі ў базу і сказалі пачакаць, пакуль будзе гатова пацвярджэнне. У цэлым яно робіцца некалькі гадзін і зарэгістраваць шлюб можна нават у той жа дзень. Мы прыйшлі на наступны [дзень] са сведкамі, падпісалі паперы, і нас аформілі за лічаныя хвіліны. Далей мы прыкладна палову гадзіны ўтрасалі пытанні з апастылем, які могуць зрабіць проста там за асобную плату. Супрацоўнікі ў цэлым ветлівыя. Усё было вельмі проста і хутка».

«Якраз шмат людзей з Літвы ды Польшчы прыязджаюць менавіта ў Грузію, каб тут распісацца і легалізаваць шлюб, а потым вяртаюцца ў свае краіны і кажуць, што з пасведчаннямі грузінскага ўзору прасцей вырашаць «сямейную бюракратыю» ў сваіх краінах».

Аднак нават у самыя шчаслівыя хвіліны не варта губляць асцярожнасць:

«Горад Поці. Усё было зроблена за 2 дні, сама працэдура заняла 10 хвілін. Але нас падманулі на 50$ у натарыяльным агенцтве (менавіта памочніца натарыуса). І, вядома, памыліліся ў напісанні прозвішча. Таму натарыяльны пераклад быў зроблены з дзвюма памылкамі, што ў выніку дало правільны вынік».

«Заключалі шлюб у Грузіі вясной гэтага года. Ніякіх асаблівых дакументаў не трэба — толькі натарыяльна завераныя пераклады пашпартоў на грузінскую мову (сваіх і 2 сведкаў). Сведкам можа быць хто заўгодна, у нас гэта былі нашы сябры з Беларусі, якія жывуць у Тбілісі. Пераклады каштуюць не вельмі дорага — штосьці кшталту 50-60 лары (~20$) за 1 пашпарт. 

Праўда, калі мы прыехалі на рэгістрацыю, аказалася, што ў перакладах ёсць пара дробных памылак, таму там жа ў натарыяльнай канторы за 15 хвілін іх выправілі. Пасля чаго наш шлюб паспяхова зарэгістравалі, праз пару гадзін аддалі пасведчанне. Стаўленне чыноўнікаў вельмі зычлівае — нас павіншавалі і пажадалі ўсяго найлепшага, але мне здаецца, у Грузіі іншае ўвогуле рэдка сустракаецца. Наколькі я ведаю, рэгістрацыя шлюбу ў Грузіі — адзін з самых простых варыянтаў, калі вы не можаце паехаць у Беларусь».

Павялічыць

Дасведчаныя чытачы нават расказваюць, дзе ў Грузіі лепш зладзіць цырымонію, а якіх лакацый варта пазбягаць. Вось як гэта апісвае чытач Максім:

«Найпрасцейшае месца, дзе можна ўзяць шлюб у Грузіі, — гэта так званы Дом юстыцыі ў цэнтры Тбілісі. Але, шчыра кажучы, гэтае месца не вельмі рамантычнае, хаця там і можна ажаніцца вельмі хутка. Але гэта вялікі адміністрацыйны будынак з рознымі бюракратамі, электроннымі чэргамі і гэтак далей. Там у адным месцы можна зрабіць абсалютна ўсё і нават знайсці сведкаў для вашага шлюбу».

Замест гэтага Максім з нявестай паехалі ў мястэчка Сігнахі, што знаходзіцца на захадзе Грузіі. Беларус апісвае яго як вельмі маляўнічае, вакол яго — горы. Там і прайшла цырымонія. За яе пара заплаціла каля 70 лары — прыкладна 25-30 даляраў.

Павялічыць

Яшчэ адзін варыянт — ажаніцца анлайн

Яшчэ адзін варыянт — ажаніцца анлайн, каб ваш шлюб быў зарэгістраваны на тэрыторыі ЗША. У інтэрнэце нямала сайтаў, якія прадастаўляюць гэтую паслугу, і адным з іх скарыстаўся сын аднаго з чытачоў «Нашай Нівы». Мужчына зарэгістраваў шлюб на тэрыторыі амерыканскага штата Мэн, а сама цырымонія прайшла праз Zoom. Акрамя жаніха і нявесты, на ёй могуць «прысутнічаць» і родныя ды блізкія.

За рэгістрацыю шлюбу такім чынам давядзецца заплаціць недзе 200—300 даляраў. Вы атрымаеце па пошце адпаведны сертыфікат, з якім можна будзе легалізаваць шлюб у краіне пражывання. Адзіная праблема — скасаваць такі шлюб анлайн нельга, разводзіцца, калі што, давядзецца ехаць у ЗША.

«Кожны эмігрант пражывае сацыяльную смерць». Як захаваць адносіны ў вымушанай эміграцыі?

«Можна сказаць, дзяцінства не было». Сямейная пара ўдваіх пабудавала дом, жыве там у шчасці ўжо 62 гады і ганяе на матацыкле

«Пачуццю гумару і прыгажосці дзіцяці будуць зайздросціць вашы сяброўкі і чужыя дзеці». Як я шукала донара, каб зацяжарыць

• 7
• 0
• 1
• 1
• 2
• 1
• 3
• 0