Na mitynh u Vilni palitźniavolenaja Dziadziula pryjšła z łokšynaj u rukach, kab addać jaje Kučynskamu. Ale nie daniesła

Padčas akcyi da šostaj hadaviny narodnaha ŭzdymu 9 žniŭnia ŭ Vilni adbyŭsia incydent: byłaja palitźniavolenaja Alena Dziadziula pasprabavała pieradać dyrektaru Ofisa Śviatłany Cichanoŭskaj u Litvie Dzianisu Kučynskamu talerku z łokšynaj. 

Incydent adbyŭsia na Kafiedralnaj płoščy, dzie bolš za sto ŭdzielnikaŭ sabralisia, kab uzhadać padziei žniŭnia 2020 hoda, padtrymać biełaruskich palitviaźniaŭ i nahadać pra patrabavańnie svabodnych vybaraŭ.

Na płoščy razharnuli vialiki bieł-čyrvona-bieły ściah i raźmiaścili halereju z partretami palitviaźniaŭ. Paśla mitynhu kałona rušyła praz centr Vilni da biełaruskaj ambasady.

Arhanizataram mierapryjemstva vystupiła arhanizacyja «Dapamoha» Natalli Kalehavaj.

«Padumała, što jana moža niešta kinuć jamu ŭ tvar»

Dzianis Kučynski vystupaŭ sa sceny i dziakavaŭ biełarusam za toje, što jany praciahvajuć udzielničać u akcyjach salidarnaści:

«Toje, što ŭ 2020‑m, my dumali, budzie spryntam, akazałasia marafonam. Ja nikoli nie budu kazać, što budzie lohka. Heta šmat pracy, heta pot i ślozy. Ale my musim pamiatać pra našych palitviaźniaŭ, hierojaŭ i pra ludziej, jakija bieź mikrafonaŭ i scenaŭ cicha praciahvajuć baraćbu ŭnutry Biełarusi».

Padčas vystupu da jaho nakiravałasia Alena Dziadziula. Pobač z Kučynskim u hety momant znachodziłasia kiraŭnica «Dapamohi» Natalla Kalehava. Jana i spyniła žančynu.

«Kali ja ŭbačyła, što jana idzie da sceny, to padumała, što jana moža niešta kinuć Dzianisu ŭ tvar. Tamu ja jaje spyniła. Alena dastała talerku z łokšynaj i pasprabavała ŭručyć Dzianisu sa słovami: «Viartaju vam vašu łokšynu». Ja łokšynu vykinuła, talerku vyzvaliła», — raskazała «Našaj Nivie» Natalla Kalehava.

Pavodle jaje, prysutnyja praktyčna nie adreahavali na toje, što adbyłosia.

My źviarnulisia da Aleny Dziadziuli pa kamientar, kab jana patłumačyła sens svajoj akcyi. Na momant publikacyi Dziadziula na našy pytańni nie adkazała.

Pavialičyć

Chto takaja Alena Dziadziula

Alena Dziadziula — byłaja biełaruskaja palitźniavolenaja, jakaja ciapier žyvie ŭ Litvie i ŭvachodzić u supołku byłych palitviaźniaŭ RE:BELarus.

U vieraśni 2021 hoda Dziadziulu zatrymali razam ź inšymi ŭdzielnikami tak zvanaj «spravy ciukoŭ». Hrupu biełarusaŭ abvinavacili ŭ tym, što jany razmalavali pratesnymi łozunhami bolš za 80 ciukoŭ sienažu na poli kala trasy M1 pad Dziaržynskam.

Dziadziulu pryznali vinavataj u złosnym chulihanstvie i prysudzili hod kałonii. Jana całkam adbyła pakarańnie i vyjšła na volu 10 maja 2022 hoda. 

Da zatrymańnia Dziadziula była pryjomnaj maci: razam z rodnymi dziećmi jana vychoŭvała dźviuch dziaŭčynak, uziatych u siamju.

