Chabar 35 tysiač jeŭra, viačera ŭ restaranie sierbskaj kuchni i pucioŭka na kurort: pačaŭsia sud nad eks-namieśnikam ministra enierhietyki
Michaił Michadziuk kuryravaŭ BiełAES, a ciapier akazaŭsia na łavie padsudnych za ŭčynieńnie asabliva ciažkaha karupcyjnaha złačynstva.
![](http://nashaniva.com/img/w840d4webp1/photos/z_2024_06/photo1675409912-fxeyu.jpeg.webp)
U sudzie Leninskaha rajona Minska pačaŭsia sud nad byłym namieśnikam ministra enierhietyki Biełarusi Michaiłam Michadziukom.
Eks-čynoŭnika abvinavačvajuć u ździajśnieńni asabliva ciažkaha karupcyjnaha złačynstva, jamu pahražaje da 15 hadoŭ kałonii, piša «Sputnik».
Abvinavačvańnie ličyć, što Michadziuk braŭ chabar pry realizacyi najvažniejšych inviestycyjnych prajektaŭ Minenierha, jakija jon kuryravaŭ. Namieśnik ministra łabiravaŭ intaresy pryvatnaj kampanii pry zakupcy jeŭrapiejskaha abstalavańnia dla dziaržpradpryjemstvaŭ ź sistemy Ministerstva.
Pa viersii śledstva, Michadziuk z 2018-ha pa 29 śniežnia 2023 hoda atrymaŭ u niekalki etapaŭ chabaru ahulnym pamieram 35 tysiač jeŭra. Taksama jon pryniaŭ u Minsku sierbskija dynary za spryjalnaje vyrašeńnie pytańniaŭ, jakija ŭvachodziać u jaho kampietencyju.
Akramia taho, u jakaści niezakonnaha ŭznaharodžańnia Michadziuk atrymaŭ ad kamiercyjnaj kampanii «dva kvitki» na viačeru ŭ restaranie sierbskaj kuchni, turystyčnuju pajezdku na sierbski harnałyžny kurort.
Paśla abviaščeńnia abvinavačvańnia były čynoŭnik pahadziŭsia davać pakazańni ŭ sudzie i zajaviŭ, što całkam pryznaje vinu i raskajvajecca. Jon nahadaŭ, što prapracavaŭ u halinie 47 hadoŭ, u jaho jość uznaharody ad najvyšejšaha kiraŭnictva krainy, ad upłyvovych mižnarodnych struktur, u tym liku profilnych.
U pačatku sudovaha pasiedžańnia bok abarona prasiła źmianić mieru strymańnia dla Michadziuka, spasyłajučysia na najaŭnaść chraničnych zachvorvańniaŭ. Prakuror u adkaz nahadaŭ, što eks-čynoŭnika sudziać pavodle artykuła, jaki praduhledžvaje 15 hadoŭ pazbaŭleńnia voli, a ŭ SIZA №1 jość miedčastka. Sud u vyniku abaronie admoviŭ.
Nie zadavoliŭ sudździa i chadajnictva ab vydaleńni z pracesu supracoŭnikaŭ ŚMI. Sud prachodzić u adkrytym režymie.
Pra zatrymańnie Michadziuka, jaki pracavaŭ na pasadzie namieśnika ministra enierhietyki z 2005 hoda, stała viadoma ŭ červieni padčas narady ŭ Łukašenki.
Kamientary