Novaja zorka prapahandy kaža, što ŭciok z Polščy praz represii. Ale jon akazaŭsia machlarom z pazykami na $370 tysiač
Italjaniec Davide Karbanara aktyŭna razdaje intervju dziarž ŚMI. Ale jon ŭciok z Polščy nie praz palityčny pieraśled, a ad pahrozy sieści na 20 hadoŭ, vyśvietliŭ «Biełsat».
U biełaruskich dziaržaŭnych miedyjaŭ novaja zorka prapahandy — 48-hadovy hramadzianin Italii Davide Karbanara. Jon užo daŭ intervju Ludmile Hładkaj z «SB» i byłomu polskamu sudździ Tomašu Šmitu, jaki pracuje ŭ BiełTA.
Karbanara paŭtaraje zvykłyja štampy pra toje, što ŭ Polščy nie pracuje zakon, pravaachoŭnyja orhany — «represiŭnaja mašyna», što svabody słova niama, što sapraŭdnyja haspadary krainy — amierykancy, a biełarusam vielmi paščaściła z Alaksandram Łukašenkam.
DziaržSMI śćviardžajuć, što Karbanara ŭciok u Biełarusi nibyta ad «sacyjalnaj śmierci», na jakuju jaho asudzili polskija ŭłady. Ale vyjaviłasia, što Karbanara — machlar ź vialikimi daŭhami.
Karbanara raskazvaje pra siabie, što jon naradziniec Miłanu, u Polšču pierajechaŭ 20 hadoŭ tamu, kab uznačalić tamtejšuju filiju italjanskaj firmy, u jakoj jon pracavaŭ. Tak i zastaŭsia, pabraŭšysia šlubam z polkaju, vychoŭvaŭ dźviuch dačok.
Potym zasnavaŭ svaju kampaniju, adnak jana zaznała straty, nie daŭšy rady ŭ pandemiju kovidu, i tady da jaho źjavilisia pretenzii ŭ prakuratury. Pavodle apaviadalnika, śledstva suprać jaho pačałosia na pustym miescy, i jon nie raskryŭ, u čym mienavita jaho zapadozryli.
Zatoje Karbanara achvotna raskazvaje, što ŭ jaho na dva hady zabrali pašpart, i hety čas jon nazyvaje sacyjalnaj śmierciu:
«Ciaham dvuch hadoŭ jany viali raźbirańnie, amal nie dajučy anijakaj infarmacyi. Jany nie infarmavali mianie ab jakim-kolviek prahresie. Amal dva hady jany prosta siadzieli i ničoha nie rabili, adnak za hetyja dva hady jany zabrali ŭ mianie pašpart, pazbavili mianie mahčymaści narmalna pracavać u Polščy. Ja byŭ asudžany praktyčna da sacyjalnaj śmierci, ja nie moh być zastrachavany, jany navat admovilisia dać mnie pašpart dla hałasavańnia na jeŭrapiejskich vybarach».
Urešcie pašpart jamu viarnuli, sprava da suda nie dajšła. Adnak, jak śćviardžaje Karbanara, ź niejkaj pryčyny ź jaho pačali patrabavać hrošy:
«Razbor suprać mianie ŭ apošnija šeść miesiacaŭ nabyŭ palityčny charaktar. I jany vyrazna skazali, što ja mušu zapłacić za svaju svabodu da 15 vieraśnia. Patrabavali bolš za 80 tysiačaŭ złotych za mahčymaść zastacca na voli. Štości ŭ vyhladzie zakładu».
Pavodle italjanca, jamu pahražali, što, kali jon nie zapłacić, prakuratura paprosić sud ab papiarednim aryšcie:
«U toj momant ja zrazumieŭ: u mianie amal niama šancaŭ abaranić siabie i svaju siamju ad taho, što jany chacieli sa mnoju zrabić. I heta było hałoŭnaj pryčynaj, čamu ja pastanaviŭ źjechać».
U Biełarusi jon apynuŭsia 13 vieraśnia. Mužčyna byŭ u Miłanie, adtul palacieŭ u Baku i zatym u Minsk.
