«Hatovy akazać usialakaje ŭzajemadziejańnie». Doktar-biełarus z Partuhalii piać hadoŭ prasiŭsia supracoŭničać z KDB
U bazie zvarotaŭ KDB, jakuju vykłali ŭ sieciva «Kibierpartyzany», vydańnie «Lusterka» znajšło try listy, jakija napisaŭ lekar-biełarus. Jon žyvie ŭ Partuhalii i maje hramadzianstva hetaj krainy, ale ciaham niekalkich hadoŭ miedyk nastojliva prapanoŭvaŭ łukašenkaŭskim čekistam «dobraachvotnaje supracoŭnictva».
«Hatovy akazać usialakaje ŭzajemadziejańnie biazvypłatna»
Pieršy list u KDB Aleh Bujnoŭski adpraviŭ u sakaviku 2016 hoda. Jon nazvany jak «prapanova ab dobraachvotnym supracoŭnictvie».
«Ja, Bujnoŭski Aleh Francavič, 1978 h. n., uradženiec Biełarusi, jaki pastajanna žyvie ŭ Partuhalii i maje padvojnaje hramadzianstva (Biełarusi i Partuhalii), maju vyšejšuju miedycynskuju adukacyju, žanaty, troje dziaciej. Prapanuju dobraachvotnaje supracoŭnictva», — napisaŭ mužčyna.
Druhi list datavany śniežniem 2019 hoda.
«Ja, vyšej zajaŭleny, znachodziačysia na pastajannym pražyvańni ŭ Partuhalii (Azorskija astravy), majučy padvojnaje hramadzianstva, hatovy na supracoŭnictva pry ŭźniknieńni nieabchodnaści», — paviedamiŭ lekar.
Treci list na sajt KDB jon adpraviŭ u listapadzie 2021 hoda:
«Ja, jaki nižej padaŭ dakumienty i pradstaviŭsia, hatovy akazać, pry nieabchodnaści, usialakaje ŭzajemadziejańnie ŭ miežach maich mahčymaściaŭ, biazvypłatna».
Da listoŭ prykładalisia partuhalskija adrasy pražyvańnia lekara i numary jaho telefonaŭ.
Pracavaŭ u vajskovym špitali ŭ Anhole i repościŭ Marharytu Simańjan
«Lusterka» znajšło staronku Aleha Bujnoŭskaha ŭ LinkedIn. Tam ža raźmieščana reziume sa śpisam miescaŭ jahonych vučoby i pracy.
Ź jaho vynikaje, što doktar skončyŭ Minski dziaržaŭny miedycynski ŭniviersitet u 2001 hodzie. Potym pracavaŭ u stalicy: u 9-j haradskoj kliničnaj balnicy i «Minskaj kardyjałahičnaj klinicy» (mahčyma, majecca na ŭvazie RNPC «Kardyjałohija»).
Paśla jon žyŭ u Anhole i pracavaŭ u vajskovym špitali Uzbrojenych sił. A tady viarnuŭsia ŭ Minsk i ŭładkavaŭsia ŭ Instytut fizijałohii Akademii navuk.
Miarkujučy pa reziume biełarusa, u Partuhaliju mužčyna pierabraŭsia, chutčej za ŭsio, u pieryjad z 2008 pa 2010 hod. Jon piša, što pracavaŭ doktaram na roznych pradpryjemstvach. U jaho abaviazki ŭvachodzili «nahlad za hihijenaj, biaśpiekaj pracy i zdaroŭjem rabotnikaŭ». Taksama na paru hadoŭ jon znoŭ źjeździŭ u Anhołu, adpracavaŭ tam u adnym ź miedcentraŭ Łuandy.
U Partuhalii Aleh skončyŭ internaturu i aśpiranturu. Apošniaje nazvanaje ŭ reziume miesca pracy (z 2017 hoda) — siamiejny doktar-stažor u miedcentry na partuhalskim vostravie San-Mihiel (uvachodzić u archipiełah Azorskich astravoŭ).
U tvitary Aleh Bujnoŭski aktyŭničaŭ da 2021 hoda. Tam jon rekłamavaŭ centr adnaŭleńnia zdaroŭja dla zaležnych ludziej na Azorskich astravach. Mahčyma, heta jašče adno miesca jaho pracy — ciapier sajt centra nie adkryvajecca.
Padčas pandemii miedyk aktyŭna repościŭ paviedamleńni pra biaśpiečnaść i vynikovaść rasijskaj vakcyny Sputnik V. Akramia taho, u stužcy Aleha da 2018 hoda možna znajści mnostva repostaŭ tvitaŭ prapahandystki Marharyty Simańjan i spasyłak na rasijskija dziaržaŭnyja miedyja (naprykład, «RIA «Novosti»).
«Lusterka» sprabavała atrymać kamientar u samoha lekara, jaki tak aktyŭna prapanoŭvaŭ biełaruskamu KDB svaje pasłuhi. Ale na zvanki i list žurnalista jon nie adkazaŭ.
Dla prahladu zvarotaŭ u KDB zrabili zručniejšy servis
«Moj muž Ihar Kušnierski pieradaje bujnyja sumy najaŭnych hrošaj Łatušku i Puciłu». Što heta za danos?
Dvoje siabroŭ «Narodnaj hramady» pisali danosy ŭ KDB. Chto jany i jak tłumačać situacyju?
U bazie zvarotaŭ u KDB — bolš za 40 chadajnictvaŭ ab vyzvaleńni Babaryki
Kamientary