«Zrazumieŭ, da čaho ŭsio idzie». Stała viadoma, čym ciapier zajmajecca zasnavalnik «Darydy» Uładzimir Dzialendzik
Spartyŭnaje vydańnie «Trybuna» ŭspomniła, što ŭžo 15 hadoŭ u biełaruskim futbole niama kłuba «Daryda», jaki ŭ svoj čas byŭ davoli jaskravaj źjavaj u ajčynnym sporcie. A ŭspaminajučy pra kłub, zacikaviłasia i tym, čym ciapier zajmajecca jahony kolišni stvaralnik: stvaralnik kampanii «Daryda» Uładzimir Dzialendzik.
«Trybuna» nahadvaje, što ŭ 2010-ja hady biznesmien byŭ pastajannym pradstaŭnikom top-200 samych paśpiachovych pradprymalnikaŭ Biełarusi, i jahonyja pazicyi tolki ŭmacoŭvalisia.
Ale ŭ kancy 2018 hoda na žyćcio i dziejnaść Dzialendzika akazała vialiki ŭpłyŭ DTZ sa śmiarotnym zychodam. Tady biznesmien za rulom «Jahuara» na skryžavańni vulic Arłoŭskaj i Navavilenskaj u Minsku sutyknuŭsia z «Falksvahienam», u vyniku čaho zahinuła 69-hadovaja pasažyrka hetaha aŭtamabila, a jejnaja dačka, jakaja była za styrnom, trapiła ŭ lakarniu. Dzialendzika tady pryznali vinavatym u avaryi, jamu pahražała da piaci hadoŭ za kratami. Ale ŭletku 2019-ha 67-hadovaha biznesmiena vyzvalili ad adkaznaści, padvioŭšy pad amnistyju.
U 2020 hodzie Dzialendzik niekalki razoŭ vykazvaŭsia na hramadska značnyja temy: vystupaŭ suprać abjadnańnia z Rasijaj, abvinavačvaŭ u biaździejnaści i bieskarysnaści BRSM i «Biełuju Ruś», havaryŭ, što na miescy Łukašenki vypuściŭ by Viktara Babaryku z turmy, choć pry hetym i nie vystupaŭ suprać jaho adkryta.
Paśla žnivieńskich vybaraŭ 2020 hoda Dzialendzik źnik z publičnaj prastory. Navat jahonaja da taho dastatkova aktyŭnaja staronka ŭ Facebook zamierła — apošni post datavany 27 śniežnia 2020-ha.
Jak udałosia vyśvietlić «Trybunie», biznesmien pakinuŭ Biełaruś. Jak kažuć jaje surazmoŭcy, «Dzialendzik zrazumieŭ, da čaho ŭsio idzie, jak budzie raźvivacca śfiera biznesu paśla ŭsich paślavybarčych padziejaŭ, i pryniaŭ rašeńnie zjechać».
Pa źviestkach «Trybuny», biznesmien ciapier žyvie ŭ Ispanii, dzie da hetaha ŭžo pasialiłasia jahonaja dačka Natalla.
Taksama, jak udałosia daviedacca, Dzialendzik pa-raniejšamu pa dakumientach zjaŭlajecca adnym z zasnavalnikaŭ pradpryjemstva «Daryda», majučy peŭnuju dolu ŭ im, što dazvalaje biaźbiedna žyć na Pireniejach i ničym nie zajmacca, majučy štomiesiačny pasiŭny dachod. Aficyjna pasadu hiendyrektara Dzialendzik pakinuŭ daŭno — jašče ŭ 2016-m.
Taksama nibyta Dzialendzik pieravioz u Ispaniju i svaju abrańnicu (nieviadoma, ci aformleny ich adnosiny aficyjna). Havorka pra dačku futbolnaha treniera Uładzimira Pihuleŭskaha Volhu. Sam Pihuleŭski pamior u kancy 2020-ha va ŭzroście 71 hoda, a datul šmat hadoŭ kiravaŭ RCAR pa futbole BDU, na bazie jakoha isnuje kłub «Enierhietyk-BDU».
Jak raskazali «Trybunie» surazmoŭcy sa śvietu futboła, jašče ŭ 2006-2007 hadach «Daryda» finansava dapamahała kłubu «Zorka-BDU» vystupać u druhim dyvizijonie, a dačka Pihuleŭskaha časta supravadžała Dzialendzika ŭ jaho kamandziroŭkach. Z časam para pačała žyć razam, što i praciahvaje rabić.
Biełaruskija 1990-ja: zhadvajem hierojaŭ epochi
«Heta byŭ čas mahčymaściaŭ». Jak raźvivaŭsia biełaruski biznes u 90-ja
Biznesoviec Uładzimir Dzialendzik: Ja b likvidavaŭ «Biełuju Ruś» i BRSM. A dziejańni AMAPa dapamahajuć ludziam nienavidzieć uładu
Salihorcy abvinavacili Dzialendzika ŭ «rejdarskim zachopie» ich biznesu. Dzialendzik: Chaj addajuć mnie 11 miljonaŭ jeŭra!
Kamientary