Kamitet siejma Litvy pa biaśpiecy vykazaŭsia suprać pavieličeńnia dla biełarusaŭ terminu dziejańnia humanitarnych DNŽ

Kamitet litoŭskaha parłamienta siejma pa nacyjanalnaj biaśpiecy i abaronie rekamiendavaŭ adchilić prapanovu ministra ŭnutranych spraŭ Ahne Biłatajcie ab pavieličeńni dla zamiežnikaŭ terminu dziejańnia dazvołu na žycharstva (DNŽ) z adnaho da troch hadoŭ, piša «Pozirk».

Svaju papraŭku ŭ zakon «Ab pravavym statusie zamiežnikaŭ» Biłatajcie arhumientavała tym, što DNŽ vydajecca ŭ asnoŭnym hramadzianam Biełarusi, jakija biahuć ad režymu. Pry hetym situacyja ŭ krainie praciahły čas nie mianiajecca, tamu jany nie mohuć viarnucca na radzimu paśla zakančeńnia hoda i vymušany padavać novuju zajaŭku na pradaŭžeńnie DNŽ. Na dumku ministra, pavieličeńnie terminu dziejańnia hetaha dakumienta dazvoliła b paźbiehnuć niazručnaściej, vyklikanych nieabchodnaściu časta jaho mianiać, a departamient mihracyi pry MUS sekanomiŭ by administracyjny resurs na apracoŭku zajaŭ.

Biłatajcie prapanavała vydavać DNŽ na try hady tolki inšaziemcam, jakich pieraśleduje niedemakratyčny režym, paciarpieli albo mohuć paciarpieć ad represij, «kali ich (inšaziemcaŭ. — «Pozirk») prybyćcio ŭ Litoŭskuju Respubliku ažyćciaŭlałasia pry pasiarednictvie Ministerstva zamiežnych spraŭ». Akramia taho, pavieličeńnie terminu dziejańnia DNŽ, jak ličyć kiraŭnik MUS, «vyrašyła b prablemu, źviazanuju z vydačaj dziejnaha prajaznoha dakumienta inšaziemcam hetaj katehoryi, kali jany z abjektyŭnych pryčyn nie mohuć atrymać prajazny dakumient, vydadzieny ŭ krainie pachodžańnia» (majecca na ŭvazie pašpart, jaki niemahčyma pamianiać u biełaruskich dyppradstaŭnictvach paśla ŭstupleńnia ŭ siłu 7 vieraśnia ŭkaza Alaksandra Łukašenki № 278), i padajuć zajavy na atrymańnie «pašparta zamiežnaj asoby», jaki dziejničaje taki ž termin, kolki i DNŽ.

Adnak, na dumku parłamienckaha kamiteta, «va ŭmovach dynamičnaha pavieličeńnia kolkaści biełaruskich hramadzian u Litvie, paralelnych dyskusij u hramadstvie i siejmie nakont uzmacnieńnia dla ich žorstkaści nacyjanalnych abmiežavalnych mier prapanova ab libieralizacyi prava na pražyvańnie ŭ Litvie z humanitarnych mierkavańniaŭ nosić paśpiešny charaktar i moža stvaryć niehatyŭnyja precedenty ŭ budučyni».

Jak ličać deputaty, nieabchodna aceńvać hetuju prapanovu sistemna — «u kantekście novaha biełaruskaha pašparta («pašpart novaj Biełarusi», jaki raspracoŭvaje Ofis Śviatłany Cichanoŭskaj), prajaŭ lićvinizmu i h.d.».

Suprać inicyjatyvy Biłatajcie prahałasavali čatyry siabry kamiteta, za — dva, jašče dvoje, u tym liku jaho kiraŭnik Łaŭrynas Kaščunas, ustrymalisia.

Čarhovaje plenarnaje pasiadžeńnie siejma projdzie 31 kastryčnika. Na paradku dnia pytańnia ab DNŽ dla zamiežnikaŭ niama.

24 kastryčnika ŭ Vilni na kanfierencyi «Biełaruś i biełarusy, 2020+: aceńvajučy pierśpiektyvy i vykliki demakratyčnaj budučyni krainy» Cichanoŭskaja zajaviła, što pytańnie pradaŭžeńnia terminu dziejańnia DNŽ dla biełarusaŭ u Litvie z hoda da troch «amal vyrašanaje».

19 žniŭnia Łaŭrynas Kaščunas zaklikaŭ biełaruskija demakratyčnyja siły zaniepakoicca prajavami «lićvinizmu» z boku ich suajčyńnikaŭ. Imavierna, jon mieŭ na ŭvazie bolš častyja publikacyi ŭ sacsietkach, u asnoŭnym ananimnych karystalnikaŭ, u jakich spadčyna Vialikaha Kniastva Litoŭskaha nazyvajecca vyklučna biełaruskaj i zajaŭlajecca histaryčnaje prava Biełarusi na častku terytoryi ciapierašniaj Litvy.

24 žniŭnia Departamient dziaržaŭnaj biaśpieki Litvy paviedamiŭ, što «dziejnaść prychilnikaŭ ideałohii «lićvinizmu» ciapier nie ŭjaŭlaje realnaj pahrozy suvierenitetu, kanstytucyjnamu ładu i terytaryjalnaj cełasnaści Litoŭskaj Respubliki», adnak «ideałahičnyja ŭstanoŭki, što imi raspaŭsiudžvajucca, mohuć uzmacnić mižetničnuju napružanaść u dziaržavie i vyklikać niehatyŭnaje staŭleńnie da łajalnaj da dziaržavy častki biełaruskaj supolnaści ŭ Litvie».

• 3
• 2
• 0
• 2
• 6