«Pakolki ŭsie zachady strymańnia ŭ dačynieńni mianie byli źniatyja, ja moh pryjechać u Biełaruś całkam lehalna. U suviazi z tym što ja ŭpieršyniu ŭ Biełarusi, słužboŭcy, rabotniki mihracyjnaj słužby vielmi pilna, ale ź vialikaj asabistaj kulturaj praviali sa mnoju sumoŭje», — zhadvaje Karbanara.
Jon płanuje prasić palityčnaha prytułku, bo nastojvaje, što paciarpieŭ praz svaju žurnalisckuju dziejnaść. Mužčyna kaža, što supracoŭničaŭ z prajektam «Wbrew Cenzurze» («Suprać cenzury») i vydańniem «Myśl Polska».
«Wbrew Cenzurze» — YouTube-kanał z 24 tysiačami padpisčykaŭ. Siarod videa tam intervju ź ideołaham «ruskaha śvietu» Alaksandram Duhinym (ź im razmaŭlali ažno dvojčy), śpikierkaj MZS Rasiei Maryjaj Zacharavaj, z Tomašam Šmitam, prapahandystam Alaksiejem Dziermantam.
Što datyčyć «Myśl Polska», to redaktar vydańnia Pšemysłaŭ Piasta zajaviŭ, što Karbanara nikoli tam nie pracavaŭ:
«Davide Karbanara nie jość i nie byŭ publicystam anivodnaha z našych miedyjaŭ. Spasyłka na hetaha spadara jak na našaha žurnalista razhladajecca jak uviadzieńnie ŭ padman i jak dziejańnie ŭ škodu «Myśl Polska», imidžu vydańnia i supolnaści, źviazanaj ź im».
U Hładkaj znajšłosia tłumačeńnie taho, što ad «publicysta» ciapier adchryščvajucca: «Pahavorvajuć, što da ich pryjšli polskija śpiecsłužby ŭ redakcyju, i paśla hetaha pačalisia niejkija dzivactvy».
Jak vyśvietliŭ «Biełsat», u Polščy Karbanara naźbiraŭ ceły bukiet spravaŭ. Naprykład, u 2020 hodzie jaho abvinavacili va ŭchileńni ad vypłaty padatkaŭ.
«Miechanizm złačynstva palahaŭ na nabyćci charčoŭ u Polščy, dekłaravańni fiktyŭnych prodažaŭ kampanii Davide K., što pracavała ŭ Italii, i faktyčnym prodažy tavaraŭ polskim kampanijam z užyvańniem nulavoj staŭki PDV, što vykarystoŭvajecca ŭ JEZ pry pastaŭkach unutry źviazu. Chacia nasamreč tavary nikoli nie pakidali Polšču», — paviedamili telekanału ŭ akruhovaj prakuratury horadu Łodzi.
Takaja schiema pazbaviła biudžet Polščy padatkaŭ amal na 7 młn złotych (u pieraliku $ 1,7 młn).
Tady ž Karbanara abvinavacili ŭ machlarstvie: jon atrymaŭ avans za tavary, što ŭ vyniku nie byli pastaŭlenyja.
U prakuratury kažuć, što mužčyna pryznaŭ vinu i raskryŭ śledstvu ŭsie akaličnaści złačynnaj schiemy, prydumanaj im samim i jahonymi saŭdzielnikami. Polskaja «represiŭnaja mašyna» nastolki žorstkaja, što ŭsie fihuranty spravy da suda byli na voli.
Vyrak staŭ viadomy ŭ kastryčniku 2021 hoda:
«Davide K. byŭ asudžany na 1,5 hoda pazbaŭleńnia voli ŭmoŭna z vyprabavalnym terminam 3 hady. Vyrak jon nie abskardžvaŭ».
U akruhovaj prakuratury Łodzi taksama paviedamili, što jašče ŭ 2013 hodzie Karbanara byŭ pad śledstvam u horadzie Piotrkavie-Trybunalskim, raźbirańnie suprać jaho viali prakuratury ŭ Hrujcy, Mielcy i Varšavie.
