Генеральная асамблея Міжнароднай шахматнай федэрацыі (ФІДЭ) у нядзелю прагаласавала адразу за дзве рэзалюцыі, якія прадугледжваюць допуск беларускіх і расійскіх зборных да міжнародных спаборніцтваў.
Абедзве рэзалюцыі прадугледжваюць зняцце ўсіх абмежаванняў, у тым ліку на выкарыстанне нацыянальнай сімволікі, для юнацкіх каманд Беларусі і Расіі. Некалькімі днямі раней Міжнародны алімпійскі камітэт (МАК) парэкамендаваў адмяніць абмежаванні для юнацкіх і паралімпійскіх каманд з Расіі і Беларусі, адзначыўшы, што канчатковае рашэнне застаецца за спартыўнымі федэрацыямі.
Таксама ФІДЭ прыняла рашэнне вярнуць зборныя Расіі і Беларусі ў камандныя спаборніцтвы сярод дарослых.
Праект Федэрацыі шахмат Расіі прадугледжваў, што і дарослыя каманды будуць выступаць пад нацыянальнымі сцягамі, у той час як праект савета ФІДЭ прадугледжваў выступленні з нейтральнай сімволікай.
Дэлегаты ў выніку падтрымалі абодва праекты (за расійскі прагаласавала 61 дэлегацыя, супраць — 51; за праект ФІДЭ — 69 дэлегацый пры 40 галасах супраць), што стварыла юрыдычную калізію. У прэс-службе ФІДЭ заявілі, што звернуцца ў МАК па кансультацыі наконт магчымасці выкарыстання расійскай нацыянальнай сімволікі ў спаборніцтвах сярод дарослых.
ФІДЭ таксама зняла абмежаванні на правядзенне турніраў пад эгідай арганізацыі ў Беларусі.
Абмежаванні былі ўведзеныя ў сакавіку 2022 года ў сувязі з паўнамаштабным расійскім уварваннем ва Украіну. Расійскія шахматысты працягвалі ўдзельнічаць у спаборніцтвах у нейтральным статусе (пад сцягам ФІДЭ), аднак у камандных турнірах удзельнічаць не маглі. У лістападзе гэтага года ФІДЭ, аднак, дазволіла жаночай зборнай Расіі прыняць удзел у камандным першынстве свету пад сцягам ФІДЭ, нягледзячы на пратэсты Украіны і шэрагу еўрапейскіх федэрацый.
Цяпер чытаюць
Кіраўніка следчай групы па справе Tut.by пасадзілі на 14 гадоў6
Каментары