U baraćbie za inicyjatyvu ŭ vajnie Załužny robić staŭku na bieśpiłotniki

U artykule, apublikavanym na aficyjnym sajcie Uzbrojenych sił Ukrainy, Valeryj Załužny adznačaje, što va ŭsie časy stratehija pieramohi składałasia ŭ źniščeńni praciŭnika i zachopie ci vyzvaleńni terytoryi. Pry hetym formy i sposaby, jakimi heta dasiahałasia, naŭprost zaležali ad uzroŭniu raźvićcia ŭzbrajeńnia i vajennaj techniki.

Hałoŭnakamandujučy adznačaje, što raźvićcio ŭzbrajeńnia i vajennaj techniki, asabliva bieśpiłotnych sistem patrabujuć źmieny stratehii. Na jaho pohlad, bieśpiłotniki razam ź inšymi vidami ŭzbrajeńnia źjaŭlajucca ci nie adzinym instrumientam vychadu z pazicyjnaj vajny, jakaja nie vyhadnaja Ukrainie.

Jakija isnujuć pieraškody

Pry hetym u ciapierašniaj situacyi jość šerah faktaraŭ, jakija ŭpłyvajuć na pryniaćcie rašeńniaŭ pa pošuku novych formaŭ prymianieńnia siłaŭ abarony. Siarod ich:

• niestabilnaja palityčnaja situacyja vakoł Ukrainy, jakaja pryvodzić da skaračeńnia vajennaj padtrymki;
• vysokaja vierahodnaść pravakavańnia Rasijaj sieryi kanfliktaŭ na prykładzie Izraila i Jemiena, adciahnieńnie asnoŭnych partnioraŭ ad padtrymki Ukrainy;
• vyčarpańnie ŭ partnioraŭ zapasaŭ rakiet i bojeprypasaŭ dla artyleryi i SPA ŭ suviazi z vysokaj intensiŭnaściu bajavych dziejańniaŭ va Ukrainie i niemahčymaść ich chutka vyrabić na fonie suśvietnaha deficytu porachu;
• niedastatkovaja efiektyŭnaść sankcyjnaj palityki, što dazvalaje Rasii paśpiachova vieści pazicyjnuju vajnu na źniasileńnie;
• istotnaja pieravaha ŭ mabilizacyjnym resursie ŭ praciŭnika, niazdolnaść dziaržaŭnych instytucyj Ukrainy palepšyć kamplektavańnie Sił abarony biez užyćcia niepapularnych mier;
• niedaskanałaść narmatyŭna-pravavoj bazy, jakaja rehuluje VPK u Ukrainie;
• častkovaja manapalizacyja VPK, jakaja pryvodzić da ciažkaściaŭ u vytvorčaści ajčynnych bojeprypasaŭ;
• niavyznačanaść dalejšaha charaktaru ŭzbrojenaj baraćby takoha maštabu i, jak śledstva, składanaści dla sajuźnikaŭ u vyznačeńni pryjarytetaŭ padtrymki.

Pavialičyć

Što rabić

Valeryj Załužny ličyć, što asnoŭnym varyjantam atrymańnia pieravahi zjaŭlajecca zasvajeńnie ŭsiaho arsienału adnosna tannych, najnoŭšych i vielmi efiektyŭnych sposabaŭ, jakija chutka raźvivajucca. Pryčym asnoŭny ŭpor jon prapanoŭvaje zrabić na pavieličeńnie zdolnaściaŭ bieśpiłotnych i inšych technałahičnych sistem. Heta ŭ vyniku paŭpłyvaje i na strukturu Sił abarony Ukrainy.

Załužny adznačaje nieabchodnaść stvareńnia novaha dyzajnu apieracyj, jakija buduć hruntavacca pieravažna na stvareńni ŭmovaŭ i dasiahnieńnia adpaviednych efiektaŭ, jakija buduć sadziejničać realizacyi mety apieracyi. Mienavita stvareńnie nieabchodnych efiektaŭ karennym čynam pryvodzić da źmienaŭ u sistemie prymianieńnia srodkaŭ viadzieńnia vajny.