I najmieniej adna kryminalnaja sprava suprać «palituciekača» nie zakrytaja.
«Kryminalnaja sprava pavodle artykułu «Machlarstva» była zaviedzienaja paśla paviedamleńnia adnoj achviary. Da hetaj spravy dałučyli jašče čatyry, što byli zaviedzienyja na padstavie zajavaŭ dvaccaci inšych achviaraŭ».
Z paviedamleńnia prakuratury zrazumieła, što za hrošy patrabavali ad Karbanara za svabodu. Heta majomasnaja paruka, jakuju možna ŭnieści, kab na čas śledstva nie siadzieć za kratami. Ahułam abvinavačanamu naličyli 85 tysiačaŭ złotych (kala $ 21 tysiačy). U vyniku fihuranta adpuścili, zabraŭšy ŭ jaho pašpart.
«U lipieni 2024 hoda padazravany padaŭ chadajnictva ab skasavańni miery strymańnia ŭ vyhladzie zabarony na vyjezd i ŭtrymańnia pašpartu. U chadajnictvie, da jakoha dadaŭ paśviedčańnie ab śmierci, jon pakazaŭ, što z uvahi na śmierć baćki jon maje zaniacca arhanizacyjaj pachavańnia i pytańniami spadčyny. Pakolki padazravany rehularna źjaŭlaŭsia dla nahladu, hetaja miera była skasavanaja», — prainfarmavali ŭ akruhovaj prakuratury Varšavy.
Tak Karbanara apynuŭsia ŭ Italii, adkul i ŭciok u Biełaruś. Praz heta 1 kastryčnika spravu prypynili. Ciapier «palitemihranta» abvieściać u mižnarodny vyšuk:
«Sprava nie zavieršanaja. Budzie abvieščany nacyjanalny i mižnarodny vyšuk. Padazravanamu pahražaje pakarańnie da 20 hadoŭ pazbaŭleńnia voli».
«Jon majstar krasamoŭstva i manipulacyi», — kaža pra Karbanara łodzinski ŁHBT-aktyvist, staršynia arhanizacyi «Stowarzyszenie Tęczowi Społecznicy» Marjuš Łaŭnik. Jany paznajomilisia, kali Karbanara sam napisaŭ jamu ŭ Facebook. U tyja časy italjaniec słužyŭ u Jevanhieliscka-mietadysckaj carkvie ŭ Łodzi.
«Jon skazaŭ, što chacieŭ by supracoŭničać, bo choča padtrymać ŁHBT-supolnaść. Paśla šmatlikich razmovaŭ ja staŭ jamu daviarać. Jon pryciahnuŭ maju ŭvahu tym, što achviaravaŭ bahata hrošaj našaj asacyjacyi i našamu chostełu dla biazdomnych», — raskazaŭ «Biełsatu» Łaŭnik.
Adnak paźniej vyśvietliłasia, što anijakaj pryjaznaści da pravoŭ mienšaściaŭ u Karbanara niama:
«Mnie ŭ hałavu nie prychodziła, što jon płacić mnie za kantakty. Jon staviŭsia da našaj asacyjacyi i da mianie asabista jak da propusku da deputataŭ, sienataraŭ, sudździaŭ, palitykaŭ, i praź niekatory čas niekatoryja ź ich skazali mnie: ty viedaješ, što tvoj pastar pryjšoŭ da mianie i spytaŭ, ci chočam my ŭkłaści paŭmiljona ŭ jahonyja kampanii? I takich ludziej było šmat».
Łaŭnik śćviardžaje, što śviatar lohka ŭvachodziŭ ŭ davier i pazyčaŭ u ludziej bujnyja sumy:
«Mnie telefanavali advakaty, telefanavali roznyja ludzi. Akazałasia, što ŭ jahonaj kampanii abo kampanijach niešta adbyvałasia, što abumoviła nieabchodnaść zboru srodkaŭ. I hetyja srodki jon atrymlivaŭ ad ludziej. Mnie telefanavali niekalki siemjaŭ, ź jakich jon zdabyŭ pa 100 tysiačaŭ, pa 200 tysiačaŭ złotych».
