Aleksijevič: Z kvatery ŭdałosia vynieści Nobieleŭski miedal, ale zastalisia rukapisy i dziońniki
Piśmieńnicy Śviatłanie Aleksijevič pahražajuć adabrać jaje kvateru, nabytuju na hrošy z Nobieleŭskaj premii. DW pryhadvaje, pra što sama Aleksijevič niadaŭna raspaviała niamieckaj haziecie Die Zeit.
Paśla atrymańnia Nobieleŭskaj premii pa litaratury Śviatłana Aleksijevič kupiła kvateru ŭ tak zvanym «domie Čyža» la Trajeckaha pradmieścia ŭ Minsku. Da hetaha jana žyła ŭ susiednim domie ź vidam na Śvisłač, ź jakoha, pa słovach piśmieńnicy, jaje vysielili knihi: miesca dla ich stała zanadta mała.
«Ciapier prapahandysty kažuć, što hetaja kvatera idealna padyšła b dla siamiejnaha supracoŭnika AMAPu. Łukašenka pahražaje adpomścić usim, chto tady ŭdzielničaŭ u revalucyi», — skazała ŭ intervju Aleksijevič.
Pa słovach piśmieńnicy, mnohija jaje siabry zjechali, i toje, z čaho składaŭsia jaje śviet, źnikła. Sama piśmieńnica zjechała ź Biełarusi vosieńniu 2020 hoda, z tych časoŭ jana žyvie ŭ Bierlinie.
«Ciapier ja b skazała: moj dom znachodzicca nidzie. Tamu što ja dahetul nie mahu źmirycca z dumkaj, što zjechała nazaŭždy. Ja chaču viarnucca, ale niama miesca, kudy ja mahła b viarnucca», — kazała jana.
U minskaj kvatery Aleksijevič zastalisia mnohija rukapisy i dziońniki, za jakija jana pieražyvaje bolš za ŭsio. Niadaŭna, pa słovach piśmieńnicy, z kvatery ŭdałosia vynieści Nobieleŭski miedal.
«Moj śviet składvaŭsia na praciahu mnohich hadoŭ, i ja kažu pra rečy, jakija majuć simvaličnaje značeńnie. I tut prychodziać hetyja žyvioły — ja nie mahu nazvać ich inakš — i rujnujuć hety śviet. Niekatory čas tamu jany źniščyli ŭsio ŭ kvatery adnaho navukoŭca i vyvalili tudy ceły hruzavik śmiećcia, fatahrafii čaho byli apublikavanyja. Ciažka ŭjavić, što adčuvaje čałaviek, kali bačyć, što zrabili ź jahonym śvietam», — tak Aleksijevič prakamientavała pahromy siłavikoŭ u kvaterach biełarusaŭ.
28 listapada pravaabaroncy paviedamili pra masavyja pieratrusy ŭ Minsku pa «spravie Kaardynacyjnaj rady», u prezidyum jakoj u 2020 hodzie ŭvachodziła Śviatłana Aleksijevič. Paśla hetaha siłaviki vypisali bolš za 100 ordaraŭ na aryšt majomaści tych, chto prachodzić pa hetaj spravie i znachodzicca nie ŭ Biełarusi.
Kamientary