Studentku, jakaja raptoŭna pamierła ŭ polskaj Łodzi, pachavali ŭ Biełarusi
Studentku ź Biełarusi, jakaja 23 sakavika raptoŭna pamierła padčas zaniatkaŭ va ŭniviersitecie ŭ Łodzi, pachavali na radzimie. Dakładnaja pryčyna jejnaj śmierci nie vyjaŭlenaja: svajaki admovilisia ad uskryćcia, paviedamiŭ «Biełsatu» blizki svajak pamierłaj.
Surazmoŭca adznačyŭ, što lekary dyjahnaz pastavić nie zmahli, a ad uskryćcia svajaki admovilisia — «tamu pryčynaŭ niama». Pavodle jaho, taksikałahičny analiz nie pakazaŭ narkotykaŭ abo ałkaholu. Analizy kryvi taksama byli narmalnyja.
«Jość padazreńnie, što ŭ pryncypie prablema z sasudami stała pieršapačatkova pryčynaj spynieńnia serca i što kisłarodnaje haładańnie mozhu nastupiła jašče da taho, jak jana niepasredna straciła prytomnaść», — skazaŭ svajak.
Jon padkreśliŭ, što ŭvieś čas — ad momantu straty prytomnaści i da traplańnia ŭ bolnicu — dziaŭčynie akazvali pieršuju miedyčnuju dapamohu i pravodzili reanimacyjnyja pracedury. Da pracy polskich miedykaŭ u siamji niama pretenzijaŭ — «dastatkova kvalifikavana zrabili svaju pracu».
10 krasavika dziaŭčynu pachavali ŭ Biełarusi z dapamohaj kampanii, što zajmajecca repatryjacyjaj ciełaŭ pamierłych. Spačyła jana pobač ź Mienskam, na Lasnych mohiłkach.
Ksienii stała błaha 23 sakavika. Incydent zdaryŭsia padčas zaniatkaŭ pa matematycy ŭ centry polskaj movy dla zamiežnikaŭ pry Łodzinskim univiersitecie.
Pavodle studentaŭ, dziaŭčyna adkazvała ź miesca, zatym vybačyłasia i raptam upała, stuknuŭšysia ab partu.
Vidavočcy raskazvali, što jana pierastała dychać i pačała sinieć. Jak miarkujecca, u jaje adbyłosia spynieńnie serca. Niekatoryja taksama adznačali, što cieła dziaŭčyny pačało rezka dranćvieć, tak što jaje było ciažka pieraviarnuć. Supracoŭnica centra pačała akazvać pieršuju dapamohu, paźniej na miesca pryjechała chutkaja. Miedykam udałosia adnavić sercabićcie, paśla čaho studentku špitalizavali.
Adnak, jak paviedamili znajomyja dziaŭčyny, u balnicy vyśvietliłasia, što jaje mozh pamior. Na pačatku krasavika daktary pryniali rašeńnie adklučyć jaje ad aparataŭ žyćciezabieśpiačeńnia.
Dziaŭčyna pierajechała ŭ Polšču vosieńniu 2025 hoda. Da hetaha jana niekalki hadoŭ žyła i pracavała ŭ Hruzii. U Łodzi jana vučyłasia na moŭnych kursach i płanavała pastupać na hukarežysiora. Sa słoŭ znajomych, jana była cichaja i ścipłaja, havaryła pa-biełarusku i zachaplałasia niezvyčajnym stylem u vopratcy.
Ciapier čytajuć
Pamiatajecie byłoha pamiežnika, jaki staŭ dalnabojščykam i ŭ Hiermanii pryznavaŭsia ŭ lubovi da Łukašenki? Ź im biada17
Kamientary