U RTBD paśla zatrymańnia akcioraŭ admianiajuć samyja kasavyja śpiektakli
19 kastryčnika stała viadoma, što zatrymanyja jak minimum troje akcioraŭ Respublikanskaha teatra biełaruskaj dramaturhii (RTBD). Ciapier teatr admianiaje papularnyja śpiektakli, piša «Lusterka».
Zatrymanyja akciory (ich imiony nie nazyvajucca) zadziejničany ŭ dziasiatkach śpiektaklaŭ, pryčym časta źjaŭlajucca adzinymi vykanaŭcami.
U vyniku ich zatrymańnia RTBD staŭ apieratyŭna mianiać afišu. Na 17 kastryčnika byŭ zapłanavany pakaz śpiektakla «Voś ja i pryjšła!» — jaho zamianili na «Testy dla darosłych». 18 kastryčnika zamiest «Palavańnie na siabie» byli pakazany «Machlary». Siońnia, 20 kastryčnika, zamiest «Šluba ź vietram» znoŭ pakažuć «Machlary».
22 kastryčnika zapłanavanaja pastanoŭka «Pačupki» — adnak siarod vykanaŭcaŭ taksama niama dubloraŭ. Tamu, kali akciory ŭ bližejšy čas nie vyjduć na volu, pryjdziecca admianiać i ich, a taksama inšyja śpiektakli.
Admienienyja śpiektakli — adny z samych kasavych. «Šlub ź vietram» i «Pačupki» karystajucca vialikaj papularnaściu siarod minčukoŭ.
Raniej «Lusterka» paviedamlała pra zvalnieńnie Śviatłany Karukinaj z pasady dyrektara Respublikanskaha teatra biełaruskaj dramaturhii. Pavodle krynic vydańnia, heta adbyłosia jašče ŭ lipieni hetaha hoda. Paćviardžeńniem hetaha stali źmieny na sajcie teatra. Proźvišča i partret Karukinaj źnikli adtul.
U apošni čas RTBD zastavaŭsia adnym z samych papularnych biełaruskich kalektyvaŭ. Adnak represii nie abminuli i jaho.
Uvosień 2020 hoda RTBD pakinuli akciory Mikałaj Stońka i Andrej Novik. Pieršy zrabiŭ heta ŭ znak pratestu suprać cenzury. Druhi «ŭ znak salidarnaści sa strajkoŭcami i zvolnienymi». U traŭni 2021 hoda z krainy źjechaŭ Illa Jasinski. U 2020-m jon udzielničaŭ u pratesnych maršach. Padčas adnaho ź ich jaho zatrymali i złamali pazvanki. U kancy śniežnia 2021 hoda zvolnili mastackaha kiraŭnika teatra Alaksandra Harcujeva. Jon uznačalvaŭ RTBD z 2012 hoda.
U sakaviku-pačatku krasavika 2022 hoda z teatra syšli ci byli zvolnienyja čatyry akciory: Alena Bajarava, Maryja Piatrovič, Maryna Zdarankova i Maksim Šyško. Apošniaha 27 lutaha zatrymlivali na antyvajennaj demanstracyi.
Jak skłaŭsia los chłopca ź viadomaha žyćcieśćviardžalnaha fota studenckaha maršu-2020?6
Kamientary