Jeŭrakamisar pa pytańniach pašyreńnia ES Marta Kos u intervju «Radyjo Svaboda» nie vyklučyła, što Małdova ŭžo ŭ červieni moža pačać pieramovy ź ES asobna ad Ukrainy, šlach jakoj u ES błakuje Vienhryja. Kišynioŭ nazyvajuć «dobrym vučniem» i navat razhladajuć mahčymaść pryniaćcia Małdovy ŭ Jeŭrasajuz da 2029 hoda.
Jak paviedamiła jeŭrakamisar Marta Kos 28 krasavika, «ES užo abmiarkoŭvaje mahčymaść pačać pieramovy z Małdovaj asobna ad Ukrainy». Taki «padzieł» dvuch krain moža być aficyjna abvieščany ŭžo ŭ červieni. Pa słovach Kos, «niama nivodnaj krainy ES, jakaja była b suprać pačatku pieramoŭ z Małdovaj», tady jak šlach Ukrainy błakuje Vienhryja, spasyłajučysia na nibyta parušeńni pravoŭ vienhierskaj mienšaści ŭ Zakarpaćci.
Ukraina i Małdova padavali zajaŭki na ŭstupleńnie ŭ ES amal adnačasova ŭ 2022 hodzie, nieŭzabavie paśla pačatku poŭnamaštabnaj ahresii Rasii. U 2023 hodzie abiedźvium dziaržavam było dadziena «zialonaje śviatło» dla pačatku pieramoŭ. Ale ciapier pieramovy z Kijevam faktyčna zabłakavanyja, bo «Budapiešt maje prava vieta» i vykarystoŭvaje jaho, kab spynić jeŭrapiejskija ambicyi Ukrainy.
«Ukraina zrabiła šmat. Ja sama ŭdzielničała ŭ dyjałohu pamiž Budapieštam i Kijevam. Ale dla Vienhryi hetaha niedastatkova», — zajaviła Kos, vykazaŭšy škadavańnie, što Vienhryja «hulniami ŭ palityku» spyniaje praces pašyreńnia.
Marta Kos nie vyklučaje, što «Małdova moža stać členam ES užo da 2029 hoda», padkreślivajučy hatoŭnaść Kišyniova da reformaŭ i ščyraje žadańnie dałučycca da «supolnaści demakratyčnych kaštoŭnaściej».
«Małdova — sapraŭdy dobry vučań u hetaj hrupie. U ich adčuvajecca histaryčny momant. I jany hatovy zrabić usio mahčymaje», — skazała jana.
U intervju taksama zakranałasia tema Hruzii, jakaja choć i atrymała status kandydata, ale sutyknułasia z zamarožvańniem pracesu z-za prablem z demakratyjaj i zakonam ab «zamiežnych ahientach», padobnym da rasijskaha. ES navat adnaviŭ vizavyja patrabavańni dla hruzinskich dypłamataŭ i prypyniŭ vyšejšyja kantakty z uładami Tbilisi.
Adnak Kos prapanavała nie vyklučać mahčymaść pastupovaha dyjałohu. Jana pryviała ŭ prykład Turcyju, ź jakoj ES adnaviŭ razmovy pa pytańniach ekanomiki i mihracyi, niahledziačy na zamarožany status kandydata.
Ciapier čytajuć
Što Babaryka i Kaleśnikava adkazali na pytańni pra vajnu97
Kamientary