Kaniec siabroŭstvu?

Rasija papiaredziła Biełaruś pra mahčymaść pazbaŭleńnia kvot na biaspošlinnuju pastaŭku nafty ŭ vypadku pavieličeńnia koštu tranzitu rasijskaj nafty praź biełaruskuju terytoryju.

Adpaviedny list nibyta pastupiŭ z Maskvy ŭ Saviet ministraŭ Biełarusi, paviedamili blizkija da biełaruska‑rasijskich pieramovaŭ krynicy.

U liście ŭkazana na nieabchodnaść abaviazkovaha ŭzhadnieńnia z rasijskim bokam miechanizmu taryfnaha rehulavańnia pry transpartavańni nafty pa sistemie biełaruskich mahistralnych naftapravodaŭ. Pry hetym u dakumiencie padkreślivajecca, što rašeńnie Rasii ab biazmytnym pastaŭkach u Biełaruś u 2010 hodzie 6,3 młn ton nafty źjaŭlajecca «žestam dobraj voli»,

i, kali takija ŭmovy biełaruski bok nie zadavalniajuć, Rasija hatovaja pierajści na rynkavyja ŭmovy pastavak.

U kancernie «Biełnaftachim» infarmacyju pra list prakamientavać nie zmahli. Nie zmoh paćvierdzić hetyja źviestki i pres‑sakratar premjer‑ministra Biełarusi Alaksandr Cimašenka.

«Praź mianie taki list nie prachodziŭ», — skazaŭ jon.

Napiaredadni Cimašenka abvierh infarmacyju ab źmienie pazicyi Biełarusi na pieramovach z Rasiejaj ab pastaŭkach nafty, raspaŭsiudžanuju šeraham ŚMI.

Infarmacyja ab źmianieńni pazicyi Biełarusi na pieramovach z Rasijaj ab pastaŭkach nafty, raspaŭsiudžanaja niekatorymi ŚMI, nie adpaviadaje sapraŭdnaści, zajaviŭ pres‑sakratar biełaruskaha premjer‑ministra Alaksandr Cimašenka.

Jon padkreśliŭ, što

biełaruskaja pazicyja pa pytańniach pastaŭki nafty vykładziena ŭ liście Alaksandra Łukašenki, nakiravanym Dźmitryju Miadźviedzievu.

Hetaja pazicyja, zaŭvažyŭ Cimašenka, «nie maje ničoha ahulnaha z pazicyjaj, ahučanaj niejkaj krynicaj u orhanach dziaržkiravańnia», na jakuju spasyłalisia ŚMI.

U liście Łukašenki, nahadajem, havaryłasia: 10 śniežnia 2009 hoda ŭ chodzie pasiadžeńnia Vyšejšaha dziaržsavieta Sajuznaj dziaržavy Biełarusi i Rasii prezidentami dźviuch krain była dasiahnuta damoŭlenaść, što na praciahu dvuch‑troch miesiacaŭ 2010 hoda nafta budzie pastaŭlacca ŭ Biełaruś biaspošlinna, i za hety čas baki ŭzhodniać umovy dalejšaj pastaŭki nafty. Adnak potym Rasijskaja Fiederacyja faktyčna admoviłasia ad vypracavanych damoŭlenaściej i vyłučyła nieprymalnyja dla Biełarusi ŭmovy».

Apošni raund pieramoŭ pa pastaŭkach nafty adbyŭsia ŭ Maskvie 9 studzienia.

Paśla viartańnia biełaruskaj delehacyi ŭ Minsk pres‑słužba Savieta ministraŭ Biełarusi paviedamiła, što «biełaruski bok vystaviŭ svaje arhumienty na asnovie pravavoj bazy dvuchbakovych adnosinaŭ, padmacavaŭšy raźlikami, raniej uzhodnienymi ekśpiertami, adnak pieramoŭščyki z boku Rasii nie ŭziali heta pad uvahu».

Data adnaŭleńnia pieramoŭ pakul nieviadomaja.

Siońnia ŭ kancernie «Biełnaftachim» zajavili, što rasijskaja nafta na biełaruskija zavody pastupaje i viadziecca praca pa zaklučeńni novych kantraktaŭ z rasijskimi naftavymi kampanijami.

• 0
• 0
• 0
• 0
• 0
• 0
• 0
• 0