Буйнога мінскага бізнэсмена, які займаўся вырабамі са шкла, пасадзілі за палітыку
Раман Грыцаль доўгі час кіруе бізнэсам па вытворчасці вокнаў. Суд над ім адбыўся тры месяцы таму, але ягоная асоба стала вядомай толькі цяпер. Яму пагражала да пяці гадоў калоніі.
Раману Грыцалю 48 гадоў. Па звестках Digital Intelligence Team, родам ён з вёскі Раздольнае Прыморскага краю Расіі, але даўно жыве ў Беларусі і мае беларускае грамадзянства. Скончыў Беларускі дзяржаўны эканамічны ўніверсітэт.
Пасля ўніверсітэта пайшоў у бізнэс. Больш за дзесяць гадоў, з 2003 года, ён працаваў дырэктарам беларуска-амерыканскага Завода шклопакетаў і архітэктурнага шкла (GlassBel). Гэта прадпрыемства займалася вырабамі са шкла для архітэктуры, будаўніцтва, праектным дызайнам, рашэннямі для транспарта і іншым.
Напрыклад, тэхналогія, распрацаваная на прадпрыемстве, лягла ў аснову стварэння шклопакетаў для ашклянення расійскага марскога флоту. А ў 2007-м Раман атрымаў грамату на конкурсе «За найлепшае дасягненне ў будаўнічай галіне» за тое, што на заводзе наладзілі вытворчасць шклопакетаў з падагрэвам.
У 2008 годзе Раман атрымаў прэмію «Прадпрымальнік года» як адзін з найлепшых прадпрымальнікаў-экспарцёраў — каля 80% прадукцыі завода ішло на экспарт, у асноўным у Расію і Украіну. У той жа год яе атрымалі і Віктар Бабарыка з Белгазпрамбанкам у катэгорыі «Найлепшы банк для прадпрымальнікаў».
З 2013 года Раман стаў дырэктарам Завода супрацьпажарных вырабаў. Ён вырабляе супрацьпажарныя канструкцыі з выкарыстаннем шкла — дзверы, вокны, перагародкі, лесвіцы і іншае.
Да арышту ў 2024-м Грыцаль быў дырэктарам фірмы «Глас Інжынірынг» і яе філіяла ў Расіі, фірмы «Совтрансмаш», таксама мае ІП. Увесь бізнэс па той жа тэме — ашкляненне, праектаванне і мантаж канструкцый са шклом для кватэраў, будынкаў і транспарта.
У мужчыны ёсць жонка і двое дзяцей — паўналетняя дачка і непаўналетні сын. Жонка займаецца бізнэсам разам з ім.
Дата затрымання Грыцаля невядомая, але апошні раз ён нешта пісаў у чатах у тэлеграме ў ліпені 2024 года. Быў затрыманы не пазней за восень 2024 года.
Суд над ім пачаўся 6 сакавіка 2025 года. Яму закідалі два артыкулы — «распальванне варожасці» (ч. 1 арт. 130 КК) і «арганізацыя або ўдзел у дзеяннях, што груба парушаюць грамадскі парадак» (ч. 1 арт. 342 КК). Раману пагражала да пяці гадоў калоніі, але сутнасць абвінавачання невядомая.
Бізнэсмену прысудзілі хімію з накіраваннем ці калонію. Аднак паколькі Раман пасля суда так не ўвайшоў у сацсеткі і месенджары, а ў тэлеграме быў «вельмі даўно», можна меркаваць, што яму далі тэрмін у калоніі.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім18
Каментары