Biełaruski kryminalnik zapisaŭsia na front, kab jaho nie vyhnali z Rasii. Ale ŭrešcie sieŭ za zabojstva na 11 hadoŭ

Hramadzianin Biełarusi Alaksandr Harankoŭ u 2022 hodzie atrymaŭ u Rasii termin za razboj. Paśla vyzvaleńnia jamu pahražała departacyja z krainy. Kab jaje paźbiehnuć, jon padpisaŭ kantrakt ź Ministerstvam abarony Rasii. Adnak na front tak i nie trapiŭ — zamiest hetaha biełarus pasialiŭsia ŭ čužoj kvatery ŭ Biełharadzie, dzie praź niekalki miesiacaŭ da śmierci zabiŭ mužčynu i atrymaŭ novy termin, na hety raz na 11 hadoŭ strohaha režymu.

U listapadzie 2022 hoda Lafortaŭski rajonny sud Maskvy pryznaŭ Harankova vinavatym u razboi (č. 1 st. 162 KK RF) i daŭ jamu try hady kałonii ahulnaha režymu. Termin jon adbyvaŭ va ŭładzimirskaj kałonii. U kastryčniku 2024 hoda jaho vyzvalili.

Jašče ŭ kałonii Harankoŭ paznajomiŭsia z čałaviekam, jaki paabiacaŭ dapamahčy z pracaŭładkavańniem i žyllom u Biełharadzie. U listapadzie 2024‑ha jon tudy i pierajechaŭ — pasialiŭsia ŭ kvatery znajomaha svajho novaha pryjaciela. Umova była prostaja: zamiest płaty za pražyvańnie biełarus rabiŭ u kvatery kaśmietyčny ramont.

Pakolki Harankoŭ — hramadzianin Biełarusi, paśla vyzvaleńnia jaho čakała departacyja. Kab nie dać jamu schavacca ad vysyłki, palicyja patrabavała praz sud źmiaścić jaho ŭ śpiecustanovu dla zamiežnikaŭ.

Ale da razhladu spravy Harankoŭ paśpieŭ zaklučyć kantrakt ź Ministerstvam abarony Rasii na prachodžańnie vajskovaj słužby terminam na hod. A kali čałaviek idzie na kantraktnuju słužbu, trymać jaho pad vartaj nielha.

Ale, jak akazałasia paźniej, «iści na słužbu» jašče nie značyła «iści na front». Jašče ŭ lutym 2025‑ha — praz try miesiacy paśla taho, jak sud spyniŭ departacyju dziakujučy kantraktu, — Harankoŭ u Biełharadzie ŭsio jašče zajmaŭsia zboram dakumientaŭ dla zaklučeńnia kantraktu ź Ministerstvam abarony i rabiŭ ramont u kvatery.

Uviečary 22 sakavika 2025 hoda Harankoŭ farbavaŭ u kvatery akonnuju ramu, kali zaŭvažyŭ mužčynu, jaki prachodziŭ mima. Jon prapanavaŭ jamu vypić razam. Budučaja achviara, mužčyna siaredniaha ŭzrostu, žanaty, biez sudzimaściaŭ, jaki, jak paźniej apisvała jaho dačka, byŭ «kłapatlivym i bieskanfliktnym», pahadziŭsia.

Vypiŭšy na kuchni kala litra harełki, Harankoŭ prapanavaŭ surazmoŭcu pamycca samomu i pamyć brudnaje adzieńnie. Kali toj raździeŭsia, biełarus ubačyŭ na nahach sabutelnika kampresijnyja pančochi — mužčyna nasiŭ ich praz prablemy ź vienami na nahach, praz heta drenna pierasoŭvaŭsia. Harankoŭ vyrašyŭ, što toj — homaseksuał, tamu nakinuŭsia na achviaru i pačaŭ źbivać: spačatku kułakami ŭ hałavu, potym, kali toj upaŭ, — nahami pa tułavie, rukach i nahach. Usiaho jon nanios nie mienš za 23 udary. Kali achviara zacichła, Harankoŭ supakoiŭsia, vypiŭ jašče harełki i zasnuŭ.

Ranicaj jon zrazumieŭ, što hość miortvy. Prybraŭ u kvatery ślady kryvi, sabraŭ rečy zabitaha i vykinuŭ ich u śmiećcievy kantejnier. Zatym kupiŭ dźvie vialikija torby, sprabujučy vynieści cieła na vulicu, — nie zmoh, bo trup byŭ zanadta ciažki. 25 sakavika jon sabraŭ rečy i pajechaŭ spačatku ŭ Kursk, potym u Aroł — nakiroŭvajučysia, jak paźniej raspavioŭ śledstvu jaho znajomy, u bok Biełarusi. 28 sakavika na čyhunačnym vakzale Branska, užo kala biełaruskaj miažy, jaho zatrymali supracoŭniki palicyi. Harankoŭ adrazu pryznaŭsia ŭ zabojstvie.

Jak vyśvietliłasia paźniej z sudova-miedycynskaj ekśpiertyzy, śmierć nastupiła nie adrazu: achviara pamierła ad traŭmatyčnaha šoku, vyklikanaha pierałomam hrudziny i mnostvam pierałomaŭ rebraŭ z abodvuch bakoŭ, niedzie ŭ pramiežku pamiž viečaram 22 sakavika i nočču 24 sakavika — to-bok, mahčyma, užo paśla taho, jak Harankoŭ pakinuŭ kvateru i pajechaŭ.

Cieła znajšli tolki 25 sakavika ŭviečary, kali haspadar kvatery pa prośbie palicyi, jakaja šukała mužčynu pa zajavie jaho dački ab źniknieńni baćki, adčyniŭ dźviery svaim klučom.

Kastryčnicki rajonny sud Biełharada pryznačyŭ Harankovu 11 hadoŭ kałonii strohaha režymu. Jašče kala $10 tysiač jon pavinien zapłacić u jakaści kampiensacyi maralnaj škody dačce zabitaha.

• 0
• 0
• 0
• 0
• 0
• 0
• 0
• 0