«Kali i pryjedu ŭ Biełaruś, to ŭžo jak turyst». Arhienciniec chacieŭ zrabić biznes u Biełarusi, ale jaho vysłali za drabiazu. Ciapier dazvolili viarnucca, ale jość niuans
Razam ź im z krainy źjedzie i jaho žonka-biełaruska ź dziećmi.
Historyja kachańnia i biznes-płanaŭ u Biełarusi arhiencinca Fredzi i jaho biełaruskaj žonki Maryny akazałasia dramatyčnaj. Paśla rezanansnaj departacyi MUS dazvoliŭ mužčynie viarnucca ŭ krainu, ale para ŭžo paśpieła raźvitacca z maraj pra biełaruskaje žyćcio, piša «Smartpres».
Padziei ŭ žyćci arhiencinca Fredzi i jaho biełaruskaj žonki Maryny raźvivajucca imkliva. Za dva hady znajomstva para paśpieła paznajomicca ŭ Alikante, paźniej pierabrałasia žyć na chutar u Vałožynski rajon, kupiła koniej, zadumała budaŭnictva niezvyčajnaha atela.
Ale 14 sakavika Fredzi vysłali z krainy za toje, što jon sieŭ za rul mašyny, nie majučy biełaruskich pravoŭ.
Historyju Fredzi i toje, jak jon uładkavaŭsia ŭ Biełarusi, miedyi ŭžo raspaviadali.
Padčas śniehapadaŭ i marazoŭ u domie Fredzi skončyłasia ježa, a Maryna nie zmahła dabracca da Kukava ź Minska. Tamu mužčyna sieŭ za rul i pajechaŭ u kramu ŭ susiedniuju viosku.
— Jakraz u hety momant jaho spynili supracoŭniki DAI. Muž nie pieravyšaŭ chutkaść, nie byŭ pjany, ale akazałasia, što jon nie moža jeździć u Biełarusi pa svaich arhiencinskich pravach. Fredzi aštrafavali, a źviestki pajšli ŭ mihracyjnuju słužbu. Nas vyklikali i skazali, što Fredzi mohuć vysłać z krainy, — raspaviadała Maryna.
Akazałasia, što ich płan budavać ekaatel i katacca pa lesie na koniach voś-voś moža ruchnuć.
— Kali było pryniata rašeńnie ab departacyi muža, było vielmi kryŭdna. Fredzi na emocyjach spaliŭ na chutary ŭsiu rabočuju vopratku, — raspaviadaje Maryna. — 14 sakavika muž palacieŭ ź Biełarusi. A dalej historyju padchapili mnohija akaŭnty ŭ Instagram i TikTok, adzin z rolikaŭ nabraŭ 800 tysiač prahladaŭ, i nam patelefanavali z HUUS Minharvykankama…
Za toj karotki čas, što prajšoŭ z momantu rozhałasu historyi, Fredzi departavali z krainy i zabaranili ŭjezd na 3 hady, jon raźvitaŭsia ź biełaruskim chutaram, jaki paśpieŭ palubić, pradaŭ usiu majomaść. I ŭ hetyja ž dni na imia jaho žonki pryjšoŭ list z Departamienta pa hramadzianstvie i mihracyi MUS.
«Z ulikam abstavin, vykładzienych u zvarocie, Departamientam pryniata rašeńnie ab skaračeńni vašamu mužu terminu zabarony ŭjezdu ŭ Respubliku Biełaruś. Zajazdžać na terytoryju krainy jamu dazvolena z 15.04.2026», — havorycca ŭ dakumiencie.
Hety list z Departamienta pa hramadzianstvie i mihracyi MUS Maryna atrymała 1 krasavika.
Maryna ŭspaminaje, jak paśla departacyi muža joj patelefanavali ź milicyi i prapanavali dapamahčy skłaści pakiet dakumientaŭ dla abskardžańnia rašeńnia.
— Mnie dapamahli — i voś vynik. Nie razumieju, navošta Fredzi treba było vysyłać z krainy? — zadajecca pytańniem Maryna. — Jon ža ničoha strašnaha nie zrabiŭ.
«Viartajusia na radzimu z novaj biźnies-idejaj»
Jašče da departacyi para prydumała zapasny varyjant: jany ŭsie razam (u Maryny jość dačka Dajana i syn Filip ad pieršaha šlubu — zaŭv.aŭt.) pajeduć u Arhiencinu, kupiać aŭtadom i dva hady buduć kalasić pa krainie, pryhledžvajučy miesca dla novaha žyćcia. Jak tolki Fredzi pakinuŭ Biełaruś, siamja pačała padrychtoŭku da pierajezdu: Maryna ź dziećmi ŭžo źbiraje dakumienty, a Fredzi znajšoŭ aŭtadom, dzie im treba budzie žyć u bližejšy čas.
