U Rasii afrykancaŭ padmanam prymusili budavać bieśpiłotniki

Vyniki rasśledavańnia ahienctva Associated Press śviedčać ab tym, što Rasija znajšła adzin sa šlachoŭ papaŭnieńnia niedachopu pracoŭnaj siły va ŭmovach vajennaha času. Kreml nabiraje žančyn va ŭzroście 18—22 hadoŭ z takich krain, jak Uhanda, Ruanda, Kienija, Paŭdniovy Sudan, Śjera-Leone, Nihieryja i Šry-Łanka. Ciapier hetaja kampanija raspaŭsiudžvajecca na inšyja krainy Azii i Łacinskaj Amieryki.

U vyniku častka klučavoj vytvorčaści zbroi Rasii apynułasia ŭ niespraktykavanych rukach kala 200 afrykanskich žančyn, jakija pracujuć razam z 16-hadovymi rasijskimi studentami prafiesijna-techničnych vučyliščaŭ na zavodzie ŭ asobaj ekanamičnaj zonie «Ałabuha» ŭ Tatarstanie.

AP praanalizavała spadarožnikavyja zdymki kompleksu i jaho ŭnutranyja dakumienty, parazmaŭlała ź niekalkimi afrykankami, jakija apynulisia tam, i prahledzieła sotni videarolikaŭ u anłajn-prahramie pa nabory piersanału, jakaja atrymała nazvu Alabuga Start, kab sabrać razam karcinu žyćcia na zavodzie.

Prahrama naboru rabotnikaŭ

Rekrutynhavaja kampanija Alabuga Start abapirajecca na mahutnuju kampaniju ŭ sacyjalnych sietkach, jakaja składajecca ź videarolikaŭ z aptymistyčnaj muzykaj, na jakich afrykanskija žančyny naviedvajuć kulturnyja abjekty Tatarstana abo zajmajucca sportam.

Sacyjalnyja sietki prajekta zapoŭnieny kamientarami ad afrykancaŭ, jakija prosiać pracu i paviedamlajuć, što padali zajaŭki, ale pakul nie atrymali adkazu.

Alabuga Start pieršapačatkova prasoŭvałasia jak prahrama pracy i vučoby ministerstvami adukacyi Uhandy i Efiopii, a taksama afrykanskimi ŚMI, jakija pradstaŭlali jaje jak sposab zarabić hrošy i nabyć novyja navyki. U apošnija miesiacy Alabuga Start prama zajaŭlaje, što heta «NIE adukacyjnaja prahrama».

Asobaja ekanamičnaja zona «Ałabuha» była stvorana ŭ 2006 hodzie dla pryciahnieńnia biznesu i inviestycyj u Tatarstan. Paśla lutaha 2022 hoda jana chutka razrasłasia, i jaje častki pieraklučylisia na vajennuju vytvorčaść, pierabudoŭvajučy abo rekanstrujujučy budynki, miarkujučy pa spadarožnikavych zdymkach.

Pa danych uciečki dakumientaŭ i vašynhtonskaha Instytuta navuki i mižnarodnaj biaśpieki, «Ałabuha» ciapier asnoŭny rasijski zavod pa vytvorčaści dronaŭ-kamikadze, i da 2025 hoda płanujecca vypuskać 6000 bieśpiłotnikaŭ u hod.

Znajści rabotnikaŭ va ŭmovach rekordna nizkaha ŭzroŭniu biespracoŭja, kali mnohija rasijanie ŭžo pracujuć u vajennaj pramysłovaści, vajujuć va Ukrainie ci źbiehli za miažu, było prablemaj. Kiraŭnictva zavoda źviarnułasia pa dapamohu studentaŭ prafiesijnych vučyliščaŭ i tannaj zamiežnaj pracoŭnaj siły.

Pavialičyć

Umovy pracy

U dakumientach, jakija prasačylisia ŭ minułym hodzie i pravierany ekśpiertami, havorycca pra płany pavialičyć kolkaść piersanału pradpryjemstva da bolš za 2600 čałaviek u 2025 hodzie (u 2023 hodzie rabotnikaŭ było krychu mienš za 900 čałaviek).

Jak raskazali sami žančyny, im abiacali pracu ŭ śfiery haścinnaści i hramadskaha charčavańnia ŭ Tatarstanie i biaspłatny bilet na samalot. Kab jaje atrymać, treba było prajści kampjutarnuju hulniu i test na viedańnie ruskaj movy sa 100 słoŭ. Nichto ź ich nie źviarnuŭ uvahi, što ŭ teście byli takija słovy, jak «zavod», «začapić» i «adčapić».

U vyniku niekatoryja ź ich tolki pa prybyćci daviedalisia, što buduć pracavać na zavodzie pa vytvorčaści zbroi — źbirać tysiačy ŭdarnych bieśpiłotnikaŭ iranskaj raspracoŭki.

U intervju ahienctvu Associated Press niekatoryja z žančyn skardzilisia na doŭhi pracoŭny čas pad pastajannym nahladam, na niavykananyja abiacańni adnosna zarpłaty i navučańnia, a taksama na pracu ź jedkimi chimikatami, ad jakich na ich skury źjaŭlajucca plamy i śvierb.

Pa słovach troch apytanych ahienctvam žančyn, rabotnicy znachodziacca pad pastajannym nahladam u internacie i na pracy, a ich pracoŭnaja źmiena składaje 12 hadzin.

Ich taksama padmanuli z zarobkam. Zamiest abiacanych 700 dalaraŭ płaciać 500, ź jakich vyličvajuć košt pražyvańnia ŭ internacie, miedycynskaha absłuhoŭvańnia i ŭrokaŭ ruskaj movy. Taksama im daviałosia viarnuć hrošy za bilety. Adna z rabotnic skazała, što moža adpravić siamji da 150 dalaraŭ u miesiac. Mahčymaść padtrymlivać svajakoŭ utrymlivaje žančyn na pracy.

Pa danych ekśpiertaŭ i rasśledavańnia AP, «Ałabuha» — adzinaja rasijskaja vytvorčaść, jakaja nabiraje žančyn z Afryki, Azii i Paŭdniovaj Amieryki dla vyrabu zbroi.

Kala 90% zamiežnych žančyn, nabranych pa prahramie Alabuga Start, pracujuć nad stvareńniem bieśpiłotnikaŭ, u pieršuju čarhu tych častak, jakija nie patrabujuć asablivych navykaŭ.

AP źviazałasia z MZS RF i ofisami kiraŭnika Tatarstana Rustama Minichanava i hienieralnaha dyrektara asobaj ekanamičnaj zony «Ałabuha» Cimura Šahivalejeva, ale adkazu nie atrymała.

Pravaabarončyja arhanizacyi, ź jakimi źviazałasia ahienctva AP, zajavili, što nie viedajuć pra toje, što adbyvajecca na zavodzie.

AP taksama źviazałasia z uradami 22 krain, hramadzianie jakich byli zavierbavanyja dla ŭdziełu ŭ prahramie Ałabuhi. Bolšaść nie adkazali abo paabiacali razabracca.

• 0
• 0
• 0
• 2
• 0
• 0
• 3
• 0