Apublikavanyja spadarožnikavyja zdymki ź miesca ŭdaru pa vuźle suviazi Čarnamorskaha fłotu
Raźviedka Ukrainy zajaviła, što krytyčna paškodžany rasijski karabiel «Jamał».
Prajekt «Schiemy» ŭkrainskaj słužby Radyjo Svaboda apublikavaŭ spadarožnikavyja zdymki nastupstvaŭ rakietnaha ŭdaru pa vuźle suviazi Čarnamorskaha fłota ŭ Sievastopali. Jany zrobleny Planet Labs 24 sakavika.
Na zdymkach bačnyja razbureńni adnaho z budynkaŭ pa vulicy Rudnievaj u Sievastopali. Paraŭnoŭvajučy zdymki hetaj miascovaści za 21 i 24 sakavika, bačna, što paśla rakietnaha ŭdaru pravaliŭsia dach budynka, kala jaho taksama bačnyja aŭtamabili śpiecsłužbaŭ.
Rakietny ŭdar pa Sievastopali VSU nanieśli pozna ŭviečary ŭ subotu, 23 sakavika. «Kiraŭnik» anieksavanaha Rasijaj Sievastopala Michaił Razvazžajeŭ paviedamiŭ, što ŭ vyniku ŭdaru pa horadzie zahinuŭ miascovy žychar, čaćviora čałaviek paciarpieli. Jon zajaviŭ, što hetaja ataka na Sievastopal była «samaj masiravanaj za apošni čas», padkreśliŭšy, što siły rasijskaj SPA źbili nad horadam bolš za dziesiać rakiet.
Paźniej Stratehičnaje kamandavańnie VSU abviaściła, što ŭkrainskija vajskoŭcy ŭrazili ŭ Sievastopali vialikija desantnyja karabli «Jamał» i «Azoŭ», a taksama «niekalki abjektaŭ infrastruktury» Čarnamorskaha fłota.
Paražeńnie BDK «Jamał» paćvierdzili ŭ Hałoŭnym upraŭleńni raźviedki Minabarony Ukrainy, adznačyŭšy, što sudna atrymała praboinu ŭ vierchniaj pałubie, z-za jakoj jano nachiliłasia na pravy bort. Taksama ŭ HUR zajavili, što ataka 23 sakavika pryjšłasia pa terytoryi 13-ha sudnaramontnaha zavoda Čarnamorskaha fłota.
Pa danych Astra, akramia BDK «Jamał» i «Azoŭ», padčas rakietnaha ŭdaru byŭ paškodžany raźviedvalny karabiel «Ivan Churs», u jaki patrapili dźvie rakiety.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary