U Biesłanie ŭ Pucina spytali, čamu SK RF jašče nie skončyŭ rasśledavańnie terakta 20-hadovaj daŭniny
Pucin abiacaŭ jašče ŭ 2005 hodzie zaviaršyć rasśledavańnie teraktu ŭ Biesłanie i raskazać «usiu praŭdu».
Uładzimir Pucin padčas vizitu ŭ Biesłan sustreŭsia z pradstaŭnicami «Maci Biesłana». Jak raspaviała «Ahienctvu» sustaršynia arhanizacyi Anieta Hadzijeva, žančyny paskardzilisia na toje, što rasśledavańnie teraktu zaciahnułasia na 20 hadoŭ.
Pa słovach Hadzijevaj, asnoŭnaja častka razmovy była pryśviečana rasśledavańniu. Jany paskardzilisia prezidentu, što za 20 hadoŭ rasśledavańnie tak i nie zakrytaje, pravodzicca «farmalna» i nie ŭličyła fakty, jakija vyśvietlilisia padčas sudovych pracesaŭ.
«[Skazali], što my ličym, što rasśledavańnia jak takoha nie było. I što my byli na sustrečy ź im u 2005 hodzie, i jon nam abiacaŭ, što voźmie pad svoj kantrol, adnak hetaha nie adbyłosia. I što mienavita praz heta my nie damahlisia nijakaj praŭdy i dajšli da Strasburha, jaki vynies pastanovu ŭ hetaj spravie».
Pa słovach Hadzijevaj, Pucin adkazaŭ, što nie viedaŭ pra zaciahnutaje rasśledavańnie.
«Jon skazaŭ, što [treba] źviarnucca da Bastrykina [kiraŭnika SK RF], kab jon u sutnaść spravy ŭvajšoŭ i prakantralavaŭ, što tam adbyvajecca, na jakoj stadyi i što viadziecca», — adznačyła jana.
U 2005 hodzie staršynia kamiteta «Maci Biesłana» Susana Dudzijeva raspaviadała, što Uładzimir Pucin paabiacaŭ svajakam achviar teraktu spryjać zaviaršeńniu rasśledavańnia:
«Prezident zapeŭniŭ nas, što jon zrobić usio, što ad jaho zaležyć, kab usie daviedalisia praŭdu, a vinavatyja panieśli pakarańnie. Jon skazaŭ, što zacikaŭleny ŭ praŭdzie, jakoj by jana ni była, hetak ža, jak i ŭsie, kab heta nie paŭtaryłasia».
Terakt u Biesłanie adbyŭsia 20 hadoŭ tamu i staŭ samym šmatlikim pa kolkaści achviar u historyi sučasnaj Rasii. Atrad terarystaŭ zachapiŭ škołu ŭ Biesłanie ranicaj 1 vieraśnia 2004 hoda padčas śviatočnaj liniejki. U zakładnikach apynulisia bolš za 1200 čałaviek, bolšaść — niepaŭnaletnija dzieci. Terarysty ŭtrymlivali ich u spartyŭnaj zale škoły bieź ježy i vady try dni. Na treci dzień śpiecsłužby pajšli na šturm škoły. U vyniku teraktu zahinuli 334 čałavieki, siarod jakich 186 dziaciej.
Jak skłałasia žyćcio vunderkinda z Žodzina, jaki ŭ 12 hadoŭ pastupiŭ u miedycynski ŭniviersitet?10
Kamientary