Hienieralnaja asambleja Mižnarodnaj šachmatnaj fiederacyi (FIDE) u niadzielu prahałasavała adrazu za dźvie rezalucyi, jakija praduhledžvajuć dopusk biełaruskich i rasijskich zbornych da mižnarodnych spabornictvaŭ.
Abiedźvie rezalucyi praduhledžvajuć źniaćcie ŭsich abmiežavańniaŭ, u tym liku na vykarystańnie nacyjanalnaj simvoliki, dla junackich kamand Biełarusi i Rasii. Niekalkimi dniami raniej Mižnarodny alimpijski kamitet (MAK) parekamiendavaŭ admianić abmiežavańni dla junackich i paralimpijskich kamand z Rasii i Biełarusi, adznačyŭšy, što kančatkovaje rašeńnie zastajecca za spartyŭnymi fiederacyjami.
Taksama FIDE pryniała rašeńnie viarnuć zbornyja Rasii i Biełarusi ŭ kamandnyja spabornictvy siarod darosłych.
Prajekt Fiederacyi šachmat Rasii praduhledžvaŭ, što i darosłyja kamandy buduć vystupać pad nacyjanalnymi ściahami, u toj čas jak prajekt savieta FIDE praduhledžvaŭ vystupleńni ź niejtralnaj simvolikaj.
Delehaty ŭ vyniku padtrymali abodva prajekty (za rasijski prahałasavała 61 delehacyja, suprać — 51; za prajekt FIDE — 69 delehacyj pry 40 hałasach suprać), što stvaryła jurydyčnuju kaliziju. U pres-słužbie FIDE zajavili, što źviernucca ŭ MAK pa kansultacyi nakont mahčymaści vykarystańnia rasijskaj nacyjanalnaj simvoliki ŭ spabornictvach siarod darosłych.
FIDE taksama źniała abmiežavańni na praviadzieńnie turniraŭ pad ehidaj arhanizacyi ŭ Biełarusi.
Abmiežavańni byli ŭviedzienyja ŭ sakaviku 2022 hoda ŭ suviazi z paŭnamaštabnym rasijskim uvarvańniem va Ukrainu. Rasijskija šachmatysty praciahvali ŭdzielničać u spabornictvach u niejtralnym statusie (pad ściaham FIDE), adnak u kamandnych turnirach udzielničać nie mahli. U listapadzie hetaha hoda FIDE, adnak, dazvoliła žanočaj zbornaj Rasii pryniać udzieł u kamandnym pieršynstvie śvietu pad ściaham FIDE, niahledziačy na pratesty Ukrainy i šerahu jeŭrapiejskich fiederacyj.
Ciapier čytajuć
U Varšavu pryjechała sotnia biełaruskich palitviaźniaŭ8
Kamientary