Prapahandysty pościać fota pra «raskošnaje žyćcio» premjerki Estonii pry SSSR. Akazałasia, što ŭsio nie tak
Kaja Kałas raskazała historyju fatahrafii.
Rasijskija i biełaruskija prapahandysty raspaŭsiudžvajuć fota premjer-ministra Estonii Kai Kałas u junactvie. Na zdymku jana źniataja z baćkami ŭ interjery, jaki prapahandystam zdaŭsia bahatym.
Telehram-kanały publikujuć zdymak prykładna z adnym i tym ža zahałoŭkam: «Fota siamji Kai Kałas, jakaja «pakutuje ad savieckaj dyktatury».
Teksty pastoŭ taksama praktyčna identyčnyja. U ich raskazvajecca, što baćka budučaj kiraŭnicy jeŭrapiejskaj dypłamatyi Sijm Kałas pracavaŭ va ŭradzie Estonskaj SSR, uznačalvaŭ respublikanskaje adździaleńnie Aščadbanka, pracavaŭ u haziecie kampartyi. Prapahandysty cytujuć vykazvańnie Kałas pra žyćcio ŭ savieckija časy: palityk raskazvała, što ŭ dziacinstvie zamiest cukierak, jakich nie było ŭ kramach va ŭmovach deficytu, jeła śmiatanu z cukram.
Fota padchapiŭ aŭtar «Biełaruś siehodnia» Andrej Mukavozčyk — jon napisaŭ kałonku pra «dabryniu SSSR» jaki dazvoliŭ Sijmu Kałasu pabudavać karjeru, niahledziačy na toje, što jahony dzied u 1920-ja hady pracavaŭ u palicyi i «haniaŭ kamunistaŭ». Adreahavaŭ na publikacyju i Ryhor Azaronak, jaki kanstatavaŭ, što «SSSR zahubiła jahonaja dabrynia».
Ale, jak akazałasia, prarasijskija prapahandysty raspaŭsiudzili fejk. Fatahrafija była zroblenaja nie ŭ savieckija časy, a ŭ siaredzinie 1990-ch — kali Estonija ŭžo adnaviła niezaležnaść.
«Ja spytałasia ŭ Kai Kałas pra hetuju fatahrafiju. Zdymak byŭ zrobleny, kali Kaja była ŭ 11-m ci 12-m kłasie, heta značyć u 1994 ci 1995 hodzie. Kaja naradziłasia ŭ 1977 hodzie, Estonija zdabyła niezaležnaść u 1991 hodzie. Mebla na hetych fotazdymkach — siamiejnaja spadčyna. Takaja mebla nikoli nie pradavałasia ŭ SSSR», — raskazała ŭ X estonskaja deputatka Karmen Joler.
Adreahavała na publikacyju i sama Kałas.
«Sapraŭdy, zdymak zrobleny praz šmat času paśla vyzvaleńnia ad akupacyi. Mebla 1930-ch hadoŭ, jaje zachavała inšaja maja babula (nie taja, jakuju sasłali ŭ Sibir), i jana pakazvaje, što da akupacyi Estonija była kvitniejučaj krainaj», — napisała premjerka.
U siecivie taksama možna znajści podpis da hetaj fatahrafii, jaki paviedamlaje, što jaje zrabili ŭ 1990-ja hady.
U 1949 hodzie maci Kai Kałas Kryści razam ź jaje maci i babulaj savieckaja ŭłada departavała ŭ Sibir jak členaŭ siamji ŭdzielnika estonskaj bajavoj arhanizacyi «Amakajtse». Tady Kryści było ŭsiaho šeść miesiacaŭ, a na radzimu jana viarnułasia tolki kali joj spoŭniłasia dziesiać hadoŭ.
Sama Kaja Kałas chutka budzie pryznačanaja kiraŭnicaj jeŭrapiejskaj dypłamatyi. Estonskim uradam jana kiruje z 2021 hoda.
Kamientary