Cieła kryčyć pra rak

Rak ciapier možna vyjaŭlać zadoŭha da źjaŭleńnia puchlinaŭ: dla hetaha dastatkova analizu kryvi.

Navukoŭcy z Notynhiemskaha univiersiteta i daśledčaj kampanii Oncimmune abviaścili pra «źmienu paradyhmy» ŭ dyjahnostycy rakavych zachvorvańniaŭ. Mietad, što raspracoŭvaŭsia imi na praciahu piatnaccaci hadoŭ z pryciahnieńniem kala vaśmi tysiač čałaviek, dazvalaje vyjavić rak u arhaniźmie čałavieka ŭ termin da piaci hadoŭ pierad źjaŭleńniem puchlinaŭ. Dla hetaha navukoŭcam dastatkova ŭziać u čałavieka analiz kryvi i pa im vyjavić pieršyja sihnały jaho imunnaj sistemy, źviazanyja ź simptomami źjaŭleńnia raku ŭ arhaniźmie.

Ciapier čas miedyki časta vyznačajuć rak, kali chvaroba ŭžo znachodzicca na surjoznaj stadyi raźvićcia. Tak, u vypadku raku lohkich puchlina ŭ momant jaje vyjaŭleńnia moža dasiahać pamieraŭ tenisnaha miača. U siarednim navat samy rańni paśpiachovy manitorynh raku dazvalaje vyjavić puchlinu ŭ toj momant, kali kletki prajšli stadyju dzialeńnia kala 20 razoŭ, a čałaviek zvyčajna pamiraje paśla 40 dzialeńniaŭ.

Analiz, prapanavany navukoŭcami z Notynhiemu, zaklučajecca ŭ vyznačeńni antyciełaŭ, jakija imunitet čałavieka vypracoŭvaje ŭ adkaz na malekularnyja prykmiety rostu rakavych kletak. Hetyja prykmiety ŭjaŭlajuć saboj vypracavany kletkami białok — antyhien.

10 mililitraŭ kryvi dastatkova, kab vyjavić hety imunny adkaz.

U pieršuju čarhu mietad notynhiemskich navukoŭcaŭ, jaki atrymaŭ nazvu EarlyCDT-Lung, dazvalaje pravieści rańniuju dyjahnostyku raku lohkich. Takaja pracedura raspracoŭvałasia mienavita dla hetaha vidu raku, tamu asnoŭnyja pacyjenty, jakim buduć pravodzić taki analiz, — heta ludzi ad 40 da 75 hadoŭ, jakija abo kurać bolšuju častku svajho žyćcia, abo nie tak daŭno kinuli kuryć. Akramia taho, rak lohkich moža być vyklikany i inšymi pryčynami — kantaktami z uździejańniem radyjoaktyŭnych rečyvaŭ (u pryvatnaści, radonu) i pražyvańniem u rehijonach z zabrudžanaj atmaśfieraj.

Navukoŭcy miarkujuć, što dadzienuju mietodyku, pry nievialikaj dapracoŭcy, u najbližejšaj budučyni možna vykarystoŭvać dla vyjaŭleńnia raku toŭstaj kiški, jaječnikaŭ i małočnaj załozy.

«My pačynajem bačyć i razumieć kancerahienez na toj stadyi, jakuju raniej nie bačyli nikoli, — zajaviŭ The Times prafiesar Džon Robiertsan, adzin z kiraŭnikoŭ daśledavańnia. — My hladzim, jak imunnaja sistema reahuje na rakavyja kletki.

Heta toje ž samaje, jak kali b cieła samo kryčała, što ŭ im jość rak».

Vyniki daśledavańnia buduć pradstaŭlenyja na štohadovaj kanfierencyi Amierykanskaha tavarystva kliničnaj ankałohii ŭ Čykaha na nastupnym tydni. U ZŠA technałohija buduć vykarystoŭvać pačynajučy z nastupnaha miesiaca, a ŭ Vialikabrytanii — z pačatku nastupnaha hodu. Mierkavany košt pracedury dla adnaho čałavieka — kala 300 funtaŭ sterlinhaŭ.

• 2
• 0
• 0
• 0
• 0
• 0
• 0
• 0