Na ZŠA idzie zvyšmahutny ŭrahan samaj apošniaj katehoryi. Z-za jaho mohuć uvieści novuju kłasifikacyju
«Hety štorm nabližajecca da matematyčnaj miažy taho, što moža ŭvohule vyrablać atmaśfiera Ziamli nad akijanskaj vadoj», — kažuć amierykanskija mietearołahi. Voś, što saboj ujaŭlaje ŭrahan «Miłtan» i tendencyja farmavańnia novaj katehoryi zvyšmahutnych štarmoŭ.
Hihancki štorm «Miłtan» užo zaŭtra dasiahnie amierykanskaha štata Fłaryda, dzie stvoryć «nadzvyčaj niebiaśpiečnyja dla žyćcia ŭmovy i pryviadzie da katastrafičnych razbureńniaŭ», — paviedamlaje Nacyjanalny centr adsočvańnia ŭrahanaŭ ZŠA. Pa mahutnaści «Miłtan» maje piatuju katehoryju i ličycca piatym pa liku najbujniejšym štormam za ŭsiu historyju nazirańniaŭ u Atłantycy.
Piataja katehoryja — najvyšejšaja na dadzieny momant, ale mnohija ekśpierty śćviardžajuć, što z-za klimatyčnych źmien urahany stanoviacca macniejšymi za standartnyja miežavyja pakazčyki, tamu moža spatrebicca ŭvieści novuju katehoryju — šostuju.
Urahany kłasifikujucca z dapamohaj škały Safira-Simpsana, jakaja aceńvaje ich pavodle ŭstojlivaj chutkaści vietru i patencyjnaj škody, jakuju hetyja viatry mohuć nanieści asiarodździu. Škała maje piać katehoryj, jakija varjirujucca z rostam chutkaści vietru i patencyjału da razbureńniaŭ.
Katehoryja 1: chutkaść vietru ad 119 da 153 km/hadzinu.
Katehoryja 2: chutkaść vietru ad 154 da 177 km/hadzinu.
Katehoryja 3: chutkaść vietru ad 178 da 208 km/hadzinu.
Katehoryja 4: chutkaść vietru ad 209 da 251 km/hadzinu.
Katehoryja 5: chutkaść vietru ad 252 km/hadzinu i bolš.
Daśledavańnie, apublikavanaje ŭ pačatku hoda hrupaj uradavych amierykanskich mietearołahaŭ u časopisie Proceedings of the National Academy of Sciences, prapanavała ŭvieści šostuju katehoryju dla ŭrahanaŭ z chutkaściu vietru 309 kiłamietraŭ na hadzinu i vyšej.
Pavodle navukoŭcaŭ, źmieny klimatu pravakujuć bolšuju kolkaść zvyšmahutnych urahanaŭ na płaniecie: tak, u pieryjad z 1980 pa 2021 hod było zafiksavana 197 trapičnych cykłonaŭ piataj katehoryi, pałova ź ich adbyłasia ŭ apošnija 17 hadoŭ. Piać z hetych štarmoŭ pieravysili hipatetyčnuju šostuju katehoryju, i ŭsie jany adbylisia ŭ apošnija 9 hadoŭ (samy intensiŭny ź ich — urahan «Patrycyja», jaki ŭ 2015 hodzie ŭ pikavy momant dasiahnuŭ chutkaści vietru ŭ 348 kiłamietraŭ u hadzinu i abrynuŭsia na Mieksiku), pieradaje vydańnie Newsweek.
Adnak nie ŭsie ekśpierty ličać, što patrebna ŭvodzić novuju šostuju katehoryju, bo «viatry piataj katehoryi i tak pryvodziać da katastrafičnych vynikaŭ, tamu ciažka zrazumieć, jak dadańnie novaj katehoryi moža dapamahčy situacyi», adznačaje vydańnie sa spasyłkaj na inšuju kamandu navukoŭcaŭ.
Sam «Miłtan», pavodle nadzvyčajnych słužb ZŠA, u paniadziełak dasiahnuŭ chutkaści vietru ŭ 290 kiłamietraŭ u hadzinu i «jašče bolš uzmacnicca pry ŭdary pa Fłarydzie ŭ sieradu». Słužby papiaredžvajuć, što na ŭźbiarežža štata abrynucca «razburalnyja viatry, hihanckija chvali vady, śmiarotna niebiaśpiečnyja pavodki ŭ haradach i vielmi mocnyja daždžy».
Častka nasielnictva ŭźbiarežnych nasielenych punktaŭ Fłarydy terminova evakujujecca, a z-za ŭrahanu prezident ZŠA Džo Bajden admianiŭ niekalki svaich zamiežnych pracoŭnych vizitaŭ.
Kamientary