Sałaŭjoŭ abvinavaciŭ Ksieniju Sabčak i jaje maci Narusavu ŭ dziaržzdradzie

Pra źlityja pierapiski Sabčak Sałaŭjoŭ vykazaŭsia ŭ pačatku vypusku «Niadzielnaha viečara». Jon nie nazvaŭ jaje proźvišča, adnak z kantekstu vykazvańnia zrazumieła, što Sałaŭjoŭ mieŭ na ŭvazie mienavita Sabčak i Narusavu.

Pra ich Sałaŭjoŭ zahavaryŭ u kantekście samitu NATA, jaki prajšoŭ na hetym tydni ŭ Turcyi. Televiadoŭca zhadaŭ zajavu Uładzimira Zialenskaha paśla samitu pra toje, što imknieńnie Ukrainy zaviaršyć vajnu maje «padtrymku nie tolki siarod partnioraŭ u śviecie, a taksama siarod atačeńnia Pucina».

«Jany viedajuć adkul? — spytaŭ Sałaŭjoŭ. — Tamu što vyśvietliłasia, što ŭ adnoj izrailskaj žurnalistki ciesnyja suviazi z pradstaŭnikami bližejšaha koła Zialenskaha? Pierahavorvajucca pa telefonie, źlivajuć infarmacyju?»

U źlitych pierapiskach jość abmien paviedamleńniami pamiž «Sabčak» i «byłym kiraŭnikom ofisa prezidenta Ukrainy Andrejem Jermakom». 

 «A jak pastavicca da hetaha — kali va ŭskrytaj pierapiscy raptam vyśviatlajecca, što ŭ intaresach zamiežnych ahientaŭ, zdradnikaŭ našaj radzimy, navalnistaŭ, asabista Navalnaha dziejničali dziejny sienatar Rasijskaj Fiederacyi i jaje dačka, pastaŭlajučy infarmacyju, vieryfikujučy i absłuhoŭvajučy tych, chto isnavaŭ na hrošy zamiežnych śpiecsłužbaŭ. Heta narmalna? Heta narmalna? Heta nie zdrada našaj radzimie?»

Sałaŭjoŭ zajaviŭ, što «dla hetaj siamji było zroblena stolki, što jany pavinny byli być da truny abaviazany». Adnak, «jany pajšli pa šlachu zdrady, na moj pohlad», — skazaŭ jon.

Televiadoŭca abmoviŭsia: «Viadoma, kali hetaja pierapiska adpaviadaje rečaisnaści, jak i razmova».

Na zakančeńnie kamientara Sałaŭjoŭ vykazaŭ zdahadku pra isnavańnie «zmovy» ŭ atačeńni Uładzimira Pucina.

«Jakuju jašče infarmacyju jany źbirali i pieradavali? Pra kaho jašče z kiraŭnikoŭ našaj krainy? Jakija jašče jany vykonvali daručeńni? I ad kaho jany ich atrymlivali? Što heta za farmuloŭka? «U bližejšym kole jość niechta». To-bok heta zmova?»

Na hetym tydni byli abnarodavany frahmienty, jak śćviardžajecca, pierapisak Ksienii Sabčak z hałoŭredam «Ostorožno, novosti» Siarhiejem Citovym, hałoŭnym padradčykam Kramla ŭ Telegram Kryścinaj Patupčyk i pradstaŭnicaj siamji Barysa Jelcyna Palinaj Dzierypaskaj. U źlitych «pierapiskach» taksama jość dyjałohi, jak vynikaje z publikacyj, ź Jermakom, kiraŭnikom upraŭleńnia hramadskich prajektaŭ administracyi prezidenta Rasii Siarhiejem Novikavym i kiraŭnikom prapahandysckaha ANA «Dyjałoh» Uładzimiram Tabakom.

Sama Sabčak paśla pieršaj uciečki nazyvała źlityja razmovy «fejkami», adnak u pierapiscy z redaktaram «Ahienctva» jana nie stała adkazvać na pytańnie pra toje, ci ŭsie jaje dyjałohi byli sfalsifikavanyja. 

• 0
• 0
• 3
• 2
• 0
• 0
• 0
• 0