Kyrhyzstan ź siaredziny

Pieršy dzień novaj ułady ŭ paviedamleńniach kirhizskaha dziaržaŭnaha ahienctva Kabar.

* * *

Nastupiŭ pieršy dzień novaj viachi ŭ historyi Kyrhyzstana. Adnoŭleny ruch hramadskaha transpartu. Haradžanie śpiašajucca pa svaich spravach, u tym liku ŭ Centr pieralivańnia kryvi.

Kyrhyzstancy, jakija ŭžo majuć za plačyma horki dośvied, vyniesieny z padziejaŭ 2005 hodu, nie zaśpietyja źnianacku. Niahledziačy na adsutnaść inśpiektaraŭ darožnaha ruchu, kiroŭcy trymajucca praviłaŭ. Siarod nasielnictva adčuvajecca hramadzianskaja zhurtavanaść, adkaznaść, patryjatyčnaja śviadomaść.

* * *

Adchileny ad zajmanaj pasady hubiernatar Ošskaj vobłaści Mamasadyk Bakiraŭ, na jaho miesca pryznačany Kušbak Tezekbajeŭ. Da takoha rašeńnia pryjšli ŭdzielniki mitynhu na Centralnaj płoščy horadu, jaki prachodzić ciapier i dzie, pavodle papiarednich dadzienych, udzielničaje kala piaci tysiač čałaviek.

Mitynham kiruje Asiłbiek Žeenbiekaŭ. Dziejny mer Oša Mieliśbiek Myrzakmataŭ «časova vyzvaleny ad zajmanaj pasady».

* * *

Siońnia ŭ Biškieku na aŭtobusnych prypynkach vialikaj kolkaści ludziej nie zaŭvažana. Učora časova byli zakrytyja škoły i dziciačyja sady, a taksama raspuščanyja studenty vyšejšych navučalnych ustanovaŭ.

* * *

U žyvym efiry Pieršaha nacyjanalnaha kanała vystupajuć deputat parłamienta Damira Nijazalijeva i namieśnik ministra achovy zdaroŭja Sabiržan Abdykarymaŭ, jakija raskazvajuć pra vyniki minułaj nočy, achviary, dziejnaść supracoŭnikaŭ słužby chutkaj dapamohi i hetak dalej.

Pracujuć telefony haračaj linii, adnak efir kanała časta pieraryvajecca nieruchomaj zastaŭkaj z nadpisam «NTRK chutka praciahnie svaje prahramy».

Telekanał NBT, što ŭsiu noč pakazvaŭ zapis učarašnich biesparadkaŭ «biez kamientaroŭ», a taksama «Piaty kanał» nie pracujuć. Kanał «EłTR» pakazvaje pieradaču pra budaŭnictva piramid.

* * *

Časovy ŭrad budzie dziejničać na praciahu šaści miesiacaŭ. Pra heta siońnia na sustrečy z žurnalistami zajaviła staršynia časovaha ŭradu Roza Atunbajeva.

Pa jaje słovach, na praciahu hetaha času buduć uniesienyja źmieny ŭ Kanstytucyju Kyrhyzstana, u pryvatnaści ŭ Kodeks «Ab vybarach», u zakony «Ab palityčnych partyjach», «Ab praviadzieńni mitynhaŭ, šeściaŭ i mirnych demanstracyj».

* * *

Mnohija ŭładalniki i rabotniki kramaŭ i handlovych centraŭ uzbroilisia i arhanizavali načnoje dziažurstva. U vyniku ich rašučych dziejańniaŭ niekatoryja handlovyja kropki apynulisia maradzioram «nie pa zubach».

Taksama adznačym vialiki ŭniosak vieteranaŭ-afhancaŭ i čalcoŭ biškiekskaha sportkamiteta, jakija arhanizavali narodnyja družyny. Praz svaju niešmatlikaść družyńniki byli vymušanyja ŭžyvać «latučuju» taktyku: mašyna ź niekalkimi ŭzbrojenymi družyńnikami padjazdžała da maradzioraŭ, im davali niekalki čerhaŭ pa nahach i chutka adjazdžali dalej. «Na žal, my nie zmahli dapamahčy vielmi mnohim — nas było zanadta mała, i my nie paśpiavali vyjazdžać pa ŭsich vyklikach», — zajaviŭ kiraŭnik štabu pa abaronie stalicy hienierał-pałkoŭnik Abdyhuł Čatbajeŭ.

* * *

Rašeńniem kalektyvu Kyrhyzskaha infarmacyjnaha ahienctva «KABAR» dyrektaram Ahienctva časova pryznačany Ajbiek Sułtanhazijeŭ. Hetym ža rašeńniem Naryn Idzinaŭ časova źniaty z pasady dyrektara. Kalektyŭ ahienctva prosić Urad narodnaha davieru padtrymać hety vybar.

• 0
• 0
• 0
• 0
• 0
• 0
• 0
• 0