Kiraŭnik niamieckaj raźviedki: Rasija moža napaści na krainy Bałtyi abo atakavać archipiełah Špicbierhien

«Rasija rychtujecca da vajny z Zachadam», — zajaviŭ kiraŭnik Fiederalnaj raźviedvalnaj słužby Hiermanii (BND) Bruna Kal, spasłaŭšysia na danyja raźviedki. Pa jaho słovach, jakija cytuje Berliner Zeitung, pra heta śviedčać šmatlikija faktary.

Pa-pieršaje, uzrovień vajskovych vydatkaŭ u Rasii šmatkroć pieravyšaje anałahičnyja vydatki na Zachadzie. Pa-druhoje, u krainie pravodzicca rearhanizacyja vajskovych akruh, a štohod u armiju nabirajuć sotni tysiač novych kantraktnikaŭ.

Pa-druhoje, padkreśliŭ Kal, rasijskija vojski nabyli značny bajavy vopyt u chodzie vajny va Ukrainie, a taksama ŭdaskanalili navyki prymianieńnia novych technałohij, uklučajučy drony, štučny intelekt i płaniernyja bomby staroha typu. Akramia taho, Rasija atrymała dośvied uździejańnia na zachodnija spadarožniki ŭ kosmasie.

Z 2022 hoda ŭ krainie nazirajecca ŭzmocnienaja militaryzacyja hramadstva. Heta prajaŭlajecca, naprykład, u nacyjanalistyčnych prahramach, jakija ŭkaraniajucca ŭ škołach i ŭniviersitetach.

Da kanca biahučaha dziesiacihodździa, na dumku Kala, Rasija moža dasiahnuć uzroŭniu, jaki dazvolić joj atakavać Zachad. Adnak, jak miarkuje kiraŭnik Fiederalnaj raźviedvalnaj słužby Hiermanii, pierad tym, jak pierajści da adkrytaha vajennaha kanfliktu, Maskva pasprabuje padarvać abaviazacielstvy sajuźnikaŭ pa NATA pa akazańni dapamohi, zamacavanyja ŭ artykule 5 damovy ab aljansie.

Jak patłumačyŭ Kal, Rasija choča dasiahnuć situacyi, pry jakoj, kali jana atakuje člena aljansa, inšyja dziaržavy-členy nie razhladali b heta jak napad na ŭvieś aljans. Tady Rasija dasiahnuła b svajoj mety: razvału NATA jak abaronnaha aljansu.

U jakaści mahčymych scenaraŭ pieršych dziejańniaŭ Rasii Kal nazvaŭ źjaŭleńnie niejkaj kolkaści «zialonych čałaviečkaŭ» u krainach Bałtyi pad markaj abarony rasiejskamoŭnaj mienšaści abo «nievialikuju karekciroŭku terytoryi» na archipiełahu Špicbierhien. Takija dziejańni, pavodle słoŭ kiraŭnika Fiederalnaj raźviedvalnaj słužby Hiermani, stanuć pravierkaj hatoŭnaści NATA i zdolnaści aljansu supraćstajać cisku Rasii.

Akramia hetaha, jak miarkuje Kal, Rasija budzie praciahvać vykarystoŭvać mietady «hibrydnaj vajny» dla ŭździejańnia na hramadskuju dumku i palityčnuju situacyju ŭ roznych krainach Jeŭropy, kab padarvać adzinstva aljansu jašče da pačatku bujnamaštabnaha kanfliktu.

Na dumku kiraŭnika Fiederalnaj raźviedvalnaj słužby Hiermani, Rasija zychodzić z dapuščeńnia, što Zachad, sutyknuŭšysia z mnostvam kryzisaŭ, budzie adčuvać ciažkaści ŭ pošuku ŭzhodnienych adkazaŭ.

Ekśpierty BND taksama miarkujuć, što ŭ rasijskim Ministerstvie abarony isnujuć sumnievy adnosna taho, nakolki nadziejnyja abaviazacielstvy NATA pa kalektyŭnaj abaronie i pašyranaj sistemie strymlivańnia ZŠA ŭ vypadku pahrozy Jeŭropie.

«Na hety momant niama kankretnych danych pra vajennyja namiery Rasii, — udakładniŭ Kal, — adnak, kali padobnyja pohlady pačnuć pieravažać u maskoŭskich kiroŭnych kołach, ryzyka vajennaha sutyknieńnia ŭ bližejšyja hady istotna ŭzraście».

U hetym kantekście Kal papiaredziŭ: «Aktyvizacyja Rasijaj hibrydnych dziejańniaŭ pavialičvaje ryzyku taho, što NATA ŭrešcie razhledzić mahčymaść prymianieńnia svajho artykuła 5 ab uzajemnaj abaronie».

Na zaŭvahu, što Rasija sutykajecca z ekanamičnymi prablemami, masavym adtokam nasielnictva, a za dva hady nie zdoleła navat zachapić terytoryi Ukrainy, jakija chacieła zabrać, Kal adkazaŭ, što hałoŭnaja zadača ciapier — strymlivańnie.

«Razmova idzie pra dalejšaje strymlivańnie, kab rasijskija siły zastavalisia źviazanymi va Ukrainie jak maha daŭžej. Kali my ciapier paddamosia mocnamu žadańniu [ŭstanavić] mir [luboj canoj, navat kali jon vyhadny dla Maskvy], Rasija zmoža pradoŭžyć naroščvać uzbrajeńnie, i tady Pucin dabjecca pieramohi», — padkreśliŭ kiraŭnik Fiederalnaj raźviedvalnaj słužby Hiermanii.

• 29
• 1
• 2
• 2
• 1
• 1
• 3
• 0