Pad Salihorskam dva kiroŭcy pa čarzie najechali na adnaho i taho ž čałavieka
Sud Salihorskaha rajona razhledzieŭ spravu pra śmiarotnaje DTZ, u jakim adnaho piešachoda dvojčy pierajechali dva roznyja aŭtamabili. Ale pakarańnie im vynieśli krychu roznaje, paviedamlaje pres-słužba Hienieralnaj prakuratury.
Trahiedyja adbyłasia 4 studzienia 2025 hoda kala vioski Kasyničy. Spačatku 44‑hadovy kiroŭca Mercedes-Benz jechaŭ chutčej za dazvolenaje i źbiŭ 55‑hadovaha mužčynu, jaki pierachodziŭ darohu. Sud vyznačyŭ, što kiroŭca zaŭvažyŭ piešachoda, ale nie paśpieŭ svoječasova spynicca. Paciarpieły atrymaŭ ciažkija traŭmy.
Praź niekalki chvilin pa tym ža samym učastku darohi jechaŭ Chrysler Voyager. Jahony kiroŭca ŭbačyŭ čałavieka, jaki lažaŭ na prajeznaj častcy, ale taksama nie zatarmaziŭ da poŭnaha spynieńnia i najechaŭ na jaho jašče raz.
Ad atrymanych traŭmaŭ mužčyna zahinuŭ na miescy.
Sud pryjšoŭ da vysnovy, što abodva kiroŭcy mahli paźbiehnuć najezdu, kali b svoječasova prymianili ekstrannaje tarmažeńnie. Abodvuch pryznali vinavatymi.
Kiroŭcu Mercedes-Benz pryznačyli 4 hady i 6 miesiacaŭ abmiežavańnia voli, a kiroŭcu Chrysler Voyager — 4 hady abmiežavańnia voli. Abodvuch taksama pazbavili prava kiravać transpartam na 5 hadoŭ.
Akramia taho, sud pastanaviŭ vypłacić rodnym zahinułaha kampiensacyju maralnaj škody: 45 tysiač rubloŭ z pradpryjemstva, jakomu naležaŭ Mercedes-Benz, i 25 tysiač rubloŭ z druhoha kiroŭcy.
Pakul prysud jašče nie ŭstupiŭ u zakonnuju siłu i moža być abskardžany.
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary