Беларуску павінны судзіць у ЗША за кантрабанду авіядэталяў у Расію, але аддзел міграцыі хоча яе як нелегалку дэпартаваць да суда
Беларуску, экстрадаваную ў ЗША за кантрабанду авіядэталяў пасля пачатку вайны, могуць проста дэпартаваць.
Грамадзянка Беларусі Яна Лявонава, якую экстрадавалі з Францыі ў ЗША паводле абвінавачвання ў кантрабандзе авіяцыйнага абсталявання ў Расію ў абыход санкцый, апынулася ў нечаканай прававой калізіі. Яе могуць дэпартаваць з ЗША яшчэ да пачатку судовага працэсу, паведамляе The Washington Post.
Федэральныя пракуроры больш за год працавалі над экстрадыцыяй беларускі, абвінавачанай у кантрабандзе канфідэнцыйнага амерыканскага авіяцыйнага абсталявання на суму больш як 2 мільёны даляраў у Расію падчас вайны супраць Украіны. Але справа можа разваліцца, бо абвінавачаная Яна Лявонава цяпер рызыкуе быць дэпартаванай да пачатку суда.
Лявонава была затрыманая ў Францыі ў верасні 2024 года, а ў лістападзе 2025 года яе экстрадавалі ў ЗША, дзе ёй выставілі абвінавачванне паводле 10 пунктаў, у тым ліку ў махлярстве, кантрабандзе і адмыванні грошай.
Праблема ў тым, што легальны тэрмін знаходжання Лявонавай у ЗША, куды яе даставілі супраць яе волі для суда, скончыўся праз два тыдні пасля яе прыбыцця. У дачыненні да яе быў выдадзены запыт на затрыманне з мэтай дэпартацыі.
На судовым пасяджэнні 8 снежня суддзя Зіа М. Фарукі назваў сітуацыю «кафкіянскай».
«Урад павінен вызначыцца з прыярытэтамі: або накручваць статыстыку дэпартацый, або пераследаваць меркаваных злачынцаў, — заявіў суддзя. — Проста абсурдна і абразліва, што ўрад дастаўляе кагосьці ў Злучаныя Штаты супраць яго волі, а потым вяртаецца да затрымання ICE [іміграцыйнай службай] на той падставе, што гэты чалавек знаходзіцца тут «нелегальна».
Пракуратура просіць Міністэрства ўнутранай бяспекі (DHS) надаць Лявонавай легальны статус для правядзення суда.
Прадстаўнік DHS заявіў, што не пярэчыць, але чакае фармальнага запыту ад праваахоўнага ведамства.
Абарона Лявонавай апісвае яе як «супрацоўніцу нізкага рангу», якая не атрымлівала прыбытку, акрамя заробку, і заяўляе, што яна не хоча трапіць у іміграцыйную турму.
Суддзя Фарукі пастанавіў, што калі DHS адмовіцца даць Лявонавай часовы легальны статус, суд разгледзіць магчымасць надаць такі статус самастойна.
Згодна з абвінавачваннем, пасля пачатку поўнамаштабнага ўварвання Расіі ва Украіну Лявонава пры спрыянні саўдзельнікаў, якія знаходзіліся на тэрыторыі ЗША, арганізавала незаконныя закупкі і вываз у Расію авіяцыйнага абсталявання і іншых дэталяў.
Што цяпер з італьянскімі візамі? Масавыя адмовы? Турфірмы называюць альтэрнатыву6
Што цяпер з італьянскімі візамі? Масавыя адмовы? Турфірмы называюць альтэрнатыву
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1212
Каментары