Jakija filmy pieramahli na kinafiestyvali «Paŭnočnaje źziańnie» i jaki staŭ samym papularnym
Arhanizatary 9-ha kinafiestyvala «Paŭnočnaje źziańnie» ahučyli vyniki.
Kolki ludziej hladzieli filmy festu?
Druhi hod zapar kinafest demanstravaŭ bolšuju častku svajoj prahramy online biaspłatna. Kab pahladzieć filmy, na płatformie zarehistravałasia 2989 novych hledačoŭ. A ahulnaja kolkaść karystalnikaŭ płatformy kinafestu skłała 4774!
Ahułam sioleta na płatformie kinafestu zafiksavali 18 435 prahladaŭ filmaŭ i iventaŭ «Źziańnia». Hetaja ličba ŭ dva razy pieravyšaje pakazčyki minułaha hoda.
Chto pieramoh u Mižnarodnym konkursie debiutaŭ «Paŭnočnaha źziańnia — 2023»?
Mižnarodnaje žury, u składzie jakoha litoŭski režysior Vitaŭtas Pujdokas, biełaruskaja režysiorka Hanna Saŭčanka i šviedski režysior Viktar Nordenšeld, — ahladała filmy ź Mižnarodnaha konkursu debiutaŭ. Jany vybrali pieramožcam u konkursie debiutaŭ dakumientalnuju karcinu «Apałonija, Apałonija» režysiorki Lea Hłob.
«Ščyraje daśledavańnie padarožžaŭ mastački Apałonii i samoj režysiorki. Niahledziačy na zusim roznyja žyćciovyja vykliki, žančyny znachodziać parazumieńnie ŭ svaim imknieńni pieradać rečaisnaść praz vyjavy. Film vychodzić za ramki typovaha partreta mastaka — śviedčańnie hłybokaha ŭpłyvu, jaki moža akazać zdymka čužoj historyi na režysiora, mocnaj suviazi pamiž apoviedam i asabistaj transfarmacyjaj», — kamientujuć svoj vybar u žury.
Žury taksama adznačyła śpiecyjalnymi zhadkami dva filmy: «Apošniaja viasna» Franciški Eliasien i «Hory» Kryścijana Ajnschoja.
Jaki film pieramoh u Biełaruskim konkursie «Paŭnočnaje źziańnie — 2023»?
Na praciahu kinafiestyvalu filmy Biełaruskaha konkursu ahladała asobnaje mižnarodnaje žury, u składzie jakoha ŭkrainskaja pradziusarka Darja Basel, biełaruski režysior Alaksiej Pałujan i dyrektar Jeŭrapiejskaha kinarynku Denis Ruch. Jany prysudzili Hran-pry Biełaruskaha konkursu filmu «Radzima» režysioraŭ Alaksandra Michałkoviča i Hanny Badziaki.
«Niahledziačy na toje, što apovied nie vyklikaje aptymizmu, samo isnavańnie hetaha talenavitaha filma, jaki ŭbačyli hledačy pa ŭsim śviecie, daje nadzieju na toje, što zahannaje koła traŭm i sankcyjanavanaha dziaržavaj hvałtu ŭrešcie budzie razarvanaje sa źjaŭleńniem novaha pakaleńnia vyzvalenych biełarusaŭ», — abhruntavała svoj vybar žury.
Śpiecyjalnym pryzam uznaharodžany film Andreja Kašpierskaha «Pieratrymka».
Taksama žury adznačyła śpiecyjalnaj zhadkaj karcinu Maksima Bujnickaha «Dziońnik Anastasii».
Upieršyniu na «Paŭnočnym źziańni» filmy-pieramožcy Biełaruskaha konkursu atrymajuć hrašovyja pryzy. Pryzavaja padtrymka dadziena telekanałam «Nastojaŝieje vriemia» i składaje 1200$ dla filma, jaki zavajavaŭ hran-pry, i 800$ stužcy, jakoj siabry žury prysudzili śpiecyjalny pryz.
Ź jakich krain čaściej za ŭsio biełarusy hladzieli filmy festu?
Sioleta bolš za ŭsio ludziej hladzieli fiestyvalnyja stužki «Źziańnia» na terytoryi Biełarusi. U top krain taksama ŭvajšli Polšča, Litva, Hiermanija, Hruzija, Francyja.
Jaki samy papularny film?
Samym papularnym filmam pa kolkaści prahladaŭ na płatformie kinafestu staŭ «KUŁ (Naviny ź Biełarusi)», jaki składajecca z navełaŭ roznych režysioraŭ, zasnavanych na biełaruskich navinach. Jaho hladzieli 1154 razoŭ.
«Łukašenka pieršym adčuje katastrofu Pucina» — Śviatłana Aleksijevič u vialikaj hutarcy TOK13
Kamientary