Pavodle surazmoŭcy, italjaniec umieje stvaryć vakoł siabie «aŭru miłaści», «jon taki nibyta miły, taki lohki, łahodny, pazityŭny».
«Ciapier raptam vyśvietliłasia, što hetaja asoba nibyta zaznała palityčny pieraśled u Polščy. Heta hłupstva, poŭnaja chłuśnia! U palityčnym płanie jon vydatna ŭmieŭ stvarać vakoł siabie dobraje asiarodździe. Nijakich palityčnych napadaŭ u Polščy na jaho nie było. Ni ŭ jakim razie, ni ŭ jakim vypadku, ničoha padobnaha. I ja mahu paklaścisia ŭ sudzie, pakłaŭšy ruku na Bibliju, što nie było takoj situacyi», — śćviardžaje aktyvist.
Łaŭnik taksama zhadaŭ, jak Karbanara braŭ udzieł u akcyi salidarnaści ź Biełaruśsiu pad bieł-čyrvona-biełymi ściahami. Taja demanstracyja adbyłasia ŭ Łodzi ŭ 2020 hodzie:
«My razam byli na demanstracyi ŭ abaronu niezaležnaj, suvierennaj i demakratyčnaj Biełarusi. Jaki ž Karbanara cynik…»
Da žniŭnia 2020 hoda italjaniec słužyŭ u Jevanhielska-mietadysckaj carkvie ŭ Łodzi, adtul jon padaŭsia ŭ Jevanhielskuju mietadysckuju carkvu ŭ Krakavie, ale i tam doŭha nie pratrymaŭsia. U kastryčniku 2021 hoda Karbanara abvinavacili ŭ «złoŭžyvańni davieram carkvy i pryvatnych asobaŭ», a tamu «jon nie maje prava vykarystoŭvać tytuł pastara i nie moža anijakim čynam reprezientavać carkvu».
Supierintendant Jevanhielska-mietadysckaj carkvy ŭ Polščy Andžej Malicki adznačyŭ, što Karbanara nikoli nie byŭ pastaram, a tolki byŭ na vyprabavalnym terminie. Niahledziačy na heta, toj nasiŭ kałaratku, jak kaža Malicki, kab jana dapamahała «raźviazvać roznyja pytańni».
«Na majo mierkavańnie, jon supiermanipulatar, jaki viedaje, jak padmanuć luboha. Jon rabiŭ uražańnie asoby, jakaja ŭmieje damahacca svajho i pry hetym vielmi karysnaja ŭ šmat jakich situacyjach. Ja ničoha nie viedaju pra jaki-kolviek palityčny pieraśled. Jak miarkuju, jon uciok z Polščy praz prablemy z zakonam. Ja zaścierahaju ŭsich ad kantaktaŭ z hetaj asobaju», — skazaŭ śviatar.
Pastar carkvy ŭ Krakavie Piotr Hansioroŭski nazvaŭ Karabanaru machlarom i adznačyŭ, što toj ašukaŭ ludziej na niekalki miljonaŭ złotych:
«Jon nanosiŭ škodu i padmanvaŭ ludziej, karystajučysia, u tym liku, svaim duchoŭnym statusam. Chacia jon tolki rychtavaŭsia da paśviačeńnia, jon achvotna karystaŭsia duchoŭnym adzieńniem, chłusiŭ i padmanvaŭ, karystajučysia vieraj i davieram mnohich ludziej».
Hansioroŭskaha dapytvali, i ad pravaachoŭnikaŭ jon daviedaŭsia, što Karbanara hrošy niedzie chavaŭ:
«Prydbanyja miljony jon kudyści ŭkłaŭ, bo nie było anijakich prykmietaŭ taho, što jon ich vydatkavaŭ na štości. Padobna na toje, što jon nie stvaraŭ tak zvanuju finansavuju piramidu i nie viartaŭ raniej uziatyja pazyki».
