Jak zrabić paśviedčańnie kiroŭcy na biełaruskaj movie? Usio praściej, čym vy dumajecie
Dziaŭčyna, jakaja niadaŭna zdavała na pravy, padzialiłasia ŭ sacsietkach historyjaj, jak u akiency padačy ŭ jaje spytalisia, ci nie choča jana atrymać paśviedčańnie na biełaruskaj movie. Akazałasia, što mnohija navat nie zadumvalisia pra takuju mahčymaść.
«Zapisvałasia na pierazdaču ŭ DAI, i dziaŭčyna ŭ akiency takaja: a chočacie paśviedčańnie na biełaruskaj movie? A ja jakraz źbirałasia spytać u jaje, jak heta zrabić… Uziała maje papierki i paznačyła tłusta, što paśviedčańnie mnie treba na biełaruskaj movie», — raspaviadaje svaju historyju dziaŭčyna.
Niekatoryja pišuć, što ich taksama spytali, ci nie chočuć jany pravy na biełaruskaj.
«I mnie prapanavali ŭ akiency! Dumała cukierki prynieści joj i zabyłasia», — pryznajecca inšaja dziaŭčyna.
Pa zmoŭčvańni vašyja danyja ŭ paśviedčańni kiroŭcy buduć zapoŭnienyja na ruskaj. Adnak atrymać biełaruskamoŭnaje paśviedčańnie zusim nie składana.
Kali pytańniaŭ nie zadajuć, to pry padačy dakumientaŭ treba samomu skazać, što chočacie, kab paśviedčańnie było zapoŭniena na biełaruskaj movie. Zvyčajna chapaje prosta skazać heta vusna.
Siarod kamientataraŭ znajšlisia tyja, chto rabiŭ tak nie adzin raz.
«Abodva razy prosta padčas padačy dakumientaŭ u akienca kazaŭ, kab paśviedčańnie było na biełaruskaj», — piša mužčyna.
Inšyja afarmlali prośbu piśmova — ad ruki dadavali paznaku «prašu vydać paśviedčańnie na biełaruskaj movie».
Niekatoryja pryznajucca, što navat nie viedali pra takuju mahčymaść.
«Ja nie viedaŭ, što tak mahčyma zrabić. Škada, što tolki zaraz daviedaŭsia, bo letaś u traŭni mianiaŭ paśviedčańnie. Takija rečy niejak pa zmoŭčvańni prymaješ jak niaźmienny fakt», — piša adzin z kamientataraŭ.
«Ja nie viedała pra takoje i atrymała pa-rusku», — dadaje inšaja dziaŭčyna.
Tamara Vińnikava pradała svoj łondanski dom, zaviešany karcinami samoj siabie ŠMAT FOTA23
Kamientary