Žychar Hrodna abstralaŭ sa svajho bałkona šumnuju kampaniju ŭ dvary
Hrodzienski mižrajonny adździeł Śledčaha kamiteta paviedamiŭ pra vypadak, jaki adbyŭsia vosieńniu minułaha hoda ŭ Hrodnie. Uviečary 30 vieraśnia ŭ milicyju źviarnuŭsia mužčyna, jaki paviedamiŭ, što ŭ žyłym rajonie horada nieviadomy adkryŭ stralbu ź pnieŭmatyki i trapiŭ jamu ŭ vobłaść šyi.
Strałkom akazaŭsia 41-hadovy žychar susiedniaha doma, jaki spačatku ŭsio admaŭlaŭ, ale paśla pryznaŭ svaju vinu.
Jak udałosia vyśvietlić, 30 vieraśnia mužčyna vyjšaŭ na bałkon pakuryć. Tam jamu nie spadabałasia, što kampanija maładych ludziej, jakaja siadzieła na łavačcy kala susiedniaha doma, nadta hučna razmaŭlała. A pakolki byŭ niećviarozy, to nie prydumaŭ ničoha lepšaha, jak uziać pnieŭmatyčnuju vintoŭku i pačać stralać u bok hetych mužčyn.
Streliŭšy niekalki razoŭ, mužčyna supakoiŭsia i pajšoŭ spać. Kali ž sprava raskruciłasia i stała pytańnie ab adkaznaści, to jon spačatku zapeŭnivaŭ, što raskajvajecca ŭ zroblenym i navat nibyta vykinuŭ u raku vintoŭku, paśla sprabavaŭ usio śpichnuć na svaju sužycielku, jakuju ŭhavaryŭ uziać vinu na siabie. Na karyść apošniaj viersii śviedčyli i siabry mužčyny.
Urešcie, adnak, vyśvietliłasia, što vintoŭku padazravany nie vykinuŭ, a schavaŭ u haražy svajho znajomaha, prytym bieź jahonaha viedama. Toje, što stralaŭ mienavita jon, taksama ŭdałosia dakazać praz roznyja śledčyja pracedury.
Vyśvietliłasia taksama, što bolš za 10 hadoŭ tamu mužčyna pryciahvaŭsia da kryminalnaj adkaznaści za ździajśnieńnie chulihanskich dziejańniaŭ, ale paśla taho ŭ kryminale zaŭvažany nie byŭ i mieŭ pastajannaje miesca pracy, dzie charaktaryzavaŭsia stanoŭča.
U vyniku mužčynu vystavili abvinavačvańnie pavodle č. 3 art. 339 (asabliva złosnaje chulihanstva) i č. 5 art. 16, č. 2 art. 401 (padbuchtorvańnie da dačy zahadzia chłuślivych pakazańniaŭ śviedkami pry viadzieńni papiaredniaha śledstva, spałučanych z abvinavačvańniem u ciažkim złačynstvie) KK Respubliki Biełaruś. Ciapier jaho ŭziali pad vartu.
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy27
Kamientary