Людзі, што забілі 15 чалавек на пляжы ў Сіднеі падчас Ханукі, — гэта бацька і сын
Ахвярамі страляніны на пляжы Бондзі-Біч у Сіднэі ў нядзелю сталі 15 чалавек, таксама загінуў адзін з тых, хто страляў. Па папярэдніх даных, стралялі двое. У паліцыі заявілі, што гэта — бацька і сын. 50‑гадовы мужчына быў забіты на месцы, а яго 24‑гадовы сын у крытычным стане быў дастаўлены ў бальніцу, паведамляе Бі-бі-сі.
Сведкі распавялі, што напад на знакамітым пляжы, перапоўненым у спякотны вечар, доўжыўся каля 10 хвілін.
У нядзелю ў 18:47 па мясцовым часе паліцыя Сіднэя атрымала паведамленне аб стральбе на святкаванні Ханукі ў невялікім парку каля пляжу, на якое сабраліся больш за тысячу чалавек.
Пазней з'явілася відэа, на якім два чалавекі на працягу некалькіх хвілін стралялі па людзях з мастка, які вядзе да пляжу. На іншым відэа да аднаго са стралкоў, які спусціўся з мастка ў бок пляжу, падкрадваецца іншы, накідваецца на яго ззаду і адбірае вінтоўку ці стрэльбу. Стралок пасля гэтага сыходзіць.
Колькасць ахвяр стральбы расла. Па апошніх даных, як заявіў міністр аховы здароўя штата Новы Паўднёвы Уэльс Раян Парк, ахвярамі стралкоў сталі 15 чалавек, адзін са стралкоў таксама забіты.
Як паведаміла на брыфінгу паліцыя, стралок 50‑гадовы мужчына быў забіты на месцы, а яго 24‑гадовы сын знаходзіцца ў крытычным стане ў бальніцы.
Яшчэ 40 чалавек застаюцца ў бальніцы пасля нападу, у тым ліку двое паліцыянтаў, якія знаходзяцца ў цяжкім, але стабільным стане. Узрост ахвяр складаў ад 10 да 87 гадоў, заявілі ў паліцыі.
Афіцыйныя асобы ахарактарызавалі стральбу ў нядзелю як мэтанакіраваны антысеміцкі напад. У паліцыі заяўлялі, што лічаць напад тэрактам супраць яўрэйскай абшчыны Сіднея, а ў аўтамабілі, як мяркуецца, які належаў нападніку, маглі знаходзіцца «некалькі самаробных выбуховых прылад».
50‑гадовы нападнік быў членам стралковага клуба і адпавядаў крытэрыям для атрымання ліцэнзіі на агнястрэльную зброю для аматарскага палявання, заявіў камісар паліцыі штата Мэл Лэньён.
Паводле яго слоў, у мужчыны з 2015 года была «ліцэнзія катэгорыі AB, якая давала яму права на валоданне даўгарульнай зброяй», яны з сынам у Аўстраліі ўжо даволі даўно. «На гэтым этапе мы вельмі мала пра іх ведаем», — дадаў Лэньён.
Пазней міністр унутраных спраў Аўстраліі Тоні Берк удакладніў, што старэйшы са стралкоў прыбыў у краіну ў 1998 годзе па студэнцкай візе, а яго сын — грамадзянін Аўстраліі па нараджэнні.
Мінаком, які на відэа абяззбройвае аднаго са стралкоў, аказаўся мясцовы жыхар, 43‑гадовы бацька дваіх дзяцей, уладальнік фруктовай крамы Ахмед аль-Ахмед. Стралок, які заставаўся на мастку, параніў яго ў плячо і руку. Аль-Ахмед быў дастаўлены ў бальніцу, яго жыццю, паводле папярэдніх даных, нішто не пагражае.
Прэм'ер-міністр штата Новы Паўднёвы Уэльс Крыс Мінс назваў яго сапраўдным героем. «Дзякуючы гэтаму адважнаму чалавеку сёння многія і многія засталіся жывыя», — сказаў Мінс.
Мерапрыемства праходзіла на газоне каля пляжу побач з пешаходным мостам, з якога вялі агонь.
Вакол месца правядзення мерапрыемства была ўстаноўлена металічная агароджа, і людзі павінны былі ўваходзіць і выходзіць праз вароты, дзе, відаць, правяралі сумкі, але ў цэлым меры бяспекі здаваліся нямоцнымі.
Карэспандэнт Бі-бі-сі, якая знаходзілася на суседнім пляжы, налічыла каля 20 гучных хлапкоў, якім спачатку ніхто не надаў значэння. Людзі захваляваліся, толькі калі пачулі паліцэйскія верталёты, якія праляталі над імі.
Стральба ў Сіднэі стала самым маштабным актам гвалту ў Аўстраліі за апошнія амаль 30 гадоў.
Улады заявілі, што ўпэўненыя ва ўдзеле ў інцыдэнце толькі двух нападнікаў, хоць раней паведамлялі аб праверцы датычнасці трэцяй асобы. Колькасць паліцыі ў яўрэйскіх абшчынах павялічана.
Прэм'ер-міністр Аўстраліі Энтані Альбанезе наведаў пляж Бондзі-Біч у панядзелак раніцай і ўсклаў кветкі недалёка ад месца нападу. Раней Альбанезе назваў напад «змрочным момантам для нашай краіны» і заявіў, што паліцыя і службы бяспекі старанна правяраюць матывы нападаючых.
«Тое, што мы ўбачылі ўчора, было актам чыстага зла, актам антысемітызму, актам тэрарызму на нашых берагах у знакавым аўстралійскім месцы», — сказаў Альбанезе журналістам.
Альбанезе заявіў, што некалькі сусветных лідараў, у тым ліку прэзідэнт ЗША Дональд Трамп, звязаліся з ім, і падзякаваў іх за салідарнасць.
«У Аўстраліі адбыўся жудасны напад, — сказаў Трамп падчас прыёму ў Белым доме ў нядзелю. — І гэта, відавочна, быў антысеміцкі напад».
Як заявіў прэм'ер-міністр Ізраіля Біньямін Нетаньяху, ён папярэджваў прэм'ера Альбанезе аб тым, што падтрымка Аўстраліяй палесцінскай дзяржаўнасці будзе падсілкоўваць антысемітызм.
У жніўні Аўстралія абвінаваціла Іран у арганізацыі як мінімум двух антысеміцкіх нападаў і дала паслу Тэгерана тыдзень на тое, каб пакінуць краіну. «Іран спрабаваў схаваць свой удзел, але, на думку нашай разведкі, менавіта ён стаяў за гэтымі нападамі», — казаў тады прэм'ер-міністр Аўстраліі.
Каментары