Paštovuju marku z kurjoznaj pamyłkaj pradali z aŭkcyjonu za 2 miljony dalaraŭ
Marku kupiŭ viadomy kalekcyjanier Čarlz Chek. Jon užo byŭ uładalnikam dźviuch «pierakulenych Dženi». Pieršuju jon kupiŭ u samym pačatku stahodździa za 300 tysiač dalaraŭ. Druhuju — u 2007 hodzie amal za miljon.
Na aŭkcyjonie ŭ Ńju-Jorku na minułym tydni byŭ pastaŭleny novy rekord: paštovaja marka «pierakulenaja Dženi» była pradadziena za dva miljony dalaraŭ, piša Bi-bi-si
Heta nie rekord dla suśvietnaj fiłatelii naohuł — samaja darahaja marka, British Guiana, była pradadzienaja dzieviać hadoŭ tamu za 9,5 młn dalaraŭ — ale heta rekord dla marki, vypuščanaj u ZŠA.
Znakamitaja «pierakulenaja Dženi» była vypuščanaja ŭ 1918 hodzie, i naminalny jaje košt składaŭ 24 centy. Unikalnaść hetaj marki ŭ tym, što na joj paštovy samalot Curtiss JN-4, jaki prazvali «Dženi», pamyłkova nadrukavany dahary nahami.
Rabotniki pošty, naturalna, chutka zaŭvažyli pamyłku, ale list pamieram 100 asobnikaŭ usio ž paśpieŭ syści ŭ abarot — i voś za pakinutyja z hetych sta asobnikaŭ kalekcyjaniery-fiłatelisty i hatovyja vykłaści hihanckija hrošy.
Dva miljony dalaraŭ za marku na aŭkcyjonie Robert A Siegel Auction Galleries zapłaciŭ viadomy kalekcyjanier, 76-hadovy Čarlz Chek.
Chek užo byŭ uładalnikam dźviuch «pierakulenych Dženi». Pieršuju jon kupiŭ u samym pačatku stahodździa prykładna za 300 tysiač dalaraŭ. Druhuju — u 2007 hodzie amal za miljon.
Hetuju apošniuju, jakaja abyšłasia Cheku ŭ dva miljony, fiłatelisty doŭha nie mahli nabyć. Staronnija vočy nie bačyli jaje cełaje stahodździe z momantu vypusku, bo ŭładalnik i zatym jaho spadkajemcy zachoŭvali jaje ŭ bankaŭskim siejfie — cana hetaj unikalnaj marki ŭźlacieła ŭvierch adrazu ž paśla vypusku.
Ale ŭ 2018 hodzie jaje, narešcie, upieršyniu pradali z aŭkcyjonu.
Z-za taho, što hety asobnik — numar 49 sa sta — za 105 hadoŭ praktyčna nie byvaŭ na śviatle, jon zachavaŭsia našmat lepš za inšyja. «Kolery nasyčany, a papiera — śvietłaja», — było paznačana ŭ apisańni marki, vystaŭlenaj na tarhi.
Čarlz Chek skazaŭ u intervju haziecie Washington Post, što maje namier i dalej bierahčy kaštoŭnuju marku ad śviatła.
Byłoha sienatara i dyrektara najbujniejšaha ŭ Biełarusi vytvorcy budmateryjałaŭ sudziać za razhałošvańnie słužbovaj tajny2
Kamientary