Litoŭskija mytniki zatrymali tavary z markiroŭkaj Armani, Hermes, Lacoste i Yves Saint Laurent, što vieźli ŭ Biełaruś
Supracoŭniki terytaryjalnaj mytni Vilni pry ahladzie hruzaŭ, jakija pieravozilisia tranzitam praź Litvu, zatrymali partyju tavaraŭ sa Šviejcaryi ŭ Biełaruś. U hetaj partyi było vyjaŭlena bolš za 170 adzinak, mierkavana, kantrafaktnych tavaraŭ, piša Delfi.lt.
Padčas fizičnaha ahladu nadhladu ŭ mytnikaŭ uźnikli abhruntavanyja padazreńni ŭ parušeńni pravoŭ intelektualnaj ułasnaści. U tranzitnym hruzie byli znojdzieny adzieńnie i abutak — kamizelki, futbołki i šlopancy — z markiroŭkaj suśvietna viadomych brendaŭ Armani, Hermes, Lacoste i Yves Saint Laurent.
Usiaho było kanfiskavana bolš za 170 adzinak tavaru, zajaŭlenaja vartaść jakoha składała prykładna 900 jeŭra.
Uličvajučy niezvyčajna nizkija zajaŭlenyja ceny i inšyja prykmiety, uźnikła padazreńnie, što tavary nie źjaŭlajucca aryhinalnymi.
Pravaŭładalniki adpaviednych tavarnych znakaŭ byli prainfarmavanyja ab kanfiskavanych tavarach. Paśla atrymańnia ad ich paćviardžeńnia taho, što vyjaŭlenaja pradukcyja parušaje pravy intelektualnaj ułasnaści, było pryniata rašeńnie ab źniščeńni hetych tavaraŭ pad mytnym kantrolem.
Supracoŭniki mytni adznačajuć, što kantrafaktnaja pradukcyja moža taksama pieramiaščacca praz krainy z vysokaj reputacyjaj.
«Hety vypadak pakazvaje, što kantrafaktnaja pradukcyja nie abaviazkova pieravozicca tolki z rehijonaŭ, jakija ličacca mienš nadziejnymi. Navat krainy, jakija asacyjujucca z vysokaj jakaściu, aryhinalnaściu i nadziejnaściu, takija jak Šviejcaryja, mohuć być častkaj łancužka pieramiaščeńnia kantrafaktnaj pradukcyi. Tamu mytnia praviaraje ŭsie tranzitnyja hruzy z adnolkavaj pilnaściu — niezaležna ad ich pachodžańnia abo pryznačeńnia», — havorycca ŭ zajavie Mytnaha departamienta.
Ciapier čytajuć
Ad rekietu da prodažu fota mahił. Jak vyhladaje znutry hrupoŭka Project X, jakaja viarbuje ludziej dla pieravozki mihrantaŭ ź Biełarusi ŭ ES5
Kamientary