Zvanok karespandentaŭ zastaŭ paru ŭ ciahniku Miłan — Bierhama. Jany ŭžo ŭ Italii?! Zabłytacca ŭ punktach pieramiaščeńnia sužencaŭ lohka. To jany na chutary ŭ Biełarusi, to ŭ ispanskim horadzie Alikante, dzie ŭ Fredzi jość dom. A zaraz vyrašyli niekalki dzion pravieści ŭ Italii.
Pieršym u Arhiencinu palacić Fredzi, a ŭletku da jaho dałučycca Maryna ź dziećmi.
— Ja viartajusia na radzimu ŭ Arhiencinu. Tam u mianie jość dom, rodnyja, i ja ŭžo prydumaŭ novuju biznes-ideju, — dzielicca Fredzi.
«Kryŭdna nie za dom, jaki pradali, a za žyvioł»
Za paŭtara hoda žyćcia ŭ Biełarusi Fredzi kupiŭ dva viaskovyja damy (pieršy ŭ Vałožynskim rajonie, druhi — u Maładziečanskim), adramantavaŭ ich, prydumaŭ nie zusim typovy atel, u jakim i ludzi, i koni mohuć žyć razam. Jak ža jaho płany na chutar?
— A kudy mnie jechać? My ŭsio pradali: chutar z końmi ŭ Kukavie, sabak, aŭtamabil. Vystavili na prodaž budynak staroj škoły, ź jakoj chacieŭ zrabić atel, — adznačaje Fredzi.
Para vielmi chutka pradała ŭsiu majomaść u Biełarusi.
— U hetaj situacyi bolš kryŭdna za žyvioł, ź jakimi pryjšłosia raźvitacca. My vielmi da ich pryviazalisia. Razhladali varyjant, jak možna pierapravić adnaho z sabak u Arhiencinu. Ale jon bajcoŭski, važyć bolš za 50 kh, a takich na bort samalota nie biaruć, — tłumačyć Maryna.
Łobu pryjšłosia pakinuć na chutary razam z końmi. Ciapier u ich novyja haspadary.
— Voś da straty doma stavimsia lahčej: adno žyllo možna pradać, druhoje kupić. Za Kukava my nie pieražyvajem: naš chutar dastaŭsia maładym i cikavym rabiatam.
«Ja ž pracavaŭ dobra, chacieŭ rabić biznes»
Mienavita ŭ toj momant, kali Fredzi pakinuŭ Biełaruś, u krainie spraścili praceduru atrymańnia vadzicielskich pravoŭ dla zamiežnikaŭ. Ciapier zamiežnikam, jakija chočuć atrymać paśviedčańnie ŭ RB i ŭ jakich užo jość pravy, vydadzienyja ŭ inšaj dziaržavie, dastatkova zdać praktyčny ekzamien. Teoryju prybrali. Jaje treba było zdavać na ruskaj movie, ale nie ŭsie zamiežniki vałodajuć joj daskanała.
— Ja viedaju ruskuju, ale nie tak dobra, — Fredzi raniej tłumačyŭ, z-za čaho ŭźnikła takaja situacyja. — Kali zdaješ test na kiravańnie, nielha karystacca pierakładčykam. I dajuć usiaho 15 chvilin…
Arhienciniec rady, što ŭ vyniku ŭ jaho situacyi razabralisia i dazvolili viarnucca, ale pryznajecca: asadak zastaŭsia. Jamu b chaciełasia, kab da padobnych historyj padychodzili bolš hibka.
— Ja ž pracavaŭ dobra, chacieŭ rabić biznes, — razvodzić rukami Fredzi. — Kali ja i pryjedu ŭ Biełaruś, to ŭžo jak turyst.
1 červienia Maryna ź dziećmi lacić u Arhiencinu.
— U nas dakładna ŭsio atrymajecca, — upeŭnienaja jana. — Niama nijakaha strachu, užo źbirajem valizki.
Jak stała viadoma redakcyi paźniej, Fredzi ŭžo kupiŭ aŭtadom u Arhiencinie.
Ciapier čytajuć
Chto toj zamiežnik, jaki zabiŭ žonku i zhvałtavaŭ padčarycu ŭ Dobrušy16
Chto toj zamiežnik, jaki zabiŭ žonku i zhvałtavaŭ padčarycu ŭ Dobrušy
Alaksandr Nadsan pieršy raz pryjechaŭ u Biełaruś paśla saraka hadoŭ emihracyi. Minskaja moładź niečakana znajšła ŭ im toje, čaho nie bačyła ŭ svaich baćkach88
Kamientary