Pavodle polskich rejestraŭ jurydyčnych asobaŭ, Davide Karbanara ŭ roznyja časy kiravaŭ niekalkimi kampanijami: «Sunprof», «Tineo», «BDC Solutions».
Pieršyja dźvie byli źlikvidavanyja, a voś u treciuju, «BDC Solutions», u červieni 2022 hoda pavodle sudovaj pastanovy byŭ pryznačany hetak zvany kuratar. U Polščy pracuje taki instytut: admysłovy apiakun prychodzić u firmu, kali jana nie moža vieści dziejnaść praz adsutnaść kiraŭnika. Z udziełam kuratara kampanii časam likvidujuć.
Karbanara uznačalvaŭ «BDC Solutions» da studzienia 2022 hoda. Suŭładalnica firmy — jahonaja žonka Barbara Marja Karbanara, i mienavita dla hetaj kampanii publicyst-śviatar-pradprymalnik prasiŭ hrošy. Darečy, u intervju prapahandystam jon kazaŭ, što choča ŭźjadnacca sa svajoj siamjoju, tamu nielha vyklučać, što ŭ Minsku buduć vitać i svajakoŭ «palityčnaha ŭciekača».
«Biełsat» atrymaŭ kopii niekalkich dakumientaŭ ad achviaraŭ novaha štycha biełaruskaj prapahandy. Vynikaje, što ŭ adnym vypadku Karbanara pazyčyŭ 30 tysiačaŭ złotych (u pieraliku kala $7,5 tysiač) i abiacaŭ viarnuć z adsotkami: 3 tysiačy źvierchu.
U inšaj asoby Karbanara paprasiŭ 50 tysiačaŭ złotych (kala $12,5 tysiač), skazaŭšy, što choča nabyć niejkija niamieckija tavary, i paabiacaŭšy viarnuć na 10 % bolej.
Akramia taho, zhodna z sudovaj pastanovaj kampanija «BDC Solutions» i Davide Karbanara musiać viarnuć 22 tysiačy złotych pazyki z adsotkami i amal 5 tysiačaŭ złotych sudovych vydatkaŭ. Vyrak byŭ vyniesieny zavočna.
Kolki ahułam vinien Karbanara, dakładna nie viadoma. Na sajcie dlugi.info znajšłosia čatyry aŭkcyjony, dzie vystaŭlenyja jahonyja abaviazańni na sumu bolš za 1,5 młn złotych (kala $370 tysiačaŭ).
Hetaja schiema pracuje tak: pazyku možna apublikavać na partale, luby achvočy moža jaje vykupić, a potym patrabavać hetyja hrošy z daŭžnika. Vyhada ŭ tym, što pazyku, naprykład, na $1 000 možna vykupić za $800, a z daŭžnika vytraści ŭsiu sumu — u našym prykładzie $1 000, a $200 pakłaści sabie ŭ kišeniu. Hety prybytak moža być i bolšym, usio zaležyć ad taho, na jakuju źnižku pahodzicca pradaviec pazyki. Takaja pracedura całkam lehalnaja ŭ Polščy.
Adzinaje, što na sajcie nie publikujuć absalutna ŭsie pazyki, heta ŭsio na ŭłasnaje žadańnie, tamu ahulnaja zapazyčanaść Karbanara moža być istotna vyšejšaj.
U Facebook majecca supołka ašukanych polskim italjancam, u joj 145 udzielnikaŭ.
«Davide vam raskazvaŭ, što jamu błaha, što jon čakaje lekavańnia, što ŭ jaho pamior blizki čałaviek ci što jon čakaje hrošaj? Nam taksama!» — pišuć paciarpiełyja.
Telekanał źviarnułŭsia da Karbanara pa kamientar, ale jon nie adkazaŭ.
«Tania, my z taboj!» Ułady zapuścili fłešmob u padtrymku žančyny ŭ čyrvona-zialonym VIDEA27
Kamientary