Nacyjanalnaja asambleja Respubliki Kareja ŭchvaliła zakon ab zabaronie raźviadzieńnia sabak na miasa, ich zaboju i prodažu sabačaha miasa, paviedamlaje miascovaje ahienctva «Renchap». Za hetuju zabaronu prahałasavali 208 deputataŭ, dvoje ŭstrymalisia, hałasoŭ suprać nie było.
Miarkujecca, što zakon całkam ustupić u siłu ŭ 2027 hodzie paśla trochhadovaha pierachodnaha pieryjadu. Parušalnikam usich zabaronaŭ, jakija ŭvodziacca, budzie pahražać štraf u pamiery da 30 młn von (22 768 dalaraŭ) ci dva-try hady źniavoleńnia. Ale samo pa sabie ŭžyvańnie miasa sabak u ježu karacca zakonam nie budzie.
Tym, chto prafiesijna zajmaŭsia raźviadzieńniem sabak na miasa, zakon abiacaje dapamohu ŭ pieraaryjentacyi biznesu, padtrymcy pracoŭnych miescaŭ i subsidyi. Usie takija kampanii pavinny buduć pradstavić miascovym čynoŭnikam płan pa pierachodzie na inšyja krynicy dachodu, kali płanujuć praciahnuć pracu.
Pavodle danych urada, u krainie dziejničaje kala 1150 fiermaŭ pa hadoŭli sabak, 34 bojni, 219 kampanij-raspaŭsiudžvalnikaŭ sabačaha miasa i prykładna 1600 restaranaŭ, u mieniu jakich takoje miasa jość.
Zakonaprajekt pryniaty pry padtrymcy jak kiroŭnaj partyi «Siła naroda», tak i hałoŭnaj apazicyjnaj — Demakratyčnaj partyi, adznačaje ahienctva.
Zabarona ŭžyvańnia miasa sabak u ježu była adnym ź pieradvybarnych abiacańniaŭ ciapierašniaha prezidenta Jun Sok Jola, i za hetuju zabaronu adkryta vystupała pieršaja łedzi Kim Kon Chi, nahadvaje ahienctva «Renchap», adznačajučy, što ŭ prezidenta z žonkaj čatyry sabaki i try katy.
U apošnija dziesiacihodździ sabačaje miasa ŭ Paŭdniovaj Karei hublaje papularnaść, asabliva siarod moładzi, na fonie aktyvizacyi zoaabarončych arhanizacyj.
Apytańni śviedčać, što ŭsio bolš hramadzian vystupajuć za zabaronu hetaj tradycyi, choć pa-raniejšamu 20-25% respandentaŭ vykazvajucca za jaje zachavańnie, navat kali sami sabačaje miasa nie jaduć. Tak, apytańnie instytuta Gallup, praviedzienaje ŭ 2023 hodzie, zaśviedčyła, što za apošnija 12 miesiacaŭ sabačaje miasa jeli tolki 8% karejcaŭ, u 2015 hodzie takich było 27%.
Kamientary