З кастрычніка новы пакет санкцый запрацуе напоўніцу. Як да гэтай даты рыхтуюцца бізнэс і грузаперавозчыкі?
Абмежаванні раней ужо дзейнічалі ў дачыненні да Расіі, але цяпер распаўсюдзяцца і на нашу краіну.
Шчыліна зачыняецца
Рада Еўрасаюза прыняла новы пакет санкцый супраць Беларусі 29 чэрвеня 2024 года. Прынятыя абмежаванні раней ужо дзейнічалі ў дачыненні да Расіі. Гэтым пакетам, па меркаванні еўрапейскіх чыноўнікаў, закрылі самую вялікую шчыліну ў санкцыйным рэжыме — каб Расія не магла лёгка абыходзіць абмежаванні з дапамогай Беларусь.
Пры гэтым, за некаторымі выключэннямі, абавязкі па кантрактах, заключаных да 1 ліпеня 2024 года, могуць працягваць выконвацца да 2 кастрычніка 2024 года.
Таму беларускія і расійскія імпарцёры імкнуліся паставіць як мага болей тавараў з Еўропы да кастрычніка.
Пад абмежаванні трапілі больш за 200 мытных кодаў з самых розных груп тавараў.
«Заявак на перавозку стала менш»
Па словах грузаперавозчыкаў, у жніўні-верасні адбываецца сапраўдны бум.
«Апошнія месяцы былі, можна сказаць, вельмі добрыя ў плане заробкаў, але ўжо цяпер мы адчуваем, што колькасць заявак на дастаўку тавараў значна скарацілася», — гаворыць дырэктар транспартнай кампаніі.
Ён чакае, што з кастрычніка грузапаток зменшыцца.
«Будуць падаць тарыфы, а разам з імі і заробкі. Прынамсі цяпер перспектывы выглядаюць не вельмі пазітыўнымі, паколькі пералік грузаў, якія можна было дастаўляць, скараціцца».
Чыгунка замест фуры
Іншы суразмоўца, які працуе лагістам, кажа, што апошнім часам назіраецца пераразмеркаванне грузапатоку з аўтамабільнага транспарту на чыгуначны.
«Аб'ёмы даставак па чыгунцы выраслі, а фурамі, наадварот, крыху праселі», — сцвярджае лагіст.
На яго думку, гэтаму спрыяе адразу некалькі фактараў.
«Па-першае, мы назіраем, што цяпер кампаніі набываюць тавары з запасам, бо пасля 1 кастрычніка дастаўляць іх у Беларусь і Расію стане як мінімум складаней.
Цяпер склалася такая сітуацыя, калі адныя і тыя ж тавары еўрапейскія мытнікі не прапускаюць праз аўтадарожныя пункты пропуску, але афармляюць, калі яны ідуць чыгункай.
Напрыклад, калі ёсць гарантыйны ліст ад вытворцы, то па чыгунцы ўсё выдатна выязджае, а калі з тым жа таварам і лістом адправіць фуру, то шанцаў на праезд амаль няма», — тлумачыць лагіст.
Што імпарцёры будуць рабіць пасля 1 кастрычніка?
Спецыяліст мяркуе, што тыя тавары, якія няма чым замяніць, будуць дастаўляць у Беларусь і Расію і пасля 2 кастрычніка.
«Імаверна, зменіцца схема дастаўкі. Магчыма, яшчэ больш прасядзе дастаўка аўтатранспартам, але казаць, што ўсё цалкам спыніцца, не выпадае», — лічыць суразмоўца.
Цяпер, па яго словах, набірае папулярнасць дастаўка з удзелам кампаній з Кыргызстана, Казахстана і нават Таджыкістана, які і ў ЕАЭС не ўваходзіць.
Таксама ён кажа, што расіяне ўсё часцей замаўляюць дастаўку праз Турцыю або Румынію.
«Дастаўка адбываецца да Канстанцы (Румынія), а адтуль морам адразу ў Расію. Іншы варыянт — праз Турцыю і Грузію. Праз гэта атрымліваецца, што даставіць санкцыёнку ў Расію нават прасцей, чым у Беларусь».
Азія ў трэндзе
Кожныя новыя абмежаванні скарачаюць аб'ёмы паставак тавараў у Расію праз Беларусь. Прадстаўнік буйной сусветна вядомай кампаніі, якая афіцыйна сышла з Расіі яшчэ ў 2022-м кажа, што праз больш дарагую лагістыку расійскія кліенты вымушаны замяняць прадукцыю аналагамі кітайскай вытворчасці.
«Кампаніі, якія сышлі з Расіі, насамрэч выдатна бачаць, як іх прадукцыя па-ранейшаму трапляе на расійскі рынак. Гэта лёгка адсачыць, бо калі нешта перастае пастаўляцца наўпрост у Расію, то пачынаюць расці аб'ёмы паставак гэтых тавараў у Турцыю і краіны Цэнтральнай Азіі», — тлумачыць спецыяліст.
Тым не менш гэта не азначае, што Расія не адчувае ўплыву ад гэтых абмежаванняў.
«Статыстыка паказвае, што праз трэція краіны трапляе прыблізна толькі 2/3 ад тых аб'ёмаў, што пастаўляліся раней. Праз складаную лагістыку і дадатковыя схематозы канчатковая цана вырастае. Адпаведна, зніжаецца попыт. У дадатак адбываецца замена многіх пазіцый аналагамі з «сяброўскіх» краін», — адзначае суразмоўца.
Аўтаперагонны бізнэс — усё? Хутка стане нельга прадаваць расіянам свежапрыгнаныя машыны з ЕС і ЗША
«Хочуць прымусіць людзей працаваць за капейкі». Дальнабойшчыкі — пра намеры пазбавіць іх бясплатных медыцынскіх паслуг
«Беларуснафта» судзіцца за непастаўку абсталявання адразу з некалькімі заходнімі кампаніямі
Махляры скралі фатаграфію беларуса і цяпер з дапамогай яго партрэту разводзяць на грошы жанчын у Расіі2
Каментары
(...)Праз гэта атрымліваецца, што даставіць санкцыёнку ў Расію нават прасцей, чым у Беларусь.