Kredyt nie biaruć, kab padymać zarobki

Urad čakaje rost VUP na 6% za paŭhoda i nie choča abciažarvacca abaviazacielstvami pierad MVF uzamien za novy kredyt.

Pierad biełaruskimi ŭładami stajała dylema: ci brać čarhovuju porcyju MVFaŭskich hrošaj, ci nie. Padobna, jana vyrašajecca na karyść admovy ad dalejšaha supracoŭnictva.

Raniejšyja vykazvańni čynoŭnikaŭ dazvalali mierkavać, što ŭłada schilnaja ŭziać hrošy. Ale ciapier ministr finansaŭ Andrej Charkaviec adkryta zajaviŭ: «Vidavočnaj patreby dla Biełarusi ŭ novaj prahramie «stend‑baj» MVF niama». Maŭlaŭ, papiaredniaja prahrama Mižnarodnaha valutnaha fondu adyhrała svaju stanoŭčuju rolu, ale z taho času mnohaje źmianiłasia. «Situacyja ŭ ekanomicy siońnia stabilniejšaja, biudžet vykonvajecca ŭ tych paramietrach, jakija my čakali, idzie pastupalny rost ekanomiki», — skazaŭ ministr.

Aptymizmu jamu dadaŭ i Biełstat, jaki padličyŭ rost VUP u pieršym kvartale. Akazałasia — plus 4% proci letašniaha pakazčyka. Na radaściach Ministerstva ekanomiki paabiacała da kanca paŭhodździa naraścić VUP da 6%. Jakija ličby buduć u kancy hoda, mierkavać składana. Raźbiežka składaje ad 12%, jakich patrabuje Łukašenka, da 2,4%, što pradkazvaje MVF.

MVF pieraškadžaje zarobku $500

Mižnarodny valutny fond, pry ŭsioj hatoŭnaści vydać Biełarusi kredyt, zapatrabavaŭ by niaŭchilnaha vykanańnia abaviazacielstvaŭ. I hałoŭnaje — abmiežavaŭ by papuliscki rost zarobkaŭ biełarusaŭ da $500 u pieradvybarny hod. Pakul što siaredniestatystyčny biełaruski rabotnik zarablaje $348.

Pakazčyka $500 dasiahnuć realna, ale takoje nadzimańnie zarobkaŭ parušaje haspadarčy bałans.

A pakul inšyja pakazčyki ekanamičnaha raźvićcia pačynajuć viartacca da pieraddevalvacyjnaha ŭzroŭniu. Ad 19 krasavika Nacbank pamienšyŭ pamier staŭki refinansavańnia na 0,5%. Ciapier jana budzie składać 12,5%. Pierad zmročnym 2 studzienia 2009 hoda staŭka była roŭnaja 12%.

Što źmienicca ŭśled za hetym rašeńniem? Stanuć bolš dastupnymi kredyty, pracent jakich źmiaščaje ŭ sabie staŭku refinansavańnia, ale pamienšacca i staŭki ŭkładaŭ.

Tym nie mienš, pakazčyk refinansavańnia ŭsio roŭna adstaje ad tych, što byli zafiksavanyja ŭ prahnoznych dakumientach. U Prahramie raźvićcia bankaŭskaha siektara ekanomiki Biełarusi na 2006—2010 hady było paznačana, što ŭ kancy 2010 hoda staŭka refinansavańnia budzie składać 4—6%.

• 0
• 0
• 0
• 0
• 0
• 0
• 0
• 0