Пад Салігорскам два кіроўцы па чарзе наехалі на аднаго і таго ж чалавека
Суд Салігорскага раёна разгледзеў справу пра смяротнае ДТЗ, у якім аднаго пешахода двойчы пераехалі два розныя аўтамабілі. Але пакаранне ім вынеслі крыху рознае, паведамляе прэс-служба Генеральнай пракуратуры.
Трагедыя адбылася 4 студзеня 2025 года каля вёскі Касынічы. Спачатку 44‑гадовы кіроўца Mercedes-Benz ехаў хутчэй за дазволенае і збіў 55‑гадовага мужчыну, які пераходзіў дарогу. Суд вызначыў, што кіроўца заўважыў пешахода, але не паспеў своечасова спыніцца. Пацярпелы атрымаў цяжкія траўмы.
Праз некалькі хвілін па тым жа самым участку дарогі ехаў Chrysler Voyager. Ягоны кіроўца ўбачыў чалавека, які ляжаў на праезнай частцы, але таксама не затармазіў да поўнага спынення і наехаў на яго яшчэ раз.
Ад атрыманых траўмаў мужчына загінуў на месцы.
Суд прыйшоў да высновы, што абодва кіроўцы маглі пазбегнуць наезду, калі б своечасова прымянілі экстраннае тармажэнне. Абодвух прызналі вінаватымі.
Кіроўцу Mercedes-Benz прызначылі 4 гады і 6 месяцаў абмежавання волі, а кіроўцу Chrysler Voyager — 4 гады абмежавання волі. Абодвух таксама пазбавілі права кіраваць транспартам на 5 гадоў.
Акрамя таго, суд пастанавіў выплаціць родным загінулага кампенсацыю маральнай шкоды: 45 тысяч рублёў з прадпрыемства, якому належаў Mercedes-Benz, і 25 тысяч рублёў з другога кіроўцы.
Пакуль прысуд яшчэ не ўступіў у законную сілу і можа быць абскарджаны.
У гадавіну смерці Жанны Фрыске Дзмітрый Шэпелеў распавёў, чаму не дазваляе сыну бачыцца з яе сваякамі16
Каментары