Za apošnija dva tydni 679 hruzavikoŭ ź litoŭskimi numarami viarnulisia ź Biełarusi ŭ Litvu paśla taho, jak niekalki miesiacaŭ byli tam zatrymanyja, paviedamlaje Delfi.lt.
Pavodle infarmacyi pamiežnaj słužby Litvy, pa stanie na 0:00 7 krasavika 362 mašyny prajšli praz punkt propusku Miedniki, a jašče 317 — praz Salečniki. Tolki za 6 krasavika viarnulisia 24 hruzaviki.
Pry hetym cikava, što praktyčna tuju samuju ličbu ŭ 700 fur ź litoŭskaj rehistracyjaj, jakija zmahli vyjechać ź Biełarusi, Dziaržaŭny pamiežny kamitet Biełarusi nazyvaŭ jašče 31 sakavika, to-bok tydzień tamu. Praŭda, jon kazaŭ pra mašyny, jakija vyjechali nie tolki praź biełaruska-litoŭskuju, ale i praź biełaruska-polskuju miažu.
Pieršyja aŭtamabili pačali viartacca ŭ Litvu 24 sakavika ranicaj paśla taho, jak Alaksandr Łukašenka dazvoliŭ ich vyjezd.
Pierad tym 17 sakavika pradstaŭniki ŭrada Biełarusi sustrelisia ź pieravozčykami ź Litvy i Polščy, čyje hruzaviki nie mahli pakinuć krainu. Usiaho, pavodle biełaruskich dziaržaŭnych ŚMI, było zatrymana bolš za 1900 fur.
Hetyja transpartnyja srodki znachodzilisia ŭ Biełarusi ź listapada 2025 hoda. Heta było adkazam na rašeńnie Litvy ŭ kastryčniku časova zakryć punkty propusku Miedniki i Salečniki. Pryčynaj stali kantrabandnyja pavietranyja šary, z dapamohaj jakich ź Biełarusi pierakidali cyharety, a taksama stvarali pieraškody ŭ pracy vilenskaha aeraporta.
Paźniej Litva znoŭ adkryła punkty propusku, spadziejučysia viarnuć transpart, ale Biełaruś doŭha admaŭlałasia jaho vypuskać.
Litoŭskaja asacyjacyja pieravozčykaŭ zajaviła, što straty ad hetaj situacyi skłali da 22 miljonaŭ jeŭra. Jeŭrapiejskaja kamisija taksama adznačyła, što zatrymańnie transpartu było nieabhruntavanym.
MZS Biełarusi «pakul nie bačyć hatoŭnaści litoŭskaha boku da surjoznaj razmovy»
Ruhinienie: Dla pieramoŭ ź Biełaruśsiu ŭžo navat pryznačany čałaviek
Ź Biełarusi ŭžo vyjechali kala 700 litoŭskich hruzavikoŭ, jašče 300 apłacili stajanku
Litoŭski biznesmien prapanavaŭ dazvolić tranzit biełaruskich uhnajeńniaŭ, a hrošy tracić na abaronu
Kamientary