Śviatłanu Cichanoŭskuju ŭ intervju SBS Russian spytali, ci zastaŭsia supraciŭ u Biełarusi i pra rolu biełarusaŭ u vajnie Rasii suprać Ukrainy.
Śviatłana Cichanoŭskaja zapeŭnivaje, što biełaruski supraciŭ, biełaruski demakratyčny ruch — heta nie tolki palityčnaja dypłamatyja za miažoj.
«Heta štodzionnaja praca śmiełych ludziej unutry krainy, bo mienavita jany składajuć kaściak našaha supracivu. Siońnia ruch haryzantalny i decentralizavany. U krainie niemahčyma adkryta pratestavać, tamu supraciŭ pryniaŭ inšyja formy. Biełaruskija partyzany, kibieraktyvisty, vałanciory, žurnalisty — usie my robim adnu ahulnuju spravu. Naša niezaležnaść pad pahrozaj, svaboda pad pahrozaj. I luby akt salidarnaści pakazvaje: navat pad poŭnym kantrolem dyktatury biełarusy nie zdalisia», — kaža jana.
Cichanoŭskaja zhadała, što ź pieršych dzion vajny biełarusy pakazvali, što jany nie saŭdzielniki ahresii, a jaje praciŭniki.
«Mienavita biełaruskija partyzany i kibieraktyvisty ŭ 2022 hodzie zapavolili pierakidku rasijskich vojskaŭ i techniki pa našaj terytoryi. Heta byŭ akt hramadzianskaj mužnaści — asabliva paśla dvuch hadoŭ žorstkich represij», — kaža jana.
Cichanoŭskaja dadaje, što i zaraz ludzi ŭ Biełarusi pracujuć u padpolli — chtości viadzie infarmacyjny supraciŭ, chtości dapamahaje siemjam palitviaźniaŭ, chtości dakumientuje złačynstvy režymu i rasijskich vajskoŭcaŭ. «I ja chaču padkreślić, što heta ŭsio ž taki akt mužnaści, bo za luby supraciŭ, za lubuju salidarnaść z palitviaźniami ludziej mohuć pasadzić u turmu na hady i hady. Heta nie miesiacy i dni, heta piać, 10, 15 hadoŭ», — padkreślivaje jana.
Ciapier čytajuć
Jak u halečy śpivałasia radnia Łukašenki? Małaviadomyja fakty10
Kamientary