Vułkaničnaje vobłaka pyłu pratrymajecca nad terytoryjaj Biełarusi daŭžej
«Hałoŭnaje — jaki viecier naviersie, na vyšyni vobłaka».
Vobłaka pyłu ad vyviaržeńnia vułkana ŭ Isłandyi znachodzicca nad terytoryjaj Biełarusi na vyšyni kala 6 kiłamietraŭ i pratrymajecca prykładna da 18 hadzin. Jak paviedamiła načalnik adździeła pa analizie infarmacyi i prahnazavańni ŭzroŭniu zabrudžańnia Respublikanskaha centra radyjacyjnaha kantrolu i manitorynhu navakolnaha asiarodździa Bahdana Kaziaruk, takija źviestki Łondanskaha kansultacyjna-raźlikovaha centra.
«Na siońnia Łondanski kansultacyjna-raźlikovy centr — adziny ŭ Jeŭropie, chto zajmajecca trajektoryjaj pieramiaščeńnia vułkaničnaha vobłaka», — patłumačyła Kaziaruk. Pavodle jaje słoŭ, źviestki ŭdakładniajucca kožnyja šeść hadzin.
Načalnik adździeła taksama paviedamiła, što siońnia ŭ Biełarusi paŭnočna-zachodni viecier. «Ale hałoŭnaje — jaki viecier naviersie, na vyšyni vobłaka. Kala ziamli jon moža być inšy», — dadała jana.
Prahnazavać raźvićcio situacyi, pavodle słoŭ śpiecyjalista, pakul praktyčna niemahčyma. «Ciapier sucelnaja vobłačnaść, i my nie možam ubačyć, što tam, na vyšyni, a hruntujemsia tolki na raźlikovych źviestkach. Takaja situacyja nie tolki ŭ nas», — skazała Bahdana Kaziaruk.
Jak paviedamlałasia raniej, siońnia ŭ Biełarusi da 16.00 admienieny ŭsie avijarejsy ŭ zachodnim napramku. Zatym pytańnie budzie vyrašacca z ulikam umoŭ nadvorja, paviedamili ŭ Ministerstvie transpartu i kamunikacyj.
Kamientary