Ci varta kuplać zakinutuju chatu za adnu bazavuju i kolki heta kaštuje nasamreč? Voś što raskazvajuć ludzi
Niahledziačy na imklivy rost cen na nieruchomaść, u Biełarusi ŭsio jašče možna nabyć dom z učastkam ziamli ŭsiaho za adnu bazavuju (45 rubloŭ). Biełaruska pacikaviłasia ŭ Threads, ci jość u hetym niejkija padvodnyja kamiani. Voś što joj adkazali.
Dadatkovyja patrabavańni — ci jość jany?
Bolšaść kamientataraŭ staviacca da takoj idei skieptyčna pierš za ŭsio praz toje, što za takuju sumu pradajuć tolki zakinutyja damy ŭ boham zabytych miaścinach, dzie jość prablemy z kamunikacyjami i da cyvilizacyi vielmi daloka.
Niekatoryja spasyłajucca na toje, što z časam taki dom nibyta mohuć adabrać, kali chutka nie ŭźvieści novy, abo, jašče horš, adbiaruć praz toje, što znojdziecca stary ŭłaśnik i vyśvietlicca, što dom adabrali pamyłkova.
Tym nie mienš jość i tyja, chto navažyŭsia nabyć sabie dom za bazavuju i nie škaduje.
«Ja tak kupiła dom, usio ok. Učastak da jaho — 20,5 sotki. Apłaciła 40 rubloŭ za dom. Za abmier učastka — 214 rubli, za dakumienty ŭ BTI — 107 rubloŭ», — padzialiłasia dziaŭčyna, jakaja nabyła dom za bazavuju ŭ 2024 hodzie.
Pad jaje kamientarom źjaviłasia šmat udakładnialnych pytańniaŭ: ci možna paśla biez abmiežavańniaŭ pradać dom, ci niama niejkaha terminu, ciaham jakoha dom abaviazkova treba ŭvieści ŭ ekspłuatacyju.
Na heta jana adkazała, što nie atrymała nijakich dadatkovych patrabavańniaŭ, i tolki adznačyła: treba, kab učastak byŭ u paradku, a kali dom pad znos, tady vy abaviazany jaho źnieści sami.
Inšaja kamientatarka, jakaja minułaj vosieńniu taksama nabyła dom z 25 sotkami za bazavuju, napisała, što im skazali ŭ sielsaviecie: hałoŭnaje — prybrać kusty i drevy i kasić travu, kab było vidać, što ŭčastkam karystajucca.
«Kali buduć bačyć, što jaho dahladajuć, to niama nijakich žorstkich patrabavańniaŭ. Hałoŭnaje, kab nie zarastaŭ. Patrabavańnie adno — dahledžany ŭčastak, kab nie atrymać štraf. Tak što nie tak usio strašna, jak pišuć», — zapeŭnivaje jana.
Što da kamunikacyj, to ŭ vioscy, dzie žančyna nabyła dom za bazavuju, pa vulicy idzie centralny vodapravod (treba ŭrezku rabić), elektryčnaść — novyja sietki, ale taksama treba padklučać.
Abmier učastka — samaja darahaja pracedura pry afarmleńni
Pry hetym u śpisie vydatkaŭ jašče paznačajuć takuju reč, jak abmier učastka, jaki ŭ IP moža kaštavać 450—600 rubloŭ, tamu, kali času i žadańnia čakać dziaržaŭnaha abmierščyka niama, treba rychtavacca da takich adnosna vialikich vydatkaŭ.
Taksama adznačajuć, što takija damy pradajucca biez adpaviednych dakumientaŭ (pašparta na dom), tamu afarmleńnie zajmaje bolš času, čym pry zvyčajnaj kupli-prodažy nieruchomaści.
Častka pakupnikoŭ admaŭlajucca ad doma
Adzin z kamientataraŭ, jaki, ź jaho słoŭ, zajmajecca afarmleńniem dahavoraŭ na takija damy, adznačyŭ, što paśla kupli za bazavuju ludzi niaredka źnikajuć, bo nie chočuć płacić bolš, kali razumiejuć, što adnoj bazavaj tut nie abyścisia.
«Zajmajusia afarmleńniem takich aŭkcyjonaŭ i damovaŭ. A potym, paśla rehistracyi dahavora, hetaha pakupnika dniom z ahniom nie znojdzieš. Davodzicca abjaŭlać vyšuk pa sudzie. Tamu što ŭ jaho ŭ hałavie była tolki 1 bazavaja pry kupli», — tłumačyć jon.
Jość siarod kamientataraŭ i tyja, chto tolki hladzieŭ damy, ale da kupli nie dajšło.
«Ja hladzieŭ taki dom — adzin u lesie, vakoł nikoha. Da cyvilizacyi tolki na aŭto. Karaciej, kali dla dušy — možna. Dla žyćcia — nie», — piša mužčyna i dadaje, što ad padobnych damoŭ da bujnych haradoŭ, jak praviła, 60—80 kiłamietraŭ.
«Kali zadavalniaje miesca i najaŭnaść kamunikacyj — biarycie. Abaviazacielstvy jak i va ŭsich ułaśnikaŭ — utrymlivać u paradku terytoryju i dom. Nie słuchajcie tryźnieńnie, u lubym sielvykankamie (na terytoryi jakoha znachodzicca dom) vas prakansultujuć. Pustujučyja damy pradajuć i ŭ žyvych vioskach, dzie jość cyvilizacyja, narmalnaja suviaź i navat hazapravod», — dadaje inšaja kamientatarka.
Bolšaść ža nazyvaje takija damy žorstkim nielikvidam, jaki nastolki ničoha nie varty, što jany nie patrebnyja navat tym, chto atrymaŭ ich u spadčynu.
U adkaz na takija arhumienty mnohija adznačajuć, što razhladajuć kuplu takoha doma nie dla taho, kab tam žyć na pastajancy, a ŭ jakaści lecišča. Inšyja pryznajucca, što ich cikaviać takija varyjanty vyklučna dziela ziamli.
Ciapier čytajuć
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju6
Kamientary