26 nobieleŭskich łaŭreataŭ patrabujuć vyzvalić biełaruskich palitviaźniaŭ. Jany zaklikali zakryć hruzavy čyhunačny ruch praź miežy Biełarusi i ES
26 nobieleŭskich łaŭreataŭ, u tym liku Śviatłana Aleksijevič, rasijski žurnalist Dźmitryj Murataŭ i ŭkrainskaja pravaabaronca Alaksandra Maćvijčuk padpisali zaklik nieadkładna vyzvalić biełaruskich palitviaźniaŭ. Jany źviartajucca da krain ES, asabliva da ŭrada Polščy, «pryniać nieadkładnyja miery, kab spynić žorstkija represii ŭ Biełarusi i akazać cisk z metaj vyzvaleńnia ŭsich palityčnych źniavolenych». Jany prapanujuć akazać upłyŭ na režym, prypyniŭšy čyhunačnyja hruzapieravozki ŭ ES ź Biełarusi, uklučajučy tranzit z Rasii i Kitaja.
Adkryty list apublikavaŭ biełaruski palitołah Dźmitryj Bałkuniec.
Za apošnija dziesiacihodździ Jeŭropa nie bačyła humanitarnaj katastrofy, źviazanaj z palityčnymi represijami, jak u Biełarusi, havorycca ŭ liście.
«Za apošnija čatyry hady bolš za 50 000 čałaviek padvierhlisia palityčnym represijam u Biełarusi, sotni tysiač hramadzian byli vymušanyja pakinuć krainu, a tysiačy ludziej padvierhlisia katavańniam. Siarod ich sotni žurnalistaŭ, prafiesaraŭ, vykładčykaŭ, lekaraŭ, muzykaŭ, pracoŭnych i studentaŭ, hramadskija dziejačy i pravaabaroncy, u tym liku łaŭreat Nobieleŭskaj premii miru Aleś Bialacki.
Cełyja siemji, šmatdzietnyja maci, niepaŭnaletnija, ciažkachvoryja, pažyłyja ludzi i invalidy ciapier utrymlivajucca ŭ žudasnych umovach. Za apošnija dziesiacihodździ Jeŭropa nie bačyła humanitarnaj katastrofy, źviazanaj z palityčnymi represijami ŭ takich maštabach na dušu nasielnictva, jak u Biełarusi», — havorycca ŭ liście.
Aŭtary zvarotu zaklikajuć urady ŭsich krain ES, ale najpierš — urad Polščy, pryniać nieadkładnyja miery dla spynieńnia žorstkich represij u Biełarusi i cisku z metaj vyzvaleńnia ŭsich palityčnych źniavolenych.
«Polšča jak susiedniaja ź Biełaruśsiu kraina vałodaje ŭnikalnymi i efiektyŭnymi ryčahami dla takich dziejańniaŭ. Naprykład, časovaje prypynieńnie rehularnych čyhunačnych hruzavych pieravozak u ES ź Biełarusi, uklučajučy tranzit z Rasii i Kitaja, — adzin z takich efiektyŭnych ryčahoŭ uździejańnia. Kamiercyjnyja intaresy jeŭrapiejskich krain nie mohuć pieravažyć pytańni ich nacyjanalnaj biaśpieki, i ich abaviazak ratavać niavinnych ludziej, jakija stali achviarami ŭ Biełarusi», — zaklikajuć padpisanty.
Kamientary