Aryjana Hrande prypyniaje karjeru. Apošnim časam fanaty chvalujucca, što śpiavačka ekstremalna pachudzieła
Amierykanskaja śpiavačka Aryjana Hrande paśla zaviaršeńnia hastrolnaha tura časova adydzie ad publičnaha žyćcia. Aficyjnaja pryčyna — biaskoncyja i niaspynnyja abmierkavańni jaje źniešnaści.
Amierykanskaja śpiavačka Aryjana Hrande paśla zaviaršeńnia hastrolnaha tura Eternal Sunshine voźmie paŭzu i časova adydzie ad publičnaha žyćcia. Pra heta časopisu People paviedamiŭ jaje pradstaŭnik.
Pavodle jaho słoŭ, apošnija hady pastajannaja ŭvaha da śpiavački i niaspynnyja abmierkavańni jaje źniešnaści stali dla jaje zanadta ciažkimi.
«Jana ź nieciarpieńniem čakaje finału hastrolaŭ i choča skončyć ich na vysokaj nocie — zastajučysia zdarovaj i ščaślivaj. Paśla hetaha jaje čakaje zasłužany adpačynak ad pracy, źviazanaj z publičnymi vystupleńniami i źjaŭleńniem na ludziach, jakija stali padstavaj dla biaskoncych i niaspynnych abmierkavańniaŭ», — cytuje vydańnie słovy pradstaŭnika śpiavački.
Hrande taksama admoviłasia ad udziełu ŭ łondanskaj pastanoŭcy miuzikła «Niadziela ŭ parku z Džordžam» (Sunday in the Park with George). Pry hetym pra zaviaršeńnie karjery nie idzie havorki: jana vykanaje ŭsie zapłanavanyja kancerty, paśla čaho zrobić pierapynak.
Pryčynaj takoj uvahi apošnija niekalki hadoŭ była nie tolki tvorčaść śpiavački, ale i jaje źniešnaść. U sacyjalnych sietkach i tabłoidach rehularna abmiarkoŭvali, što Hrande mocna schudnieła, z-za čaho ŭźnikali šmatlikija zdahadki pra jaje fizičnaje i psichičnaje zdaroŭje.
Śpiavačka nieadnarazova prasiła nie kamientavać jaje źniešnaść. U 2023 hodzie jana źviarnułasia da tych, chto paraŭnoŭvaŭ jaje novyja fatahrafii sa starymi i śćviardžaŭ, što raniej jana vyhladała zdaraviej. Hrande adkazała, što mienavita ŭ toj pieryjad pieražyvała adzin z samych ciažkich etapaŭ svajho žyćcia: prymała šmat antydepresantaŭ, užyvała ałkahol, drenna charčavałasia i mieła prablemy sa zdaroŭjem. Jana zaklikała nie rabić vysnoŭ pra zdaroŭje čałavieka tolki pa jaho źniešnim vyhladzie.
Novaja chvala takich abmierkavańniaŭ uźniałasia paśla vychadu klipa na pieśniu Petal z adnajmiennaha alboma, jaki vyjšaŭ 31 lipienia.
33‑hadovaja Aryjana Hrande — adna z samych viadomych pop-śpiavačak sučasnaści. Jana naradziłasia ŭ amierykanskim štacie Fłaryda i spačatku prasłaviłasia jak aktrysa padletkavych sieryjałaŭ «Viktoryja-pieramožca» (Victorious) i «Sem i Ket» (Sam & Cat). Suśvietnuju viadomaść joj pryniesła muzyka: z 2013 hoda Hrande vypuściła siem studyjnych albomaŭ, atrymała try premii «Hremi».
Zrešty, z publičnaj prastory Hrande nie źniknie adrazu. 25 listapada adbudziecca premjera kamiedyi «Znajomstva z Fakierami» (Focker-in-Law) — novaj častki franšyzy «Znajomstva z baćkami» (Meet the Parents), dzie śpiavačka vykanała adnu z rolaŭ razam z Benam Styleram i Robiertam De Nira.
Ciapier čytajuć
I pra realnych bandytaŭ, i pra kryvarukaha Kościu-plitačnika, i pra seks u ciahniku. Žurnalistka z Homiela napisała knihu — čytać jaje strašna i śmiešna66
Kamientary