Sposabami stvareńnia nieabchodnych efiektaŭ, na pohlad Załužnaha, zjaŭlajucca asobnyja apieracyi pa stvareńni ličbavaha pola i kantroli nad radyjoelektronnaj abstanoŭkaj; kambinavanaje vykarystańnie ŭdarnych bieśpiłotnikaŭ i kibiersrodkaŭ; łahistyčnyja apieracyi.

Siarod apieracyj pa dasiahnieńni efiektaŭ hałoŭnakamandujučy nazyvaje apieracyi pa panižeńni ekanamičnaha patencyjału praciŭnika; pa jaho poŭnaj izalacyi i źniasileńni; rabatyzavanyja pošukova-ŭdarnyja apieracyi; rabatyzavanyja apieracyi pa kantroli kryzisnaha rajonu; psichałahičnyja apieracyi ŭdarnymi srodkami; abaronnyja technałahičnyja bieskantaktnyja apieracyi.

Pryčym, jak adznačaje Załužny, hety pieralik apieracyj budzie pastajanna raści z raźvićciom samich srodkaŭ i patrabavać źmienaŭ u daktrynalnych dakumientach, farmavańni całkam novaj fiłasofii padrychtoŭki i viadzieńnia bajavych dziejańniaŭ.

Staŭka na bieśpiłotniki

Na pohlad Załužnaha, bieśpiłotnyja i inšyja najnoŭšyja technałahičnyja sistemy zdolnyja vyrašyć šerah klučavych prablem u arhanizacyi i viadzieńni bajavych dziejańniaŭ. Ź ich dapamohaj pavyšajecca stupień bieskantaktnaści i, jak śledstva, źnižajecca ŭzrovień strat i stupień roli tradycyjnych srodkaŭ paražeńnia ŭ vykanańni bajavych zadač. A sami bajavyja dziejańni adbyvajucca z abmiežavanym pryciahnieńniem ciažkaj bajavoj techniki.

Bieśpiłotniki dazvalajuć paražać jak nadvodnyja, tak i padvodnyja siły praciŭnika na ŭsiu hłybiniu teatra vajennych dziejańniaŭ na mory z vysokaj efiektyŭnaściu i minimalnymi ryzykami dla asabovaha składu. Ź ich dapamohaj možna nanosić masiravanyja raptoŭnyja ŭdary pa abjektach krytyčnaj infrastruktury i kamunikacyj praciŭnika biez vykarystańnia darahich i składanych u ekspłuatacyi rakiet i piłatujemaj avijacyi.

Zadačy na 2024 hod

Załužny adznačaje, što dla avałodańnia novymi formami i sposabami viadzieńnia vajennych dziejańniaŭ Siłam abarony nieabchodna stvaryć zusim novuju dziaržaŭnuju sistemu technałahičnaha pieraŭzbrajeńnia. Heta, pa raźlikach hałoŭnakamandujučaha, moža zaniać da piaci miesiacaŭ.

Załužny ličyć, što ŭ sučasnych umovach VSU vałodajuć mahčymaściami, jakija dazvalajuć nie tolki źniščać voraha, ale i zabiaśpiečvajuć isnavańnie dziaržaŭnaści.

Tamu nieabchodna skarystacca mahčymaściami dla maksimalnaha nazapašvańnia najnoŭšaha bajavoha patencyjału, jaki dazvolić mienšymi resursami nanosić praciŭniku maksimalnuju škodu, spynić ahresiju i zaścieraže ad jaje Ukrainu ŭ budučyni.

Čytajcie jašče:

«Patrebnyja novyja technałohii, kab prarvacca ŭ takoj vajnie». Załužny apublikavaŭ novy prahramny artykuł

Załužny: Vajna zajšła ŭ tupik. Jana moža zaciahnucca na hady i vymatać ukrainskuju dziaržavu

Zialenski maje namier abviaścić ab zvalnieńni Załužnaha ciaham niekalkich dzion — CNN

• 0
• 24
• 0
• 1
• 2
• 1
• 3