Bolšaść kiraŭnikoŭ dziaržaŭ ADKB na niefarmalnym samicie arhanizacyi 8 maja stanoŭča acanili rašeńnie Alaksandra Łukašenki pryniać na svajoj terytoryi Kurmanbieka Bakijeva.
Pra heta paviedamiŭ na pres‑kanfierencyi ŭ Maskvie 14 maja hienieralny sakratar ADKB Mikałaj Bardziuža.
«Amal usie padtrymali i skazali pra toje, što prezident Biełarusi zrabiŭ prosta pa‑mužčynsku i vysakarodna, akazaŭšy sadziejańnie, pa‑pieršaje, samomu Kurmanbieku Salijeviču, pa‑druhoje, jaho najbližejšym rodnym», — cytuje Bardziužu RIA Novosti.
Adkazvajučy na pytańnie pra toje, «ci nie paŭpłyvaje asablivaja pazicyja Łukašenki» na adnosiny da Biełarusi ŭ ramkach ADKB, Bardziuža skazaŭ: «Ja nie baču nijakaj asablivaj pazicyi Biełarusi. Prezident Biełarusi skazaŭ toje, što paćvierdzili astatnija kiraŭniki dziaržaŭ, — toje, što ŭ Kyrhyzstanie prajšła nielehitymnaja, niekanstytucyjnaja źmiena ŭłady. Heta suvierennaja sprava Biełarusi, ale heta nie asablivaja pazicyja ŭ dačynieńni, naprykład, da ADKB ci da inšych kiraŭnikoŭ dziaržaŭ, jakija vykazvalisia inakš». Nahadajem, 11 maja ŭ Minsku Alaksandr Łukašenka zajaviŭ, što krainy ADKB padtrymali pazicyju Biełarusi pa situacyi ŭ Kyrhyzstanie i dadzieny fakt adznačany ŭ sumiesnym dakumiencie, jaki padpisany pa vynikach samita ADKB 8 maja ŭ Maskvie. «Heta nie tolki pazicyja Łukašenki. Usie kiraŭniki dziaržaŭ padpisali dakumient, u jakim zajavili, što ŭ Kyrhyzstanie byŭ dziaržaŭny pieravarot, ab čym ja i havaryŭ u pieršyja ž dni», — zajaviŭ prezident.
Pry hetym jon padkreśliŭ: «Usie biez vyklučeńnia pryznali, što biełaruski prezident u dadzienaj situacyi pastupiŭ pravilna».
Kurmanbiek Bakijeŭ prybyŭ u Biełaruś 19 krasavika. Časovy ŭrad Kyrhyzstana dabivajecca jaho vydačy. 4 maja kiraŭnik časovaha ŭrada Kyrhyzstana Roza Atunbajeva padpisała dekret ab pazbaŭleńni Bakijeva prezidenckaj niedatykalnaści na padstavie kryminalnaj spravy, pavodle jakoj skinuty lider abvinavačvajecca ŭ arhanizacyi zabojstvaŭ i złoŭžyvańni słužbovym stanoviščam.
U toj ža dzień prezident Biełarusi zajaviŭ, što nie źbirajecca vydavać Bakijeva novym uładam Kyrhyzstana. «Da mianie nichto aficyjna nie źviartaŭsia, — skazaŭ Łukašenka. — Ale adrazu chaču aficyjna zajavić: hetyja zvaroty buduć bieskarysnyja i źnievažalnyja dla časovaha ŭrada. Prezident Kyrhyzstana znachodzicca pad abaronaj biełaruskaj dziaržavy i prezidenta. Nie treba tak zvanamu časovamu ŭradu źviartacca z patrabavańniem vydać Bakijeva. Kamu vydać? Ci zachaču ja jašče razmaŭlać z tymi, chto siońnia kiruje ŭ Kirhizii».
11 maja ŭ Hienieralnaj prakuratury Biełarusi paćvierdzili, što da ich pastupiŭ zapyt ab vydačy Bakijeva.
Kala budynku biełaruskaha pasolstva ŭ Biškieku u hety čas prachodzili rehularnyja pikiety z patrabavańniem vydać Kurmanbieka Bakijeva novym uładam. 13 maja supracoŭniki pasolstva pakinuli Kyrhyzstan z‑za mierkavańniaŭ biaśpieki.
Aleksijevič narešcie vykazałasia pra Izrail i Paleścinu29
Kamientary