U Biełarusi naśpieli pryčyny dla abmierkavańnia pytańnia ab admienie śmiarotnaj kary
U Biełarusi naśpieli jak abjektyŭnyja, tak i subjektyŭnyja pryčyny dla abmierkavańnia pytańnia ab śmiarotnaj kary. Pra heta zajaviŭ staršynia kamisii pa zakanadaŭstvie i sudova‑pravavych pytańniach Pałaty pradstaŭnikoŭ Nacyjanalnaha schodu Mikałaj Samasiejka na pres‑kanfierencyi 3 sakavika.
Jon nahadaŭ, što na refierendumie ŭ 1996 hodzie bolš za 80% nasielnictva vykazalisia suprać admieny śmiarotnaj kary. «Ale za 13 hadoŭ prajšli padziei, jakija karennym čynam paŭpłyvali na mierkavańnie hramadstva, źmianilisia zakanadaŭča‑pravavyja asablivaści. U pryvatnaści, u Kryminalnym kodeksie zamacavany časovy charaktar prymianieńnia śmiarotnaj kary źniziłasia z 47 u 1998 hodzie da dvuch u 2008 i 2009 hadach», — skazaŭ deputat.
Samasiejka ličyć, što padčas pryniaćcia rašeńnia, źviazanaha z prymianieńniem śmiarotnaj kary, pavinny ŭličvacca ŭsie faktary: palityčnaja vola, mižnarodnyja dahavory, hramadskaje mierkavańnie. «Mierkavańnie Jeŭrasajuza budzie ŭličvacca, ale nie stanie vyznačalnym», — padkreśliŭ jon.
Deputat nie staŭ admaŭlać mahčymaści praviadzieńnia refierendumu ab admienie śmiarotnaj kary. «Admiena śmiarotnaj kary mahčymaja tolki šlacham źmianieńnia Kanstytucyi praz refierendum. Ale, liču, zaraz patrebna razhladać pytańnie ab mahčymaści ŭviadzieńnia maratoryja. Uvieści maratoryj mohuć prezident abo parłamient», — adznačyŭ jon. Ciapier u parłamiencie dziejničaje pracoŭnaja hrupa pa vyvučeńni prablematyki śmiarotnaj kary. Płanujecca, što praca hrupy praciahniecca da leta. Nie vyklučna, što jaje vynikam stanie praviadzieńnie parłamienckich słuchańniaŭ, na jakich buduć vypracavany rekamiendacyi, skazaŭ parłamientaryj.
Akramia taho, paviedamiŭ jon, prapracoŭvajecca pytańnie ab arhanizacyi sumiesna z Parłamienckaj asamblejaj Savieta Jeŭropy (PASIE) kruhłaha stała pa prablematycy śmiarotnaj kary.
Biełaruś — adzinaja z 47 krain u Jeŭropie, u jakoj prymianiajecca śmiarotnaja kara. U červieni 2009 hoda PASIE pryniała rezalucyju ab viartańni Biełarusi statusu śpiecyjalnaha zaprošanaha ŭ asamblei pry ŭmovie ŭviadzieńnia ŭ respublicy maratoryja na śmiarotnuju karu.
Da ŭviadzieńnia maratoryja taksama zaklikaje Jeŭrasajuz. Heta adna z umoŭ admieny vizavych sankcyj u dačynieńni da biełaruskich čynoŭnikaŭ, jakija ES pradoŭžyŭ da kastryčnika 2010 hoda.
Čamu YouTube vydaliŭ kanały BiełTA, STB i ANT? Voś što viadoma4
Kamientary