U Litvie Dziadziula stała adnoj z aktyŭnych udzielnic supołki RE:BELarus. Jana ŭdzielničała ŭ akcyjach pamiaci i salidarnaści, dapamahała biełarusam u mihracyjnym łahiery ŭ Padbrodździ.

Što takoje RE:BELarus

RE:BELarus pazicyjanuje siabie jak abjadnańnie biełaruskich palitviaźniaŭ u Litvie. Jaho pradstaŭniki arhanizoŭvali ŭ Vilni akcyi ŭ padtrymku Mikoły Statkieviča i inšych palitviaźniaŭ, ušanoŭvali pamiać Vitolda Ašurka i Ramana Bandarenki.

Heta nie pieršaja publičnaja akcyja pradstaŭnikoŭ RE:BELarus suprać ludziej z kamandy Śviatłany Cichanoŭskaj. U lutym 2026 hoda padčas mitynhu ŭ Vilni ŭ pamiać pra biełaruskich dobraachvotnikaŭ, jakija zahinuli va Ukrainie, niekalki byłych palitviaźniaŭ demanstratyŭna paviarnulisia śpinami da daradcy Cichanoŭskaj Anatola Labiedźki. U rukach jany trymali płakaty «Dosyć pustych słoŭ», «Jak Ofis dapamahaje palitviaźniam u Biełarusi?» i «Čym Ofis dapamoh?». 

Pry hetym apošnim časam asobnyja pradstaŭniki RE:BELarus publična padtrymlivali vystupleńni vajaŭničaha krytyka Śviatłany Cichanoŭskaj Dźmitryja Skindzierava. U pryvatnaści, Alena Dziadziula raspaŭsiudžvała na svajoj staroncy infarmacyju pra jaho pres-kanfierencyju.

Mienavita Skindzieraŭ raniej ładziŭ pravakacyi suprać Dzianisa Kučynskaha i abviaściŭ vajnu Śviatłanie Cichanoŭskaj. 

Napady na Dzianisa Kučynskaha 

Tak, u studzieni 2026 hoda Dźmitryj Skindzieraŭ padyšoŭ da Dzianisa Kučynskaha ŭ adnoj ź vilenskich kaviarniaŭ, pačaŭ zdymać jaho na telefon, abražać i pahražać fizičnaj raspravaj.

«Kali my pajedziem dadomu? Kolki hrošaj admyli? Jakaja tvaja dola? Zaraz ja tabie ŭłamlu», — kryčaŭ jon.

Pryčym zapis chutka raspaŭsiudzili biełaruskija dziaržaŭnyja miedyja i prapahandysckija telehram-kanały. Paśla hetaha Skindzieraŭ pačaŭ rehularna publikavać videa z napadkami na Śviatłanu Cichanoŭskuju i jaje kamandu. Jon, siarod inšaha, zaklikaŭ svaich prychilnikaŭ akazvać cisk na pradstaŭnikoŭ Ofisa, u tym liku «ablivać ich sa šklanki».

U krasaviku «Naša Niva» apublikavała vialikaje rasśledavańnie pra Skindzierava. My raskazali pra jaho kryminalnuju sudzimaść za vymahalnictva, šmatlikija niaŭdałyja i abciažaranyja pazykami biźnies-prajekty, a taksama pra jaho raniejšaje dobraachvotnaje supracoŭnictva z HUBAZiKam.

U červieni Skindzieraŭ paviedamiŭ, što atrymaŭ ad Departamienta mihracyi Litvy paviedamleńnie pra namier pazbavić jaho statusu ŭciekača. Pryčynaj stała infarmacyja litoŭskich słužbaŭ, jakaja daje padstavy ličyć jaho pahrozaj nacyjanalnaj biaśpiecy. Źviestak pra kančatkovaje rašeńnie litoŭskich uładaŭ pa hetaj historyi pakul niama.

• 2
• 0
• 0
• 6
• 0
• 0
• 3
• 0